خضدار نا علاقہ گریشہ ئٹ بیگواہ بندغ تا خاہوت و بست و بند نا نیام ئٹ گپ و تران آن پد تولوک برانز ایسر کننگا۔
گپ و تران ئٹ پاننگا کہ ننا بندغ آتے آجو کننگہ اگہ ریاست تکک کہ اوفک ڈوہ اس کرینو گڑا اوفتے تینا جوڑ کروک عدالت آتیٹ ہتیر۔ ننا بندغ آک ہرا ادارہ تون ءُ ننے او ادارہ نا پِن ننا بندغ آتا ساہ نا رکھ ئنا ذمہ واری تننگہ۔
اے ڈی سی خضدار رحمت اللہ بلوچ نوشتئی دروشم ئٹ معاہدہ کرے کہ اگہ پنچ دے اسکان دا معاہدہ تیا عمل کننگتو گڑا دانا ذمہ وار بست و بند، گپ و تران کروک ٹولی خاص وڑئٹ اے ڈی سی مرو۔
ایسر ئٹ بندغ آک تینا ہیت آتے تخار و پاریر کہ اگہ پنچ دے ئٹ ننا بندغ آتے مونا ہتنگتو گڑا نن پدا کسر تیا برون تولون۔
یاتی مرے 18 جولائی آ گریشہ آن سلیم نا مار شاہ جان، ھیرجان نا مار گوہر دین، لال بخش نا مار مہم جان، لال بخش نا مار میار، عبدالرحمن نا مار محمد عارف، سبزو نا مار منیر تون اوار کیہی بندغ آتے بے قانودی ڈول ئٹ دزگیر کننگ آن پد نادرست ہند آ دننگاسس ہرانا برخلاف خاہوت آک برانز کننگ ئسر۔