افسانہ | فیصلہ نا طاغت (ارٹمیکو بشخ)
نوشت: ضیاء دلجان بلوچ | مٹ: گواڑخ
دی بلوچستان پوسٹ
دائسکان بس لک پاس ٹنل آن تدینگتوسس کہ اودے سلوئی تما۔ ڈرائیور کل مسافر تے دڑنگ کن پارے، او بس ئنا مون نا شیشہ غان پیشن ہُرا تو فورس ئنا بھاز آ گاڈی تے خنا، او کل اندنکہ دڑنگ کن بش مسر گڑا فورس ئنا منہ کارندہ بس ئٹ پیہار و کل ءِ تولنگ نا پرمان تسر۔ پدا اسٹ اسٹ آ کل ئنا دروشم تے ہُننگ بناء کریر۔ اسہ کارندہ اس مچے مونی بس و نیامیکو سیٹ آن اسہ ورنا ئسے نا زنچخ ئٹ ہلک اودے بش کرے و اونا پِن و ڈس ءِ ہرفے۔ او ورنا تون اسہ نیاڑی اس و اِرا چنا ئسر۔ اندنکہ او تینا پِن و ڈس ءِ پارے گڑا کارندہ اودے خلنگ و کرینگ تننگ بناء کرے۔ چنا بھیم نا سوب ہوغنگ ءِ بناء کریر و نیاڑی ہم ہوغا۔ او ورنا بلکن اونا اَرغ ئس، او تینا اَرغ ءِ کارندہ غاتیان یلہ کننگ نا کوشست کرے کہ سپاہی اس توفک نا بٹ ئٹ نیاڑی نا کاٹم آ خلک۔ نیاڑی نا کاٹم آن دتر وہنگ بناء مس۔ اول نا سپاہی دائسکان ورنا ءِ مُچ ئٹ خلنگ ئس و اودے کھرینگ تننگ ئس، او پاریسہ ئس بھلو کمانڈر اس کیسہ تینے چرینگسہ دہشت گرد نا مار، نا باوہ ہم بلوچستان ءِ پاکستان آن جتاء کننگ کپک۔ ورنا ءِ خلیسہ دتر چر کریر و بس آن دڑفیر گریسہ تینا گاڑی ٹی تولفیر دریر تہ۔ او نیاڑی و چناک دائسکان ہوغنگ ئسر۔ فورس ئنا ہننگ آن پد نیاڑی گٹو مروک ڈول ئٹ بس ئٹی ساڑی نرینہ مسافر آتے پامدار کریسہ پارے نمے ٹی ہچو بلوچی ننگ اس الو کہ او سپاہیک بسر کنا ارغ ءِ دریر و نم بیرہ ہُرارے۔ کنا ارغ دُز یا داڑیل اس الو بلکن او نما پگہ ءِ جُوان کننگ نا خاطر دژمن نا کھرینگ و لغت آتے سگنگ ئس، ولے نم کل اودے لغت کُننگ آ بیرہ ہُرارے، نیاڑی اوفتے بِنفنگ ئس و کل بندغ آک چپ ئسر۔ اوفتیٹ ذاکر ہم کل آتیانبار کاٹم ءِ شیف کریسہ چپی ئٹ فرش ءِ ہُننگ ئس، او داڑان بیدس ہچ کننگ کتوکہ۔ سفر برجاء ئس منہ پین نیاڑی دا نیاڑی و اونا چنا تے دلاسہ تننگ ئسر۔ ہرا وخت ذاکر نا علاقہ سر مس گڑا او بس آن دڑنگا و اُرا غا ہنا۔
اِرا دے آن پد بس ئٹ مروک تدینی ءِ او گیرام کرے، داسہ او تینا انٹرویو چِٹھی کن ودار کننگ ئس دا وخت ئٹ اونا حال حوال فون آ اونا مُست ئنا سنگت تون مریسہ کریکہ۔ پانزدہ دے آن پد اونا ڈس آ انٹرویو چٹھی ہم سر مس۔ داسہ اِرا دے آن پد اودے پدا کوئٹہ غا ہنوئی ئس ولے او سوچ خلک کہ دا وار او مالو آنبار ہنپرو، او بازار آ ہنا تینکن بوٹ و جیکٹ ہلک، اوفتے ہلنگ آن پد او اسہ ہوٹل اسیٹ چاہ کُننگ کن ہنا، او ہُرا کہ ایلو خڑک ئنا ٹیبل آ چار ورنا تولوک ئسر و بھاز ترندی ئٹ اوفتا نیام ئٹ سیاسی شرہ برجاء ئس، او چاہ کننگ ئس کہ ناگمان آن اونا نظر تما کہ ہوٹل آن پیشن مونی فورسز آتا کیہی گاڈیک بریسہ سلیسر۔ گاڈی تیان فوج ئنا کارندہ غاک دڑنگسہ کریر و ہوٹل ءِ گھیڑ کریر، منہ کارندہ ہوٹل ئٹ پیہار و ہوٹل ئٹ ساڑی کل بندغ آتے پٹنگ بناء کریر۔ اسہ کارندہ اس اودے ہم پَٹا، ہراتم او ہیت کننگ نا کوشست کرے گڑا اسہ فوجی کارندہ اس اودے چپانٹ اس خلک ایلو کارندہ غاک ہمو ورنا تے پٹار و اوفتے خلنگ بناء کریر۔ اوفتے خلنگ و وس ئٹ کننگ کن منہ کارندہ پین مونا بسر۔ او ورنا تے خلیسہ پدان ہمو کرینگ و ہیت آتے بناء کریر کہ نم پاکستان ءِ پِرغنگ خوائرے، اوفتے گاڈی تیٹ شاغسہ راہی مسر۔ او چپانٹ ءِ جَلنگ آن پد اُرا نا پارہ غا راہی مس و مُچا کسر ئٹ اودے سفر نا وخت بس ئٹ مروک تدینی و ہوٹل ئٹ مروک ہیت آک یات بننگ ئسر، اودے اندن گمان مس کہ او چناک اینو ہم ہوغنگ ءُ۔ داسہ علی و اونا سنگت نا ہیت آک اودے بھاز یات بننگ ئسر۔ اودے سماء ہم تمتو کہ او اُرا ءِ امر سر مس۔ مُچا دے اندا اِرا تدینی اونا مِلی ٹی پیری کننگ ئسر۔ ننکان لُمہ پارے مڷ کنا خاچ سہب ئنا نے انٹرویو کن کوئٹہ غا ہنوئی ءِ، ای سہب ئنا بش مروٹ نیکن دعا کروٹ کہ خدا نے انٹرویو ئٹ سر سہب کے و نے نوکری رسینگے۔
اِرغ کننگ آن پد او تینا بسترہ غا لیٹا ولے تُغ اونا خن تیان بھاز مر ہناسس۔ او تینا انٹرویو چٹھی ءِ ہُریسہ ٹک خلنگ ئس کہ او ہرا نوکری کن خوشی ئٹ ٹیسٹ تریسہ بسس داسہ انٹرویو چٹھی ءِ خنیسہ اونا اُست خوائتوکہ کہ او دا نوکری ءِ کے۔ سماء اف ننکان ارا وخت اونا خنک اوار تمار و او تغ ئنا خمب ئٹ ہنا۔ سہب ئنا ہراتم اونا لُمہ اودے بش کرے تو ننکان ہُرے آ خاچنگ نا سوب او زور ئٹ بش مس۔ غسل کننگ آن پد نیرن کرے و ہِننگ کن تیار مس، اونا اُست خوائتوکہ ولے او ٹک خلنگ ئس کہ لُمہ ءِ انت ورندی ایتوٹ کہ ای انٹرویو کن انتئے ہِننگ افٹ۔ او اُست ئنا وے خوائنگ آن پد ہم بیگ ءِ ارفے گڑا لُمہ اودے بھاز نیک دعا کرے۔ اللہ نے سر سہب کے و نی اسہ بھلو افسر اس مریسہ بر۔ اُرا غان پیشتما و رکشہ ئٹ توس، بازار ئٹ دڑنگا بس ئنا راہی مننگ نا ودار کرے۔ منہ ساہت آن پد بس ہم راہی مس، کسر ئٹ ہرا شار و خلق بسکہ تو او فورسز آتا چوکی تے خناکہ، حالانکہ دا چوکیک مالو ہم ساڑی ئسر ولے داکان مالو او تینا اُست ئٹ اوفتا برخلاف داخس خار محسوس کتوکہ۔ اینو ہرا چوکی ءِ خناکہ یا فورس ئنا گاڑی ئسے آ اونا نظر تماکہ گڑا اودے ہمو نیاڑی نا چیہانٹ و چنا تا پوہاڑ و ہمو ورناک یات بسرہ و دافتیتون اوار اودے تینا بے شرفی نا ہمو چپانٹ ہم یات بسکہ۔
