دا خڑینک آک
نوشت: سلمان حمل
براہوئی مٹ: زامران بلوچ
دی بلوچستان پوسٹ
بلوچستان ئٹی ایہن تو ہزار آتا کچ ئٹ حوال آک میڈیا نا زینت جوڑ مریرہ ولے وخت ئس ہندنو حوال ہم خواننگ کن رسینگک ہرا بندغ نا ضمیر ءِ سرفیرہ تخرہ۔
نم سوچنگ مرورے کہ دا نوشت بلکن فلاسفی نا قول ئسے آن، دانشور ئسے نا لوز آتیان یا اسہ کتاب ئسے آن ہلوک نوشت کروک مرو۔ گڑا ای نمے آن وختی بشخنداری کیوہ کہ دا او وڑ اف ہمر کہ نم سوچاسرے بلکن دا کنا ہمو احساس آکو ہرافتے ای لمہ آتا تموکا خڑینک آتے خنیسہ قلم بند کرینٹ۔ دا نوشت ئٹی نہ لوز گچین کرینٹ نئے کہ اسہ حوالہ اس ہیسنٹ بلکن سادہ تینا احساس آتے نمے اسکان سر کننگ نا کوشست کرینٹ۔
ہراتم بندغ نا تیوہ غا آسرہ، امیت و آسرہ آتیان باور بال کریسہ کائے گڑا یقین چاس نے او بندغ آتیا ترس بریک ہرا زندہ مریسہ ہم زند آن بے پام مریرہ۔ اینو ہراتم ذاکر جان نا لمہ سڑک آتیا زار زار ہوغنگ ءِ کس دا سرپد مف کہ او مار ئنا مُر مننگ آن وکارہ کریسہ ہوغک۔ انتئے کہ دا ہمو لمہ ءِ ہرا ذاکر آن بارو دلیرو راہشون ئس ودی کرے و راج اکن بشخا تہ۔ جی ہئو ہمو ذاکر نا ہیت مننگ ءِ ہرا بلوچ لمہ آتا خڑینک آتے پاک کرے و اوتا توار تون توار شاغیسہ گھام گھام آ اوفتیتون اوار سلیس۔ اینو ذاکر جان نا لمہ نزور اف بلکن اونا امیت اونا آسرہ ننے آن بش مسونے۔ اینو او ننا بیگانہ مننگ آن ننا بے پام مننگ آن ننا سرپد مننگ ئٹ بے سرپدی نا کوشست آتیا ہوغنگ ءِ۔ او ہوغنگ ءِ کہ ذاکر ہرا ہر وخت دا راج اکن سڑک آتیا برانز کریسہ کرے اینو ہمو ذاکر کن برانز کننگ کن کس تیار اف۔
او ننے آن سوج کننگ ءِ کہ اینو انتئے ذاکر نا وڑ ہزار آتا کچ ئٹ ورناک بیگواہ مریسہ دژمن نا تادی تے سگنگو ہندا خاطر کہ او دا چاگڑد تون اوار ئسر۔ او دا چاگڑد ئٹی ہر نا انصافی آ ہیت کریرہ، کوکار کریرہ۔ و پدا تینٹ لُمہ تینا سوج آتا ننے ورندی تننگ ءِ کہ ہائے ارمان اینو ہندا چاگڑد نا بندغ آک گُنگ مسنو او حق ئنا ہیت ءِ کننگ آن خلیرہ، کہ دن مف او ہم بیگواہ کننگر۔ دا خڑینک آک ہرا لمہ نا خنتیان پیشتمانو او اسہ شغان ئسے نا وڑ ءُ۔ ہرا لُمہ نا خنتیان پیشتمسہ ننے نیم گلاس دیر ئٹی ٹبیسہ کہنگ کن پاننگ ءُ۔ اگہ اینو نن زندہ اُن یا زندہ مننگ خوانہ گڑا ننا ہم ہندا چاگڑد آن تعلقداری ءِ نن دا چاگڑد نا اسہ دڑد و تکلیف ئسے آن بے تعلقدار مریسہ رہینگ کپنہ۔
