جاندمی ایشیاء و مشرق وسطیٰ ٹی ہلہلہی، بلوچستان نا زی آ زیم آک

جاندمی ایشیاء و مشرق وسطیٰ ٹی ہلہلہی، بلوچستان نا زی آ زیم آک

نوشتکار: جعفر قمبرانی

دی بلوچستان پوسٹ

اسہ رپورٹ ئسے نا رد ئٹ امریکہ خوائک کہ ایران مسہ گڑا تون امنا کے نئے تو اونا بھگوں تے خسنگ کن داکان بڑزا ءُ جلہو ہم مننگ کیک۔ اول دا کہ مشرق وسطیٰ (middle East) نا گریٹ گیم ئٹی ایران اسرائیل نا مون آ اڑاند اس مف تو ارٹمیکو دا کہ ایران تینا ایٹمی طاغت آن دو ارفیسہ تینا ایٹمی پروگرام آتے رول بیک کے و مسٹمیکو کہ ایران ایرانی آؤدانی (وسائل) یعنی تیل و گیس آتیا امریکہ نا نیمہ خواجہی ءِ امنا کے۔ ہندا سوب آن نن خنینہ کہ اِرا ہزار نہہ (2009)، نوزدہ، بیست و یک، بیست و دو (2022) آن گڈ داسا پدی ایران ئٹ اسہ بھلو ہلہلہی ئسے نا ڈس رسینگک۔ وختس نن خنان کہ 28 دسمبر 2025 نا دے ایران نا واپار آتا پارہ غان کبینی و ایرانی زر ئنا بہا نا تمنگ نا برخلاف تینا دکان تے بند کریسہ برانز نا پڑو تسر۔ ہمو پڑو مدان آخہ بلکن بھاز تیزی ئٹ تیوہ غا ایران ئٹ 31 صوبہ تیٹی تالان مریسہ کرے۔ ہندن لگا کہ چاب آتیٹی تموک باکس نا تیلی اس تیوہ غا چاب ءِ خاخر تس۔ ولے خاخر تروک دیر ئسک کل ءِ سما ءِ۔

ہر کنڈ آ اسہ گُنگی اس تالان ءِ۔ ہندن گمان مریک کہ ہرکس اسہ بھلو مٹ بدلی ئسے نا ودار ئٹی خن تے چغر کریسہ دانگ اینگ ہریسہ ءِ۔ جہس بھیم تالان ءِ تو جہس شادکامی۔ نتیجہ برو گڑا ہندا ہلہلہی ایران آن پیشن مریسہ تیوہ غا خطہ ٹی تالان مرو، ہنوکا دے ئنا جلہو، امریکہ اسرائیل نا جفتی آ خرما آنبار اوار تمنگ و عرب ریاست آتا ایران نا برخلاف امریکہ نا مُخ تفی، ایران نا صدر آیت اللہ خمنہ ئی تون اوار کیہی ایرانی راہشون تا مرگ ئنا گواچی مننگ نتیجہ نا جند افک بلکن دا جنگ ئنا ایسری دائسکان بے ڈس ءِ۔ ہمونا ودار کروئی ءِ ہراتم دا خاخر ایران آن پیشن مریسہ تیوہ غا ریجن ئٹی تالان مرو کہ جہس پوغ تو جہس پھل دسیسہ ہنو۔

کیہی سوج آک بندغ نا مزغ ئٹ بریرہ و کیہی گڑاک کاٹم نا زی ئٹ گدرینگرہ انتئے کہ اوفتا پہہ مننگ بیرہ ہمو زورآور آتا کاریم ءِ ہراکہ جہان ئٹ جہس تینا زیم ءِ تالان کننگ خوارہ۔ حیرانی نا ہیت دادے کہ ایران ئٹ ہراتم مخلوق تینا جند ئنا حالیت آتے ہریسہ کبینی و ایلو راجی تدینی تا بابت توار بڑزا کریر تو امریکہ ہندا مخلوق تو مخ تفیسہ مخلوق ءِ پین زورآوری و برانز آتیٹی ترندی نا پِڑو تس و مخلوق تون اوفتا جند ئنا حکومت نا برخلاف سلنگ نا پارے۔ مِلی ٹی بریک کہ ایرانی بادشاہ و مخلوق نا نیام ئٹ دا اڷ بگیر نا کل آن بھلا سوب دا ئسک کہ ایران اسہ کَس نَمر ءُ ملک ئسے و جہانی پڑ آ بھلا طاغت، امریکہ، اسرائیل اس تے تُک ئٹ اتپرنگ نا زی آ کیہی سال نا ءِ مہکمی ئٹ سلوک ءِ۔

