تربت آن زوراکی ئٹ بیگواہ کننگوک الندور بلیدہ نا ہندی جمیل محمد جان ءِ پاکستانی ڈھکوک ادارہ غاک سی ٹی ڈی نا دو ٹی تسنو۔
پن کروک ورنا ءِ 9 نومبر 2023 آ تینا اسہ پین سنگت شیران تون اوار زوراکی ئٹ بیگواہ کننگاسس ولے شیران بلوچ ءِ خدو سال ئنا ایسر ئٹی یلہ کننگاسس و جمیل محمدجان ءِ درو پاش کرسا سی ٹی ڈی نا دوٹی تننگانے ہراڑے اونا خاہوت اوڑتون اوڑدئی کرے۔
خیال ئٹ مرے کہ سی ٹی ڈی بلوچستان ئٹ داکان مُست کاروائی تیٹ کیہی بندغ آتے دزگیر کننگ نا دعویٰ کرینے ولے پدان ہمو بندغ آتا چاہنداری مُست آن فورسز آتا دو آن زوراکی ئٹ بیگواہ کننگوک بندغ آتا رد ئٹ مسنے۔
داکان بیدس سی ٹی ڈی نا کنڈ آن کیہی کاروائیک دروغ ئنا کاروائی پاننگانو ہرافتیٹ مُست آن بیگواہ کننگوک بندغ آتے کھسفنکانے۔
بلوچستان ئٹ زوراکی نا بیگواہی تا برخلاف کاریم کروک تنظیم وائس فار بلوچ مسنگ پرسنز نا وائس چیئرمین ماما قدیر بلوچ نا پاننگ ءِ کہ ڈھکوک ادارہ غاک سی ٹی ڈی ءِ اسپر نا وڑ کارمرز کرسا بے ڈوہ بندغ آتے بیگواہ و شہید کننگ ءُ۔
اندن خدو 9 مارچ آ حب ئنا علاقہ داروں ہوٹل نا خڑک اُرا سے آ چھاپہ خلنگ نا وختا پاکستانی لشکر نا دو آن زوراکی ئٹ بیگواہ کننگوک غلام قادر نا مار جاوید یلہ کننگانے۔