سندھ ئنا علاقہ سیون شریف آن کوئٹہ نا و کراچی آن تربت نا ہندی اس و نوشکے آن مُسہ ورنا زوراکی ئٹ بیگواہ کننگانو۔
سیون شریف آن زوراکی ئٹ بیگواہ قدرت اللہ نا مار محمد جواد قمبرانی بلوچ نا اِلہ نا مار ئنا پاننگ ءِ کہ او تینا سنگت آتیتون سندھ آ چکر کن ہناسس۔ ہرا وڑ نن یخ انگا علاقہ تا بندغ آک یخ آتیٹی کانہ، گڑا کنا الہ مار ہم ہِنا ہراڑے 17 جنوری نا بیگہ نا وخت آ سیون شریف دربار آن سادہ پُچ بینوک بندغ آک اودے دزگیر کریسہ نادرست ہند آ دریر ہراڑان پد او بیگواہ ءِ۔
او پارے کہ اونا برمتہ نا بننگ آن پد نن ڈکھ ئنا گواچی اُن سندھ ئنا حکومت آن خواست کینہ کہ او جواد بلوچ نا آجوئی کن تینا کڑد ءِ سر ایتے۔
ایلو پارہ غان کیچ تمپ ئنا ہندی زبیر ءِ پاکستانی لشکر درو سہب ئنا ملیر جام گوٹ آن دزگیر کریسہ بیگواہ کرینے۔
اندن نوشکے آن عمر خان نا مار آصف بلوچ ءِ پاکستانی لشکر 4 جنوری 2025 آ سہب ئنا چار بجہ غا قاضی آباد نوشکے ٹی اوفتا اُرا غان زوراکی ئٹ بیگواہ کرینے۔