دوشمبے نا دے بلوچ یکجہتی کمیٹی جھالاوان ریجن نا پارہ غان نال ئٹ شاہ جان بلوچ نا خون، ناصر کریم بلوچ آ سم کاری، و بی ایس او نا مسکوہی چیئرمین زاہد بلوچ نا زوراکی ئٹ بیگواہی نا یانزدہ سال پورا مننگ نا برخلاف برانز کننگا ہراٹی ہزار آتا کچ ئٹ زالبول، پیر و ورنا اوار ئسر۔ نال نا اُلس ریاستی زوراکی نا برخلاف ترند ڈکھ و سوختئی نا درشانی ءِ کریسہ پارے کہ شاہ جان کرد نا خون بلوچ زنک ایسری نا لڑ ءِ، ریاست نا دا وڑک سگ آن پیشن ءُ۔
اُلس نا مُچی آن ہیت کریسہ بلوچ یکجہتی کمیٹی نا راہشون ڈاکٹر ماہ رنگ بلوچ پارے کہ زندہ انگا راج آتے ایسر کننگ مفک، اینو نا ڈغار نہار آتا دوٹی ءِ و بلوچ بندغ آتے بے دڑدی ئٹ خلنگسہ ءِ۔
او پارے کہ ننا لمہ آک سال آتیان تینا بیگواہ انگا چنا تا ودار ئٹ خڑینک وہیفسہ ءُ ولے اوفک باہ ئنا ارمان ہم کپسہ، دا دڑد و تکلیف آتے ننا بندغ آ سگِسہ ءُ، بلوچ نا جدوجہد انصاف کن ءِ۔
او پارے کہ نن اسہ ڈغار ئسے آ ہم کوزہ کروک افن ہرا پیشن آن بریرہ لمہ آتا چناتے پُلرہ ای دا زوراکی نا برخلاف اُٹ، او پارے کہ چیئرمین زاہد یانزدہ سال آن بلوچ مننگ نا سزا نا گواچی ءِ، بلوچ راج آ مروک ریاستی زوراکی تون ننے اسٹ مریسہ مون تروئی تمو۔ اینو ہزار آتا کچ بلوچ زالبول آک نیمہ جنوزانی نا زند ءِ گدارینگ ءُ۔ غلامی ئٹ زند دڑدناک مریک اینو پیشن آن کس اس بریک ننا بندغ آتے لمہ ، ایڑ تا مون آ خلیک کائک۔ و پدا نمے ہیت کننگ نا ہم حق ءِ تفک۔
او پارے کہ نن دا ریاست آن رحم ئنا اومیت ءِ کپنہ اینو او پاریسہ ءِ کہ بلوچ نا اُرا اُرا ئٹ آپریشن کبو، ریاست بلوچ راج ئنا ایسر کننگ نا تیاری کریسہ ءِ۔ اسکان بلوچ اسٹ مریسہ غلامی نا لعنت نا برخلاف جدوجہد کروف اندا وڑ خلنگسہ کرو۔