بلوچستان نا ضلع نوشکی ئٹ پاکستانی لشکر اسہ پین اُرا اس بُھس کرے، دا نیام ئٹ زالبول و چنا تون اوار ایلو بندغ تے بیدادی نا گواچی کریسہ نزیر احمد بادینی ءِ زوراکی ئٹ بیگواہی نا گواچی کننگا۔
نوشکی نا علاقہ کلی شریف خان ئٹ پاکستانی لشکر نزیر احمد بادینی نا اُرا ءِ بھلا مشین تیٹ بُھس کرے۔ نزیر احمد بادینی پنی آ شاعر ابصار بلوچ نا باوہ ءِ۔
علاقہ نا بندغ آتا رد ئٹ دا نیام ئٹ پاکستانی لشکر نا کارندہ غاک اُراٹی ساڑی زالبول و چنا تون اوار ایلو بندغ تے آ بھاز بیدادی کرے۔ خن خنوک شاہد آتا رد ئٹ فورسز کارندہ غاک زالبول آتے توفک نا کنداخ ئٹ خلکر۔
نزیر بادینی نا اسہ ورنا مار و پنی ءُ فٹبال گوازی گر بالاچ بادینی ءِ مئی 2024 ئٹ سلہہ بند بندغ آک سم کاری کریسہ کسفیر۔ بالاچ بادینی اوکان مالو زوراکی ئٹ بیگواہی نا گواچی ہم مسوسس۔ ہندی بندغ آتا رد ئٹ بالاچ بادینی نا ریاستی ڈھکوک ادارہ آتا مخ تف سلہہ بند ٹولی “ڈیتھ اسکواڈ” نا بندغ آک خون ءِ کریسر۔
داکان مالو پاکستانی لشکر نوشکی و گوادر ئٹ بی ایل اے نا کماش بشیر زیب بلوچ تون اوار مُسہ پین بندغ نا ہم باوہ پیرئی آ اُراتے بُھس کریسس۔ پن کروک اُرا تیٹ بلوچستان نیشنل پارٹی نا راہشون بہادر خان مینگل نا اُرا ہم اوار ئس۔
یاتی مرے کہ سی و یک جنوری آ بلوچ لبریشن آرمی “ھیروف” نا رد ئٹ بلوچستان نا چانڑدہ شار تیٹ جلہو کریسہ کنٹرول دوئی کریسس۔ دا آپریشن نا وخت نوشکی شار آ ہم بلوچ لبریشن آرمی کنٹرول دوئی کرے ہرا شش دے اسکان برجا مس۔
بی ایل اے نا جلہو آتیان گڈ تیوہ بلوچستان ئٹ زوراکی ئٹ بیگواہی و دروغ نا مون تس آتا تدینی تیٹ پین ودکی خننگنگ ءِ ہندن درو پانزدہ دے ئنا نیام ئٹ بیست و پنچ آن زیات بندغ نا جون آک خننگانو ہرافتیٹی گیشتر بندغ آتا چاہنداری مالو آن زوراکی ئٹ بیگواہ بندغ آتا ڈول ئٹ مسونے۔