بلوچستان نا جتا انگا علاقہ کولواہ و نوشکی آن پاکستانی لشکر نوہ بندغ ءِ زوراکی ئٹ بیگواہ کرے۔
کولواہ نا علاقہ آشال آن پاکستانی لشکر اِرا ایلم ءِ جتا انگا وخت آتیٹ زوراکی ئٹ بیگواہ کرے۔
شابیتی حوال آتا رد ئٹ کیچ نا علاقہ کولواہ آشال آن دوآنزدہ فروری نا نن دو بجہ غا پاکستانی لشکر اسہ ہژدہ سال ئنا ورنا اعجاز بلوچ ولد عبدالغفور ءِ او نا اُراغان ارفسہ بیگواہ کرے۔
اندن پانزدہ فروری نا نن اعجاز بلوچ نا بھلا ایلم نواز بلوچ ولد عبدالغفور ءِ تربت آن کولواہ غا ہننگ ئٹ لوکل گاڑی آن دڑفسہ زوراکی ئٹ بیگواہ کننگا۔
نوشکی آن پاکستانی لشکر جتا انگا وخت آتیٹ ہفت بندغ ءِ زوراکی ئٹ بیگواہ کرے۔
نوشکی نا علاقہ قاضی آباد آن تعلقداری تخوک عبدالقدیر بلوچ ءِ سی جنوری آ پیشیم نا وخت کم و ود سئے بجہ غا کوئٹہ نا علاقہ لیاقت پارک آن پاکستانی لشکر دزگیر کریسہ نادرست ہند آ سر کرے۔
حوالکار آتا رد ئٹ عبدالقدیر بلوچ ولد ذوالفقار بلوچ ڈیزل پمپ اس چلفنگ نا کاریم ءِ کیک۔ او تینا کاروباری کاریم تا رد ئٹ کوئٹہ غا بسوسس ہراڑے اودے دزگیر کننگا۔
اندن ظفر اللّٰہ ولد عمر شاہ ہند قاضی آباد، محمود ولد حاجی نور احمد ہند کلی بدل کاریز ءِ شش فروری آ اوفتا اُرا تیا چھاپہ خلنگ نا وخت زوراکی ئٹ بیگواہ کننگا۔
خوانندہ عبدالحق ولد غلام نبی ہند کلی جمال آباد، خوانندہ کامران بلوچ ولد حاجی محمد حسن ہند کلی جمال آباد ءِ یانزدہ فروری نا نن اوفتا اُرا تیان زوراکی ئٹ بیگواہ کننگا۔
ہندن شاہ زمان ولد عبداللہ ہند کلی جمال آباد، نصیر احمد ولد عبداللہ ہند کلی جمال آباد ءِ دوآنزدہ فروری نا نن اوفتا اُرا تیا چھاپہ خلنگ نا وخت زوراکی ئٹ بیگواہ کننگا۔