بلوچستان نا ساحلی شار گوادر ئٹ اسہ ورنا ئسے نادرست بندغ آک سم کاری کریسہ کسفیر۔ ہندی حوالکار آتا رد ئٹ کہوک ورنا داکان مالو زوراکی ئٹ بیگواہی نا گواچی ہم مسوسس۔
حوال آتا رد ئٹ ضلع کیچ ئنا علاقہ دشت شولی آن تعلقداری تخوک کمال ولد حاجی داد محمد ءِ پنچ شمبے نا دے جیونی آن خڑک ہمو وخت سم کاری نا گواچی کریر ہراتم او کنٹانی ہور آن گوادر نا پارہ غا ہننگ ئس۔ خن خنوک شاہد آتا رد ئٹ جلہوکار آک اسہ گاڑی اسیٹی ئسر و سم کاری آن گڈ نرار۔
ہندی حوالکار آتا پاننگ ءِ کہ سم کاری نا سوب آن کمال ہمو وخت کسک۔ علاقائی حوالکار آتا دعویٰ ءِ کہ ساڑی آ جلہو ئٹ بندغ آتا تعلقداری اسہ سرکاری مخ تف سلہہ بند ٹولی ئسے آن ءِ، ہرادے ہندی تلہ غا “ڈیتھ اسکواڈ” پاننگک۔
بلوچستان ئٹ راج دوست مخلوق و بندغی حق آتا تنظیم آک دننگا سلہہ بند ٹولی تا وجود نا دوبہ ءِ خلیسہ کرینو۔ ہرافتا بیوگواہ بندغ و ٹارگٹ کلنگ نا تدینی تیٹ اوار مننگ نا دعویٰ مریسہ کرینے۔
خاہوت نا حوال آتا رد ئٹ کمال بلوچ ءِ اکتوبر 2024 ئٹ زوراکی ئٹ بیگواہ کننگاس و او کم و ود اِرا توہ اسکان بیگواہ مسوسس، ہراڑان گڈ اودے یلہ کننگاسس۔
یلہ مننگ آن گڈ، ہراتم او گوادر آ اسہ پیشی ئسے نا سوب عدالت آ ہننگ ئس، گڑا فقیر کالونی نا علاقہ ئٹ اوڑا سم کاری کننگا، ہرا نا نتیجہ ئٹ او ٹپی مسوسس۔ دا جلہو آن گڈ ہم اُرا والاک خلیس نا درشانی کریسر۔