بلوچ یکجہتی کمیٹی اسہ بیان اسیٹی پارینے کہ 29 نومبر 2025 پاکستانی لشکر کیچ ئنا علاقہ ہوشاپ ئٹ بے ڈوہ شاری تے ٹک کرے۔ ہندی حوال کار آتا رد ئٹ پاکستانی لشکر کیہی مارٹر گولہ خلک ہرا اسہ خڑک ئنا اُرا اسیٹی ہنار تمار۔ تراک آتا سوب اُرا نا اسہ بشخ اس بھس مس و کیہی چناک بھاز ٹپی مسر، ہرافتیٹی یانزدہ سال نا دردانگ، دوانزدہ سال نا طاہرہ، ہژدہ سال نا آسیہ و سینزدہ سال نا یاسمین اوار ءُ۔
ہندی بندغ آتا رد ئٹ یاسمین و طاہرہ بھاز ٹپی مسر، ہرافتیٹی نت و مُخ ئنا ہڈ ئنا تل کننگ تون اوار مارٹر نا لگوک آ ٹپ آک ہم اوار ءُ۔ ہڑتوم آتے ہلہلہی بنائی جانجوڑی کمک آن گڈ کراچی آ رادہ کننگا، ہراڑے یاسمین ٹپ آتان بے سگ مریسہ مرگ ئنا گواچی مس، ہندن ایلو ٹپی چناتے نیامی درجہ نا ٹپ آتیکن کن جانجوڑی آسراتی تننگا۔
بی وائی سی پارے کہ دا جلہو ریاستی بیدادی نا ہمو تالان و برجا لڑ ئنا بشخ ئسے ہرا نا شکایست ءِ ہندی آبادی سال آتیان کریسہ ءِ۔ شاری آبادی، خاص وڑ ئٹ زالبول و چنا، خن تر طاغت نا کاریم ئٹ ہتنگ، اشتماعی سزا، گولہ باری و تڑی تا کل آن زیات ٹک مریسہ بسونو۔ دننگا برجا تدینیک ڈیھ ئٹ خُلیس، عدم استحکام و ترند ذہنی صدمہ آتیٹ ودُکی کرینے۔
بلوچ یکجہتی کمیٹی اقوام متحدہ نا بندغی حق آتا کونسل و جہانی بندغی حق آتا تنظیم آتون اوار ایمنسٹی انٹرنیشنل و ہیمون رائٹس واچ، آن خواست کرینے کہ او دا ترند برخلافی و بلوچستان ئٹ شاری تا برخلاف برجا ناروا سلوک کن دمدستی نوٹس ہلے۔