زوراکی ئٹ بیگواہ بلوچ زالبول آک – ٹی بی پی سرگپ
بلوچستان ئٹ ریاستی تادی نا تدینیک دے پہ دے آن گیشتر ترند مریسہ ءُ۔ بلوچ راہشون ڈاکٹر ماہ رنگ بلوچ سنگت آتیتون اوار کیہی توہ تیان بندی ءِ و بلوچ خوانندہ ماہ جبین بلوچ نا زوراکی نا بیگواہی ءِ شش توہ تدینگانے۔ حب چوکی نا شار آن آواران نا ہندی چنک سن آ مسڑ نسرینہ بلوچ ءِ اونا اُرا غان اسہ ہفتہ اس مالو زوراکی ئٹ بیگواہ کننگا، و ہائبرڈ حکومت مزاحمتی سیاست ئٹ متحرک بلوچ زالبول تا پِن تے فورتھ شیڈول ئٹ اوار کریسہ اوفتا کاریم تیا رکھ خلنگ ءِ۔
بلوچستان ئٹ ریاستی تادی نا برخلاف کل آتیان زیات متحرک طاغت زالبول آک ءُ۔ ورنا غا سیاسی جہدکار آتا دزگیر ئٹ کسفنگ و ہزار آتا کچ ئٹ زوراکی نا بیگواہی، و ریاستی رکھ آتیان پد ہم بلوچستان ئٹ السی مزاحمتی سیاست ءِ متحرک کننگ ئٹ بلوچ زالبول آک بھلو کڑد اس سر تسنو۔ پاکستان نا مقتدر ادارہ غاک بلوچ زالبول تا اندا راجی و سیاسی کڑد ءِ پرغنگ کن نہ بیرہ اوفتے بندی کننگ ءُ بلکن اوفتا زوراکی نا بیگواہی آن ہم پد مننگ افس۔
بلوچ زالبول تا جہد بلوچ راج ءِ سیاسی دروشم ئٹ سوگو کننگ ءِ و ریاستی تادی ءِ جہان نا مونا پاش ہم کننگ ءِ۔ یورپی یونین نا سفیر ریمونڈاس کاروبلس نا پاکستان کن جی ایس پی پلس اسکیم ئٹ زوراکی نا بیگواہی تے پامداری ٹی اوار کننگ نا پڑو، و دا بابت یورپی یونین نا پاکستان تون وار وار خُلیس نا درشانی، دا ہیت ءِ پاش کیک کہ جہان پاکستان ئٹ زوراکی نا بیگواہی تا بھلا ویل آن آگاہ ءِ، و دا آگاہی بلوچ زالبول تا مرغنا و برجاء غا جہد ئنا سوب آن مننگ کرینے۔
پاکستان ئٹ قانود نا بڑزی نا جاگہ غا ریاستی مقتدرہ نا حکمرانی ٹہفوک ءِ، ہرا طاغت نا زور آ محکوم تپہ و راج آتیا تینا فیصلہ تے چَٹی کننگ ءِ۔ پاکستان نا ہائبرڈ نظام حکومت بلوچ زالبول تا جہد آن لپڑزہ ءِ و بلوچ مزاحمتی سیاست نا کسر ءِ توننگ کن زالبول تا زوراکی نا بیگواہی ءِ اسہ سیاسی سلہہ ئسے نا دروشم ئٹ کاریم ئٹ ہتنگ ءِ۔