فوجی وردی بینوک کوپہ غاتیا توفک آک شاغوک یسما بلوچ و او نا ارے وسیم کیمرہ نا پارہ غا اریسہ بشخندہ کریسہ ءُ اوفتا دا عکس پاکستان نا برخلاف جنگ کروک سلہہ بند ٹولی نا پارہ غان ہمو وخت شینک کننگا ہراتم ہڑتوم آک تینا ایسری مشن ءِ جندندر جلہو ئٹ ایسر کریر۔
اوفک ایسری سنگر آ سلنگ آن مُست اوار زند تدیفیر، بلوچ لبریشن آرمی (بی ایل اے) نا پارہ غان دا عکس صحافی تے تننگا و ہرا راجی حوالکاری تلہ غا پیری کریسہ کرے۔
دا عکس ہمو نیم درزن عکس و زند نوشت آتیٹ اوار ئس ہرافتا یکدم پٹ و پول مننگ کتو، ولے چمشانک شاغوک آتا رد ئٹ مڈی آن پُر پاکستان نا بست و بند ئٹ بلوچستان ئٹ عسکریت پسند آتا پارہ غان تینا تحریک نا کش ءِ پاش کننگ نا اسہ کوشست ئسے۔
پاکستان نا بست و بند ئٹ کل آن بھلا ولے غریب انگا تپہ ئٹ تدوک سال سلہہ بند جلہو آک ریکارڈ ءِ پرغار، ہراڑان ڈٹ بند بھلو کچ ئسے آ سرمایہ کاری کروک چین و امریکہ نا است خواہیک بھیم ئٹ تمانو۔
پاکستان وزیرِ داخلہ طلال چوہدری پارینے کہ زالبول آتا ودوک آ کچ آزاتی خواہوک سال آتیا تالان جدوجہد ہرا نا مسخت زیات خودمختاری و مڈی و اہم معدنیات ئٹ بھلو بشخ ئسے بھرتی تیٹ ودکی کننگ ءِ۔
طلال چوہدری پارینے کہ زالبول آتا اواری آن اوفتے پِن و وس رسینگک، و دا تینے غا دا زہم ءِ الیرہ کہ پاکستان نا برخلاف جنگ داسا اوفتا اُرا تے اسکان سر مسونے۔
او پارے کہ پاکستان راجی حوالکاری تلہ آتون اوار آن لائن بھرتی تا ویل ءِ ارفینے۔
بھلن سرکاری افسر حمزہ شفاعت رائٹرز ءِ پارے کہ جنوری ئٹ مروک آ دا تنظیم نا کل آن بھلا جلہو نا لڑ ئٹ 58 بندغ خلنگار و صوبہ کم و ود شل مس، ہراٹی شش زالبول آن مُسٹ جندندر بمبار ئسر۔
ریکارڈ نا رد ئٹ داکان مالو بی ایل اے نا پارہ غان اشتماعی وڑ آ پنچ زالبول جندندر جلہوکار ئسر، ہراٹی 2022 نا اولیکو جلہو ہم اوار ءِ، ہندن تدوک مچٹ توہ ئٹ پین گمانی زالبول جلہوکار کاؤنٹر ٹیررازم کاروائی تیٹ دزگیر کننگ نا دعویٰ کرینے۔
کوالخواہ تا رد ئٹ بی ایل اے ئٹ اوار زالبول آتا کچ مچٹ ءِ، چمشانک شاغوک آتا پاننگ ءِ کہ دا بھرتیک بلوچ آبادی ئٹ دا ٹولی ءِ مننگ نا نشاندہی ءِ۔
جاندمی ایشیاء ئٹ سلہہ بند مِر تس نا ہند و تدینی نا ڈیٹا پروجیکٹ نا رکن چمشانک پرل پانڈیا نا رد ئٹ دا شورش داسا روایتی وڑ آ نرینہ آتا قبائلی و سرداری ڈھانچہ آتیان پیشتمسہ تالان انگا چاگڑدی تپہ آتیا سر مسونے۔
“تیوہ غاتیان ترند آ تنظیم”
زالبول آتا اواری اسہ ہندنو توار ئسے ودفنگ ءِ ہرا نا بابت ئٹ پاکستانی فوج نا پاننگ ءِ کہ او افغانستان ئٹ امریکی ہورکی آن گڈ اوڑے رہینگوک آ سِلاہ تا بھلا مڈی اسکان سر ہلیسہ تینا لائخی ءِ گیشتر کرینے۔
سنگاپور نا نین یانگ ٹیکنالوجی یونیورسٹی ئٹ شورش و عسکریت آ پٹ و پول کروک آ عبدالباسط پارینے کہ جاندمی ایشیاء ئٹ اینو بی ایل اے کل آن زیات سوگو و ترند آ سلہہ بند ٹولی ءِ۔
او پارے کہ ٹولی ڈرون آتے کاریم ئٹ ہتیسہ فوجی سُر و پُر و نزور ہند آتے ٹک کیک، و فروری 2025 ئٹ چار سد آن زیات مسافر آتون اوار جعفر ایکسپریس ءِ برمتہ کننگ نا وخت سیٹلائٹ کمیونیکیشن کاریم ئٹ ہتنگاسس۔
“جلہو آتا تزویراتی ارتقا”
کم و ود اسہ ہفتہ اس برجا مروک جھڑپ آتیٹ ہرا دو سد و شانزدہ عسکریت پسند آتے خلنگ نا دعویٰ کننگا اوفتان خننگوک آ مڈی ئٹ گرنیڈ لانچر آن ہلیس درزن ئسے آن زیات ایم-16 و ایم-14 رائفل اوار ئسر۔
رائٹرز دا ہیت ئنا پٹ و پول ءِ کننگ کتو کہ بی ایل اے نا جلہو آتیٹ کاریم ئٹ ہتوکا پوسکن آ سِلاک گواچن ئٹ امریکی ساختہ ئسر یا اسہ ہین وسیلہ اسیٹ بسوسر۔
دا نوشت ءِ جہانی احوالکار ادارہ رائٹرز علاقائی و جہانی چمشانک شاغوک آتا چمشانک آتیا انگریزی ئٹ شینک کرینے ہرادے دی بلوچستان پوسٹ تینا خوانوک آتیکن براہوئی ئٹ مون آ ہیسونے۔