دا تو پک ءِ کہ امریکہ جہان ئٹ و خاص وڑئٹ ایشاء و یورپ نا گڑاس ملک آتیتون خڑکی کننگ نا خواست تخک تانکہ دا تیوہ غا خطہ ٹی امریکہ نا ہیت ءِ امنا کننگ مرے و ہر کاریم اونا منشا ٹی کننگ مرے۔ دنکہ نن ہرینہ کہ ہنوکا سال امریکہ انڈیا تون خڑکی کریسہ مودی تون سوگؤ سنگتی نا پڑو ایتک تو ایکان حسینہ واجد نا حکومت ءِ خسیسہ تینا وڑ ئنا حکومت اس اتنگ ئٹ ہم سرسہب مریک۔ ایران کہ بھلا طاغت آتیتون مون تروک ریاست ئسے تو اودے شیف شاغنگ و کیرغ خلنگ کن پاکستان تون خڑکی، پسنی ٹی تینا اڈہ جوڑ کننگ و ایران نا جلہو نا وخت امریکہ ٹی پاکستان نا فوجی سروک نا تولنگ پک کرے کہ امریکہ تینا مفاد کن ہر چم کننگ و کرفنگ کیک۔

یخینن! بلوچستان داڑان ہنداخس زیمی مرو اخس کے ایران تینٹ انتئے کہ اسٹ تو بلوچستان و ایران بن پیرہی ہمسایہ ءُ تو ایلو کنڈ آن بلوچستان نا اسہ بھلو بشخ اس کہ ہراٹی لکھ آ بلوچ آک آبات ءُ ایران ئٹ اوار شاغنگوک ءِ۔ سوج دادے کہ بلوچستان ئٹ دا ہلہلہی تا انت زیم آک مرور و بلوچ مخلوق و خاص وڑئٹ بلوچ سلہہ بند تحریک آتے انت کننگ نا گرج ءِ؟ مننگ کیک کہ دا ہلہلہیک بلوچستان ئٹ ہفتاد سال آن برجاء آ تحریک ءِ اسہ بھلو نتیجہ ئسے آ سر کیر۔ مننگ کیک کہ منہ سال آن ترندی ئٹ بلوچ تحریک ءِ نزور کیر۔ امریکہ نا اسہ تجزیہ کار مائیکل کوگلمین نا ردئٹ ایران ئٹ ساڑی ہلہلہلی بلوچستان ئٹ ساڑی تحریک ءِ پین ترند و مہکم کرو۔

اگہ دا ہیت آ نن پام کین گڑا نن خنینہ کہ ایران نا زی آ ساڑی جلہو آک اسہ بھلو ”ریجیم چینج“ اس اتنگ نا سوب مرور۔ دن ہم مننگ کیک کہ پہلوی خانوادہ غا تا حکومت کہ ہرادے 1979 ئٹی خسیسہ خمینی ”ملا ریجیم“ نا بنیات ءِ تخا و ایران ءِ اسلامی جمہوریہ استان اس جوڑ کرے اینو پدی ہمو پہلوی نا ریجیم برے و ایران ئٹ امریکہ و اسرائیل نا است خواہ حکومت اس جوڑ مرے۔ دا یخینن پاکستان نا مفاد ئٹ اسل گچین مفرو کہ اسرائیل دا خطہ ٹی نت تخے و پاکستان نا ہمسایہ ملک اسیٹی ترندی ئٹ ساڑی مرے۔

دن ہم مننگ کیک کہ ریجیم مٹ مف ولے ایران ئٹ جتا جتا انگا راج آک دنکہ بلوچ، کرد، فارس، آزری و آویزیک تینا تینا زرمبش تے ترند کریسہ جتا انگا ریاست آتیٹی اواری نا پارہ غا کار تو ایران ہم روس آنبار کیہی ٹکر تیٹی پنیسہ ہنو۔ مننگ کیک کہ کرد تحریک پدی زور ارفے یا گڑا ایران نا پارہ غا کرد راج ترکی تون اوڑدہی کننگ نا پارہ غا فیصلہ ہلے۔ مننگ کیک کہ بلوچ راج کہ ہرا ایران ئٹ تولوک کیہی ہزار سال ایرانی زوراکی و تادی تا گواچی مسنو تینکن جتاؤ کسر اس پٹر، اوغانستان نا بلوچ تون اوڑدہی کیر یا گڑا بلوچستان نا تحریک تون اوڑدہی کریسہ بلوچستان ئٹ اواری نا جہد کیر۔ دا وڑ مننگ آن گڈ بندغ نا ملی ٹی اسہ دا ہیت بریک کہ بلوچستان نا جغرافیہ نا ارزشت زرس پین ودو و امریکہ کون آ ریاست آتے بے وس کرو کہ داڑا ہم تینا مہروان آ نظر ءِ شاغر۔