لُمہ نا خنتیان خڑینک آک ہندا خاطر وہنگ ءُ کہ اوڑتون برانز ئٹی اینو ہنداخس بندغ اوار مروسر کہ لٹ خلنگ آ ہم ڈغار اسکان سر متوکہ۔ ولے اوڑتون اوار برانز ٹی بیرہ منہ بندغ ئسر ہرا دا ڈکھ ئٹی تینے تینٹ اوار تکنگ ئسر۔
ہمو ہمدرد آتیان بیدس پین کسس الو ہرا بندغی نا بنیات آ راجی بنیات آ دا برانز ٹی اوار مسکہ و تینا راجی فرض ءِ پورو کریکہ گڑا ہندا خاطران لمہ زار زار ہوغنگ ئٹی ئسک و چپی ئٹ سوج کننگ ئس کہ اینو ارانگ ئسر ہمو ادیب آک، ہمو شاعر آک ارانگ ئسر، ہمو استاد آک ارانگ ئسر، ہمو خواننداہ آک ارانگ ئسر، ہمو سیاست دان آک اینو ارانگ ئسر، ہمو بیروکریٹ آک اینو ارانگ ئسر، ہمو لبرل و دیمروی دوست آک اینو ارانگ ئسر ہمو ہرا بلوچستان نا ویل ءِ عدم تشدد ئٹ حل کروک آک ہراتم اسہ لمہ ئس نیام کسر آ وکارہ کریسہ ہوغنگ ئسک اودے دلاسہ تننگ کن ہم اسہ لمہ ئس و اسہ مسڑ ئس ساڑی ئس ہرا تینٹ ہمو دڑد آن گدرینگ ئسر۔
دا خڑینک آتا نہاد ءِ ہموفک ماریرہ ہرا دا خڑینک آتے خنانو۔ مُرو تغ ئٹ تغ کروکاک دا خڑینک آتا دریاب آن بچیسہ ارانگ ہنور۔
دا عدم تشدد نا منوک و سوشلسٹ آتے ارا دوشہ کنگسس، ہراتم اسہ لمہ ئسے اسہ ایڑ ئسے اسہ ایلم ئسے اسہ مسڑ ئسے گورنر ہاؤس اسکان سر مننگ کن پولیس نیام کسر آ توریسس۔
ارمان کہ اینو دا خڑینک آتا نہاد ءِ تننگ کن اسہ ذاکر ئس مروسس و ننا ضمیر آتے سُرفیسہ ننے دا برانز ئٹی اوار مننگ کن پاروسس و او زندان ئٹی ءِ۔
اینو لُمہ نا خڑینک آک ننے دا باور کرفیر کہ نن اشتماعی وڑ ئٹ راج ئسے نا حیثیت ئٹ تینا ذمہ واری تیان اخس بے پام مسونن۔ ننے بیرہ لوز آتا جہان ئٹ زندہ مننگ دوست ءِ۔ ننے او لمہ و ایڑ تا دڑد ئتون ہچو تعلقداری ئس اف ہرافتا خنتا نور آک نیام کسر آ ہرفنگار، خلنگار و بیگواہ کننگار۔
نن ٹی داسا او راجی فکر و بلوچیت سلتو کہ دا لمہ آتا دڑد ئٹی تینے اوار تکن و اوار مرین۔ ولے لمہ ای نے آن اسہ خواست ئس کیوہ کہ نی تینا دا خڑینک آتے رکھیس تخس کہ ہراتم نا دامون ہیمون ئٹ کس ئسے ہم دا احساس مسک و بے حسی ءِ ایسر کننگ کن وت کشی کرے گڑا نی دا خڑینک آتے اوفتے رکھنگ کن کاریم ئٹ ہتیس انتئے کہ نی ذاکر جان نا لمہ اُس۔