افغانستان پاکستان آ افغان صوبہ پکتیکا ئٹ جلہو نا وخت افغان گوازی گر آتا کہنگ نا دوبہ ءِ خلیسہ بروک آ توہ پاکستان ئٹ شیڈول آن مسہ فریقی سیریز آن دو ارفنگ نا پڑو ءِ کرینے۔
افغان کرکٹ بورڈ نا بیان ئٹ پاننگانے کہ کرکٹ بورڈ “صوبہ پکتیکا نا ضلع ارکون آن تعلقداری تخوک دلیر آ گوازی گر آتا بھیم بش کروک کہنگ آ تینا کڑمبی ئٹ غم و ڈکھ ئنا درشانی ءِ کیک، ہرافتے اینو شام ئنا پاکستانی جلہو ئٹ ٹک کننگا۔
پاکستان نا حکومت و فوج ئنا پارہ غان دا بابت ئٹ ہچو بیان اس مون آ بتنے۔
افغان کرکٹ بورڈ نا دعویٰ ءِ کہ دا تدینی ئٹ ارکون آن تعلقداری تخوک مُسہ گوازی گر کبیر، صبغت اللہ و ہارون تون اوار پنچ بندغ مرگ ئنا گواچی ہندن ہفت ٹپی مسور۔
بورڈ نا پاننگ ءِ کہ گوازی گر داکان مالو ہم اسہ سنگتی کرکٹ میچ اسیٹ اواری کن صوبہ پکتیکا نا دارالحکومت شرانہ غا ہناسس و ارکون دوارہ بننگ آن گڈ اوفتے اسہ مچی ئسے نا ڈول ٹک کننگا۔
افغانستان ءِ بروک آ توہ نومبر ئٹ مسہ فریقی ٹی ٹوئنٹی سیریز ئٹ اواری کن پاکستان آ بروئی ئس، دا سیریز ئٹ مہماندار پاکستان آن بیدس سری لنکا نا کرکٹ ٹیم ءِ ہم اوار مروئی ئس۔
افغان کرکٹ ٹیم نا کپتان راشد خان و مسکوہی کپتان محمد نبی تون اوار ایلو گوازی گر آک ہم جلہو نا مذمت ءِ کریر۔