یات سلے کہ ہراوخت امریکہ اسرائیل یا پین ملک اس تینا سیاسی و زرگزرانی مفاد آتے ہراڑے خنرہ تو اوڑے بیدس مذہبی تعصب آن خڑکی نا کوشست کیرہ دنکہ ساڑی جنگ ئٹ نن خنان کہ پاکستان اسرائیل تون مذہبی تعصب نا مننگ آن پد ہم اسرائیل و امریکہ نا ایران آ جلہو تیا تینا است خواہی تا درشانی کریسہ سعودی عرب نا زی آ ایرانی جلہو تا مذمت ءِ کرے۔ یعنی چوٹ انگا کسر ئٹ ہمو مزل آ ہنا و امریکہ و اسرائیل نا مخ تفی ءِ کرے۔ بلوچستان ئٹ مروک آ تحریک ءِ ہم وخت ئنا خواست آتے پورو کریسہ تینا سیاسی مفاد آتیکن دا جنگ ءِ تینا مفاد کن بکار کننگ نا گرج ءِ نئے تو دا جنگ ئٹ نیامجی مریسہ بلوچ تحریک نزوری نا پارہ غا انپ۔

دا تو پک ءِ کہ بلوچستان آ اخہ کہ دا تیوہ غا خطہ ٹی خاخر تا زراب آک رسیفور ولے دا زراب آن نن تینا جُگی تے ہشون یا دانا وسیلہ ئٹ تینا کُتغ آتے بیٹ کریسہ تینکن آہنی ءُ سلہہ جوڑ کرون۔ مننگ کیک کہ ایران تون جیڑہ و عدم استحکام نا دروشم ئٹ ایرانی باہوٹیک ہم بلوچستان ئٹ پترینگسہ بلوچ راج اکن کاٹم خڷ اس مریر۔ مننگ کیک کہ پاکستان نا منافقی آ رویہ و امریکہ اسرائیل تون اوڑدہی نا سوب آن ایران ہراکہ وخت آن بلوچ دژمن ریاست اس مریسہ پاکستان تون بلوچ تحریک نا برخلاف جہد کرینے، پاکستان آن است کٹہ مریسہ بلوچ تحریک کن اسہ سوگؤ ءُ سنگر اس جوڑ مرے۔

ایران افغانستان و پاکستان نا نیام ئٹ دا جنگ و بلوچستان نا گلزمین نا اہمیت آن نمن مننگ کپک ولے دا بلوچ راہشون تا لائخی و بود ئنا زی آ سوج ودی کیک کہ او اخس دا ہلہلہی تے تینا مفاد کن بکار کرور۔ ایرانی بلوچ آتے تینا راجی فکر اتون اوار کننگ نا کوشست آن ہلیس کہ امریکہ اسرائیل و ایلو بھلا طاغت ور آ ریاست آتے تینا راجی زرمبش، راجی بزگی و نیزگاری تیا پام کرفنگ ہم بلوچ راہشون تا لائخی نا سوب آن مرو۔ دا جیڑہ غا تا نیام ئٹ تینا دژمن ملک، پاکستان، ءِ نزور کننگ و تینے ترندی ئٹ مون آ اتنگ بلوچ راہشون تا زمہ واری ءِ کہ ہراڑے اوفک سلہہ بند مریسہ کوئٹہ ریڈ زون اسکان سر مننگ ئٹ سرسہب مسنو ولے داسا جہانی پڑ آ تینے بھلا طاغت ور ریاست آتا مون آ امر گچین وڑٹ درشان کننگ، سفارت کاری، ایرانی بلوچ آتے تینتو اوڑدہی کن امنا کرفنگ و دائے کل بلوچ راج ئنا ہمو راہشون تا زمہ واری ءِ کہ ہرا اینو سلہہ بند مسنو و تحریک ءِ ترندی ئٹ داڑے رسیفینو۔