ریاستی ادارہ تا بے سوبری
ٹی بی پی سرگپ
بلوچ انسرجنسی ءِ ایسر کننگ کن جوڑ مروک پالیسی و ریاستی بے دادی آن زیمی مروک کیہی خاہوت آتا اسلام آباد پریس کلب نا مونا تولوک برانز برجاء ءِ، ولے ریاستی ادارہ غاک زوراکی ئٹ بیگواہ بندغ تے یلہ کننگ نا جاگہ غا بے سوبری نا درشانی کننگ ءُ و ہمو بندغ تا کمک ئٹ ہرا بلوچستان ئٹ سیاسی باسک آتا زوراکی نا بیگواہی و کسفنگ بِٹنگ ئٹ اوار ءُ، اوفتے بلوچ لانگ مارچ نا برخلاف کاریم ئٹ ہتنگک۔
بلوچستان نا ملامت آ ڈیتھ اسکواڈ آک ہرا بلوچ سیاسی باسک آتا زوراکی نا بیگواہی و خون، دُزی داڑیلی و زر اکن برمتہ کننگ ئٹ اوار ءُ ہرافتا برخلاف بلوچستان نا الس چرجوئی ئٹ برانز کننگ ءِ، اوفتے ایسر کننگ نا جاگہ غا بلوچ راج ئنا گواچن توار تے بند کننگ و اوفتا برخلاف محاذ جوڑ کننگ کن اندا کڑد آتے اسُل یلہ اِلنگانے۔
بلوچ لانگ مارچ نا بناء آن پرامن جنز ءِ توننگ کن جتا چم آتے کاریم ئٹ ہتنگک۔ ویل ئنا ایسر کننگ نا پارہ غا گام کپننگ و گپ و تران عمل نا جامد مننگ آن ویل آتیٹ ودکی مرو۔ زوراکی ئٹ بیگواہ بندغ تا خاہوت آتا خواست آک پاکستان نا تینا راہبند نا ردئٹ ءُ و اوفتا خواست آتیا عمل کننگ آن ویل آتے ایسر کننگ مریک۔
بلوچ لانگ مارچ بیرہ اسلام آباد اسکان اف بلکن بلوچستان نا جتا شار تیان جنز ئنا حق ئٹ ہزار آ بندغ آک پیشتمسہ اوفتیتون ہمکوپئی نا درشانی کننگ ءُ و جہان ئٹ بلوچستان ئٹی مروک بے دادی نا ایسری کن توار ارفنگ ءُ۔
گندہ غا چم تیٹ خاخر ہلوک ویل و ظلم و تادی تا برخلاف بڑز مروک توار تے بند کننگ ممکن اف۔ پاکستان نا نگران حکومت نا وزیر آک بیان بازی نا جاگہ غا لانگ مارچ ئٹ اوار مروک آتیتون گپ و تران کریسہ ویل آتے ایسر کننگ نا پارہ غا گام کننگ کیرہ، ولے بنداوی ہیت دادے کہ پاکستانی ادارہ غاک بیگواہ بندغ و ڈیتھ اسکواڈز آتے ویل آخہ بلکن پالیسی تکرہ، دا مائنڈ سیٹ نا سوب آن ممکن خننگپک کہ دا ویل ایسر مننگ کرو۔