بلوچستان نا دریابی شار گوادر ٹی پاکستانی لشکر اسہ بندغ ئسے دزگیر کننگ آن گڈ بیگواہ کرے، مستونگ آن تعلق تخوک مسہ ورنا چار سال آن گڈ تینا اُراتیا پدا بسونو۔
ہندی ذرائع نا ردئٹ گوادر نا ٹی ٹی سی کالونی نا رہینگوک عبدالحمید ولد امام بخش ءِ 5 اگست آ اونا اُراغان پاکستانی لشکر دزگیر کرے۔ ہراڑان گڈ اونا ہچو احوال ئس بتو و نئے کہ اونا دزگیری نا سرکاری وڑ ئٹ پک کننگانے ۔
بلوچستان ٹی زوراکی ئٹ بیگواہی تا تدینیک اسہ وخت ئسے آن برجاء ءُ، ہرافتیا بندغی حق آتا ہندی و پیشن ملکی تنظیم آک وار وار خلیس نا اظہار کریسہ مسونو ۔
ایلو پارہ غان مستونگ نا تحصیل کردگاپ آن تعلق تخوک مسہ ورنا زاکر احمد سرپرہ ، راشد احمد سرپرہ و جاوید احمد سرپرہ چھار سال نا مرغنا بیگواہی نا وخت آن گڈ آجو مریسہ تینا اراتیا رسینگار۔