بلوچستان نا جتا انگا ہند آتیان پاکستانی لشکر نا دو آن پین پنچ بندغ زوراکی ئٹ بیگواہ مسور، ہندن چار بندغ یلہ مریسہ تینا اُرا تے سر مسور۔
شابیتی حوال آتا رد ئٹ، ضلع کیچ نا بنجائی شار تربت نا شہید فدا چوک آن برجا سال 27 نومبر آ پاکستانی لشکر دانش ولد نیک بخت ءِ دزگیر کریسہ نادرست ہند آ سر کریر۔
ہندا وڑ برجا سال 21 نومبر ئٹ مستونگ آن پاکستانی لشکر ہندی پولیس کارندہ عبیداللہ ولد عبدالنبی و محمد شفا ولد سفر خان ءِ دزگیر کریسہ زوراکی ئٹ بیگواہ کریر۔
ہندا نیام ئٹ، پنجگور ئٹ 20 نومبر ئٹ پروم کراس نا ہند آ سیدان نا اِرا ورنا نوید جان ولد عبدالغنی و ثناءاللہ ولد میا ءِ پاکستانی لشکر دزگیر کننگ آن گڈ زوراکی ئٹ بیگواہ کرے۔ زوراکی ئٹ بیگواہ کروک ورنا تا بابت ئٹ دسکان ہچو حوال اس رسینگ تنے۔
ارٹمی پارہ غان، پاکستانی لشکر نا دو تیان کوہلو آن 25 اگست آ زوراکی ئٹ بیگواہ مروک خالق مولابخش، و پنجگور آن 7 نومبر آ بیگواہ مروک حاجی شعیب ولد واحد بخش، خاران آن حاجی محمد حسین ہندن ناصر آباد کیچ آن جبران احمد یلہ مریسہ تینا اُرا تے سر مسور۔