بلوچستان پریوینشن ڈیٹینشن اینڈ ریڈیکلائزیشن رولز 2025 – ٹی بی پی سرگپ
بلوچستان ئٹی اقتدار ئٹ تولوک جماعت پاکستان پیپلز پارٹی نا حکومت نا متنازع وزیر اعلیٰ سرفراز بگٹی نا سروکی ٹی صوبائی کابینہ نا مجلس مس۔ دا مجلس ئٹ زوراکی نا بیگواہی تے قانودی دروشم تننگ و زوراکی ئٹ بیگواہ بندغ آتے دزگیری بنجاہ تیٹ تخنگ نا متنازع فیصلہ ہلنگا، ہراڑے اوفتیان کاؤنٹر ٹیررازم ڈیپارٹمنٹ نا پولیس افسر آتا خیالداری ٹی سر و سوج کننگو۔
پاکستان نا مقتدر طاغت آتا کمک ئٹ ٹہفوک حکومت نا پارہ غان بلوچستان پریوینشن ڈیٹینشن اینڈ ریڈیکلائزیشن رولز 2025 نا موکل تننگ، بلوچستان ئٹ زوراکی نا بیگواہی تے قانودی دروشم تننگ نا اسہ کوشست ئسے تاکہ زوراکی نا بیگواہی و ریاستی تادی تا برخلاف بش مروکا تحریک ایسر کننگ مرے و زوراکی ئٹ بیگواہ بندغ تا خاہوت آتا توار چپ کرفنگ مرے۔ زوراکی ئٹ بیگواہ بندغ آتے شکبر پِن کننگ و اوفتے عدالت آتیٹ ہتنگ نا جاگہ غا دزگیری بنجاہ تیٹ سر و سوج کننگ، پاکستان نا راہبند ئٹ تروک بندغی حق آتیان ہم چپ ءِ۔
بلوچستان آ چَٹی کروک سرفراز بگٹی نا حکومت اولیکو دے آن زوراکی نا بیگواہی کون آ بھلا بندغی ویل ءِ دروغ پاریسہ بسنے و زوراکی نا بیگواہی تا بابت ریاستی بیانیہ ءِ تالان کننگ ئٹ کل آن مونا مسنے۔ بلوچستان ئٹ سیاسی جہدکار آتا زوراکی نا بیگواہی تے دروغ پاننگ ممکن اف، اقوام متحدہ نا بندغی حق آتا ادارہ، ایمنسٹی انٹرنیشنل، ہیومن رائٹس کمیشن پاکستان و ایلو ادارہ غاک بلوچستان ئٹی زوراکی نا بیگواہی تا ویل ءِ بھاز وار ارفینو و پاکستان نا مقتدر طاغت آتے و حکومت ءِ دا بھلا بندغی ویل ءِ ایسر کننگ نا پاریسہ بسنو۔
بلوچستان حکومت نا اسہ پارہ غان زوراکی نا بیگواہی تے رد کننگ و ایلو پارہ غان پریوینشن ڈیٹینشن اینڈ ریڈیکلائزیشن رولز آتا بابت فیصلہ، دا ہیت ئنا شاہدی ءِ کہ بلوچستان ئٹ زوراکی نا بیگواہی تیٹ ریاستی ادارہ غاک اوار ءُ۔ بلوچستان پریوینشن ڈیٹینشن اینڈ ریڈیکلائزیشن رولز آتا منظوری ریاستی ادارہ تے سیاسی جہدکار آتے زوراکی ئٹ بیگواہ کننگ نا تیوہ آزادی تننگ نا برابر ءِ۔ زوراکی نا بیگواہی تے ایسر کننگ نا جاگہ غا اوفتے قانودی دروشم تننگ آن دا ویل گیشتر بھلن مرو۔ زوراکی نا بیگواہیک ہرا ہم دروشم ئٹ مریر، اوفک بیدس آئینی و بندغی حق آتا ترند لتاڑ ءُ۔ طاغت نا زور آ زوراکی نا بیگواہی تے قانودی دروشم تننگ تو مننگ کیک ولے اوفتا برخلاف بش مروکا توار تے چپ کرفنگ مننگ کپک۔