بلوچستان نا ضلع گوادر نا ساحلی علاقہ جیونی نا سمندر ئٹ پاکستانی لشکر سلہہ بند بندغ آتا جلہو ئٹ ٹک کننگانے۔ جلہو ئٹ مُسہ کارندہ مرگ ئنا گواچی مسنو۔ بی ایل اے ذمہ واری ءِ ارفے۔
یک شمبے نا دے جیونی ئٹ پاکستانی لشکر آ سلہہ بند جلہو ئٹ مُسہ کارندہ مرگ ئنا گواچی مسنو۔ سرکاری احوالکار آتا رد ئٹ جیونی نا سمندر ئٹ فورسز نا کشتی ءِ ہمو وخت سلہہ بند جلہو نا ٹک کننگا ہراتم او سمندر ئٹ گشت آ ئسر۔
بنائی احوال آتا رد ئٹ سم کاری نا سوب مُسہ کارندہ ہمو وخت آ مرگ ئنا گواچی مسر۔ کالخواک تدینی نا پین شا بیتی حوال شینک کتنو۔
دا اولی وار ءِ کہ بلوچستان نا سمندر ئٹ پاکستانی لشکر ءِ جلہو آتون مون تروئی تمانے۔
بلوچ لبریشن آرمی دا جلہو نا ذمہ واری ءِ ارفینے۔ بی ایل اے نا ترجمان جیئند بلوچ میڈیا غا شینک کروک بیان ئٹ پارینے کہ بی ایل اے نا سرمچار آک اسہ اہم و پوسکن ءُ شابیتی گام اس ارفیسہ گوادر نا علاقہ جیونی نا سمندر ئٹ کوزہ گیر فوج ئنا اسہ کشتی اس سلہہ بند جلہو ئٹ ٹک کریر۔ دا سرسہب بحری کاروائی نا سوب آب کشتی ئٹ سوار مُسہ کارندہ مرگ ئنا گواچی کننگانو۔
او پارے کہ بلوچ لبریشن آرمی دا جلہو نا ذمہ واری ءِ ارفک۔ زمین آن گڈ سمندری سیم آتیٹ دشمن نا برخلاف کاروائی تا دا بنا بی ایل اے نا عسکری حکمت عملی ئٹ اسہ پوسکن و اہم ءُ گام ئسے۔ ہرا نا مسخت بلوچ مڈی تے سمندری کسر تیٹ لُٹ و پل مننگ آن توننگ و دشمن ءِ ہر محاز آ نسخان تننگ نا ءِ۔
ترجمان پارے کہ دا جلہو نا بابت ئٹ شابیتی بیان زوت میڈیا غا شینک کننگا۔