کوئٹہ ءِ سر مننگ آن پد او سیدھا علی آ ہنا انتئے کہ اونا انٹرویو مُسہ دے آن پد ئس، ننکان او علی تون مس تو او ہڑتوم آ تدینی تے علی ءِ پارے۔ علی پارے تہ کہ: ”سنگت بلوچستان نا کنڈ کنڈ ئٹ دن انگا سد آ تدینیک ہڑدے مونا بریرہ۔“ ننکان ہُرے اسکان او اندا سرحال آ ہیت کریر و خاچار۔ ارٹمیکو دے علی سوج کرے ”یار نا انٹرویو اراتم ءِ؟“ او پارے ”اِرا دے آن پد۔“ علی ہمو سوج ءِ دوارہ کرے ”نی راستی نا فوج ئٹ بھرتی مننگ خواسہ؟“ او پارے ”ہئو الّم ای فوج ئٹ بھرتی مننگ خواوہ ولے الّمی اف کہ پنجابی نا لشکر ئٹ بھرتی مریو۔“ علی گوڑینگا و اوڑان ہرفے ”گڑا ارا لشکر ئٹ بھرتی مننگ خواسہ؟“ او پارے ”تینا لشکر، بلوچ آتا لشکر بی ایل اے ٹی۔“ او گیشتر پارے کہ ”داڑکن نے کنے آ باور کروئی تمو، کنکن کسر پٹوئی تمو۔ ای انٹرویو تننگ خواپرہ و اُرا غا ہم ہِننگ خواپرہ انتئے کہ اگہ ای اُرا غا ہناٹ گڑا کنے بھاز آ سوج آتیتون مون تروئی تمو۔ یار نی پٹہ و بی ایل اے کیمپ آ ہِننگ ئٹ کنا کمک ءِ کر۔“ او اسہ ڈول ہیت کریسہ ئس۔ علی رازدار ڈول ئٹ پارے ”یار ای کس ءِ تپرہ۔“ او علی ءِ پارے ”انت اس کروئی نے کروئی ءِ ای اُرا غا پدا ہنپروٹ۔“ علی اودے پین ہچ پاتو۔ ارٹمیکو دے اونا انٹرویو ئس ولے او ہنتو او تینا انٹرویو چٹھی ءِ علی نا مونا ہَریسہ پارے ”ای داکان ہموتم اسکان ہنپروٹ ہراتم اسکان نی کنکن بی ایل اے اسکان کسر پٹیتنس۔“ علی بھاز پہہ کرے تہ ”یار ای کس ءِ تپرہ۔“ او پارے ”ای انداڑے نیتون مریسہ ودار کروٹ و ہچو جاگہ ئسے آ ہنوفٹ۔“
اودے علی تون مروک دہ دے تدینگاسس، اُرا غان ہم وار وار آ فون بسکہ و ہر وار اوڑان اندا سوج کننگاکہ کہ انٹرویو امر تسوس و اُرا غا اراتم بریسہ۔ او خاہوت نا ہیت آتے دانگ اینگ کریسہ پاریکہ زو اُرا غا بروٹ۔ یانزدہ میکو دے علی خواننگ آن پد پدا بس تو علی تون اونا سنگت ہم ئس۔ او سنگت تون سلام دعا آن پد تولیسہ ہیت بناء کرے، ہیت ہیت ئٹ اونا سنگت پارے ”یار علی پاریکہ کہ نی انٹرویو تننگ کن ہِنتنس و پاننگس کہ بی ایل اے ٹی اوار مریوہ۔“ او پارے ”ہئو۔“ پدا او دا سرحال آ بھاز ہُرے اسکان ہیت کریر کہ ”سنگت دا سفر بھاز مُرغن ءِ داٹی بھاز سوچ خلنگ آن پد گام تخوئی مریک و زند ئنا داخس بھلا فیصلہ ءِ نی جوزئی مریسہ کننگ کپیسہ، جوزہ آتیتون گڑا بندغ منہ دے سفر کننگ کیک اوٹی برجاء مزاجی متو گڑا او پِنک دم درینگک۔ بندغ ءِ ہچو حالیت اسیٹ کیفیت آتا گواچی مروئی اف۔ ایہن تو بندغ نا احساس ءِ بش کننگ کن اسہ تدینی اس بس ءِ ولے پدا ہم نے ہر پالو آ پام تروئی تمو۔ دا جنگ ئسے داٹی اسہ گام ئسے آ ہر گڑا مننگ کیک، اُراک بھس مریرہ تینا دوستخواک مُر مریرہ و ہمو تُغ تا پننگ نا بھیم مریک ہرافتے نن تینا جہان ئٹ خنوک مرینہ۔ داڑے دوست انگا سنگت آک مُر مریرہ ہرافتے نن تینٹ کوپہ تریسہ بش کینہ و تینا دو تیٹ مِش تیٹ کڈ کینہ اندا غم و بیر ئتون اوار پدان اسہ جنگ ئسے نا بناء ءِ کینہ۔ داڑے پِن، شہرت، دستار، کمانڈری، لیڈری نا غرض و جوفہ آن بیگانہ مریسہ ہر گام آ بے غرض بے بہا خذمت و جہد کروئی تمک۔ دا وخت نی جوزئی اُس و دا کاریم جوش ئٹ آخہ سار ئٹ کروئی مریک۔“
او پارے ”آخہ یار ای جوزئی افٹ ای بھاز ٹک خلکونٹ ای ہرا گام ءِ ارفنگ اُٹ اودے بھاز سوچنگ آن پد ارفنگ اُٹ و اینو کنے جُوان کنا راجی غلامی نا احساس ارے کاش اگہ نن مالو خنانہ تینے گڑا اینو نم ہڑتوم آتے دن باور کرفنگ نا گرج متوکہ۔“ او ہیت کریسہ ئس و اونا خیسن آ خن تیان خڑینک آک وہنگ ئسر، ہرا اونا پوشکن آ کلک آتیان وہیسہ تمارہ۔ او تینے ڈڈ کریسہ پارے ”سنگت انت نن اسہ راج اسہ ڈغار ئسے نا پِڈ آن ودی مریسہ پدان اسہ خاہوت یا ذات اسیٹ بندی مننگ کینہ؟ انت تینا تیان مُر مروک یا تینا خن تیٹ تینا تغ تے پِننگ آ خنوکا اولیکو بلوچ ای اُٹ؟ اگہ اسہ دوستخواہ ئسے نا جتائی کنے ژدغہ ژدغہ کیک گڑا انت اسہ سنگت ئسے نا کنکن دڑد کُننگ کنا زند ئنا مڈی مفک؟ انت اسہ بیوس بندغ ئسے ہرا تینا لُمہ و ایڑ تا خڑینک آتے خنیسہ احساس کرینے دوارہ اودے اندا بیوسی ٹی دڑد کُننگ الورے؟“ دا ہیت آتے بننگ آن پد اونا ہڑتوم آ سنگت آتیتون ہیت سلتو۔ داسہ ہر پارہ غا چپی تالان مسس۔ منہ ساہت آن پد اونا سنگت آک پاریر ”بر بازار آ کان۔“ ولے او تینا سنگت آتے نمن کریسہ پارے ”اینو کنے تنیا الیبو اینو تینے ٹی گم مننگ خواوہ۔ تینا ہنوک وخت ئٹ گم مننگ خواوہ تینا سیالی تے پدان سوگوْ کننگ کن بشخ چانٹ کننگ خواوہ، ای او چِٹ آتے ترندی ئٹ چِکنگ خواوہ ہرا اینو اسکان کنا نت تیٹ زمزیز مریسہ کنا کسر ءِ توریر۔“ ایلوزدے اونا سنگت اودے اسہ پین بندغ ئسے تون اوڑدہی کرفے، او بندغ اودے تینتون اوار کرے و سر ہلک داسہ او بولان نا پارہ غان ہِننگ ئسر۔ اِرا دے آن پد کیمپ ءِ سر مسر، اوڑے پوسکنا بندغ آک، پوسکن جاگہ و پوسکنا سوچ ئس۔ اوڑے سر مننگ تون اودے تینائی نا مارشت مس۔ کم و ود چِل بندغ نا دروشم تے ہُننگ آن پد اودے دیخس ہم دا احساس متو کہ ای بیگانہ بندغ تا نیام ئٹ تولوک اُٹ۔
اینو اودے مُسہ سال مننگ ئس۔ وخت وخت فون آ خاہوت تون حال حوال تہ مسکہ او مُسہ سال ئٹ اسُل شار آ ہم ہنتوسس۔ اندا نیام ئٹ مُر آن بروک کُبین آ توار اودے اونا خیال آتا جہان آن کشا۔ او ہُرا کہ ہمو کبین آ توار پین ترند مریسہ ءِ۔ او پہہ مس کہ دژمن نا جاسوس طیارہ ءِ۔ او مخابرہ ءِ ارفے و تینا سنگت آتے جاسوس طیارہ نا بننگ نا حوال تس۔