فورتھ شیڈول – ٹی بی پی سرگپ
بلوچستان ئٹ سیاسی مزاحمتی تحریک ءِ توننگ کن پاکستان نا مقتدر طاغت آک جتا پالیسی تیا کاریم کننگ ءُ۔ سیاسی کاریم تے طاغت نا زور آ توننگ نا کوشست آک برجاء ءُ، متنازع عدالتی فیصلہ تا ذریعت ئٹ بلوچ سیاسی قیادت ءِ بندی کریسہ ءُ، و داسہ فورتھ شیڈول نا قانود نا ردئٹ بلوچ سیاسی باسک آتا بنداوی حق آک لتاڑنگسہ ءُ۔
قانودی خواست آتے پورا کننگ آن بیدس بیرہ اسہ ہفتہ ٹی شست آن زیات زوراکی نا بیگواہی تیکن متحرک بندغ و جتا سیاسی جماعت آتا باسک آتا پِنک فورتھ شیڈول ئٹ اوار کننگانو۔ حکومت نا دن انگا تدینیک بلوچستان نا مالو آن خراب سیاسی حالیت آتے گیشتر خراب کننگ نا سوب جوڑ مرور۔ بلوچ سیاسی باسک آتے فورتھ شیڈول ئٹ اوار کریسہ انسداد دہشتگردی نا قانود آتے مزاحمتی سیاست نا برخلاف کاریم ئٹ ہتسہ ریاستی ادارہ غاک بیدس آئینی گام ارفنگ نا رجحان ءِ ودفنگ ءُ۔
سیاسی باسک آتا زوراکی ئٹ بیگواہی، ریاستی تادی، ای سی ایل و فورتھ شیڈول ئٹ پِن تے اوار کننگ کون آ گام تیان بلوچستان ئٹ مزاحمتی سیاست ایسر کننگ مفک۔ بلوچ تحریک ءِ السی مخ تفی دوئی ءِ و سیاسی مزاحمت نا روتہ غاک مخلوق ئٹ سوگو ءُ۔ السی تحریک آتے طاغت نا زور آ ایسر کننگ نا پالیسیک تیوہ جہان ئٹ ہچبر سرسہب متنو، و بلوچستان ئٹ ہم ریاستی مقتدر نا دا پالیسیک نتیجہ تروک پاش مروفس۔
بلوچستان ئٹ پاکستان پیپلز پارٹی نا مسلط کروک حکومت نا وختی، متنازع و بے زمہ وار آ فیصلہ غاک بلوچ سیاسی باسک آتا لپڑزہ مفروک عزم ءِ پرغنگ ئٹ بے سہب مرور۔ واہم پیپلز پارٹی نا حکومت نا دن انگا گام تیان سیاست آ منفی زیم تمو و بلوچستان ئٹ السی بے جاراتی گیشتر ودو۔