ندر چیئرمین شاہ کرم بلوچ نا پن آ
ہڑدے رسخت مریک یار اس
ہڑدے ہلیوہ خاخر
جڷی مریک دا ساہ
سیخاٹی لوارتا
ماگم بریک کنے آ
دسیک کنے بُھوہانٹو
رغ تیٹی اسُل پے ہِک
شندِک کنا ضمیرے
ہرِفک او کنے آن
سنگت انت اسے اُس
داپا کنے تو چاہوس
نا یار اسوٹہ ای
بیلی کنے کریسہ
پاریسہ کنے کربان
جی ہو نا ٹکا اسک
لوڈو کُنسہ اسک
لخ نا کنا ہر ہیت آ
حالے کنے حوال ایت
شابیتی مُرغُنی ٹی
راست پاس کنے بیرہ
کچاری نا انت حال ءِ؟
تِسوٹ نُمے امانت
اللّٰہ ءِ منرے غُٹ
کپیرے ہِچ خیانت
دوستاک عزیزاک تینا
داسکانے خُڑک اریرک؟
مہراک تین پہ تین نا
مجلس چاہ و خاخر
کونڈوک پوغ اِشکر
شیراک شاعری چس
کاریماک اخہ درسد
مننگ ءُ داسا اخس
دسکا ہمو مہر برجائے زبان آتا
اٹ تا براہوئی چارہ
اٹ تا بلوچی کیرہ
کھیترانی پہہ مریرہ
یاد آتا ننا دیوان
برجاہ مروئے دسکان؟
شہداد نا ہمو گند ءِ گیرام تو کپہ رورے
آفتاب نا دروشُم کڑد اٹ
پردیسی تہ کالج نا
ہِنورے سمبھالورے
احسان نا توار اٹ کُل روڈا تئے برورے
چکر خلورے ہر کُنڈ
سنگت ءِ وخت تورے
پارورے پہہ کرورے
کاریم اٹ ہو برورے
غصہ مروئے کس تا
روم آ اونا ہِنورے
سینہ ٹی اود خلورے
تین تو اوار درورے
کونسل نا کتابجاہ آ
بغل اٹ تہ کتاب تورے
مہر اٹ تُولیفورے
دیہاڑ ءِ خوانِفورے
ای تو ہِناٹ بھاز مُر
نُمے آن جہان آن کُل آن
گُڈیکو کلہو دادے
ہر زانت ءِ کبو دوئی
ہینار مبو نُم غُٹ
کتاب آن کش کبو نُم
بس خید دِتر سیاہی
عمل آتا مبو گواچی
ناجوڑی تے چُھٹف بو
سنگر نا ننا زہم آک شیموش کرور چھپی
دژمن مرو ہبکہ
بانڈار آن نُما سنگت بیگواہ منٹ کروئے
ہرفو خلو بٹوئے
بیگواہ تا مرو ویل اس
ایف سِکس آ نُم ہنورے
کوکار منٹ خلورے
بوٹی او منہ کافر
ماسا نُما سلوئے
بیدار مریرے پُھلاک
دژمن داسا لغورے
گوڈتے خلکونے چٹ
گُڈیکو دم تیاٹے
سُنت ءِ ننا اُست اٹ
ادا کریرے نُم گر
مِزل خڑک بروئے
سہب اس ننا مروئے
سہب اس ننا مروئے
سنگین سہار