شہزاد بلوچ نا خاہوت نا پارہ غان زیارت نا شہید آتا ارٹمیکو سال دے آ ریفرنس اڈ تننگا دا وخت آ خاہوت آتیتون اوار ایلو بندغ آک ہم اوار مسر۔
تران کروک آک شہید آتے دروت ندر کریسہ پاریر کہ شہید شہزاد بلوچ 04 جون 2022 آ موسیٰ کالونی پولی ٹیکنک کالج آن خڑک تینا ایلو اِرا سنگت عتیق بلوچ و احمد بلوچ تون اوار سادہ پُچ بینوک فورسز کارندہ تا دو آن زوراکی ئٹ بیگواہی نا گواچی کننگاسس پدان 15 جولائی 2022 آ شہزاد بلوچ، و ڈاکٹر مختار ءِ پین نو بیگواہ بندغ تیتون اوار اسہ دروغ نا مونتس اسیٹ زیارت آن خڑک شہید کننگا۔
ریفرنس ئٹ اوار مروک آک تران کریسہ پاریر کہ ریاستی ادارہ غاک بلوچستان نا بے گناہ بلوچ آتے برمتہ کریسہ تینا بیداد جاہ تیٹ اذیت تریسہ اوفتا نیم کہوک جون تیٹ سم شلسہ اوفتے بیابان تیٹ خسرہ یا اوفتے بھاز اذیت تریسہ نیم زندہ حالیت ئٹ اِلیرہ۔
شہزاد بلوچ نا ایڑ تینا خیال آتا درشانی کریسہ پارے کہ ای قلات نا غٹ شہید آتا خاہوت و قلات نا ایلو نظریاتی خوانندہ مار و مسن تا منتوار اُٹ ہرا اینو زیارت نا شہید آتا ارٹمیکو سال دے ئنا ردئٹ اڈ تروک ریفرنس ئٹ اوار مسر، نمے خنیسہ اینو ای مارنگ اُٹ کہ نن یکہ افن نم غٹ ننتون اوار اُرے، شہزاد بیرہ اسہ اُرا ئسے نا مار نہ بلکن او بلوچ راج ئنا مار ئس۔ ببو نن کل اوار مریسہ سوغند کین کہ نن تینا شہید آتا رند آتیٹ ہنسہ بیگواہ بندغ تا توار جوڑ مرون۔
زیارت نا شہید آتا یات ئٹ شہید شہزاد نا خاہوت نا پارہ غان اوفتا ثواب کن قرآن خوانی ہم کننگا و ایسر ئٹ خیرات ہم کننگا۔