بلوچ اسٹوڈنٹس ایکشن کمیٹی (بساک) تینا تینا بیان اسیٹ پارینے کہ بلوچ ڈیہہ ہمو سرزمین ءِ کہ داڑے ہر وخت آ جتا ءُ پن و کڑدار ودی مسنے۔ ہرافتیٹی پروفیسر، اُستاد، دانشور، ادیب و شاعر آتیتون اوار جتا ءُ رہشون آک اوار ءُ۔ نن بلوچستان نا ہرا ہم ہند ئنا زی آ گپ کین گڑا ننے خننگ آ بریک کہ ہر ہند ئنا تینا جتا ءُ کڑدار ءُ ہرافک بلوچ سیاست، ادب، راج و چاگڑد ءِ شونداری تننگ تون اوار وخت وخت ئنا زی آ راج و چاگڑد نا جوانی ئٹ رہشونی ءِ کرینو۔ ہمو ہند آتیٹی اسٹ شال ءِ ہرا بلوچ نا سیاسی بنجاہ ہم پاننگک۔ داڑے بھاز پنی ءُ کڑدار و رہشون ودی مسنے ہرافتیٹی اسٹ خواجہ عبدالجبار یار ءِ۔ خواجہ جبار یار براہوئی بولی نا اسہ پنی ءُ شاعر و مفکر اس ئسک۔
“خواجہ جبار یار 3 جون 1949 ئٹی شال ئٹ ودی مس۔ او تینا بنائی خواننگ ءِ گورنمنٹ ہائی اسکول شال آن کرے، و مونی او براہوئی فاضل نا ڈگری ءِ بلوچستان یونیورسٹی آن دوئی کرے۔
“خواجہ تینا شاعری نا سفر ءِ 1977 آن بنا کیک و سنجیدہ شاعری تون اوار او بوگ شوگ شاعری ہم کرینے۔ بلوچ ادب ئٹ اونا بوگ شوگ شاعری گیشتر پنی ئس اندا سوب آن خواجہ جبار یار براہوئی بولی ٹی بوگ شوگ شاعری نا بادشاہ پاننگک۔ ولے اونا دا شاعری ٹی پنت و نصیحت تون اوار بھاز ہند آ طنز نا ہم رنگ اس خننگ آ بریک۔ دنکہ او جاہ اس پائک کہ ”نی سیر سوا سیرئنا ہیت آتے کریسہ، نے تول کرینٹ نی فقط چار گرام اُس۔“ اونا شعر آتے ریڈیو پاکستان ئٹ ہم پاننگانے۔ خواجہ ءِ براہوئی ادب تون بھاز مہر ئس ہرانا سوب آن او تینا ذند ئٹ ادبی پروگرام اڈ تسکہ اونا اسہ پروگرام اس ”جشنِ یار“ گیشتر پنی ءِ ہراڑے جتا آ ادبی بندغ آک و شعر پاروک آک بسنو و بشخ ہلکنو و خواجہ نا نوشتہ کروک آ شعر آتے پارینو۔”
بیان اٹ پاننگا کہ خواجہ جبار یار ادبی کاریم تیتون بھاز خڑک ئسک و او براہوئی ادب ئٹ اواری و اُست جمی ئٹ کاریم کرے۔ ہندا سوب آن او بنا ئٹ براہوئی ادبی سوسائٹی نا باسک ہم مریک، ولے مون مُستی خواجہ تینا اسہ ادبی اداراہ اس مون آ ہتیک ہرانا پن ”براہوئی آرٹس اکیڈمی“ مریک۔ خواجہ جبار ساز و زیمل نا راگ آتیان ہم بھاز واخب ئسک۔ و شعر پاروک آتیتون بھاز خُڑک ئس و اوفتے ساز و زیمل نا بابت کمک کریکہ۔ ولے دا پنی آ شاعر و مفکر 21 اپریل 2004 آ کوڑی آن رخصت کیک۔ نن اودے اونا ودی مننگ نا دے آ دروت ندر کینہ او تینا شاعری و نوشتہ کاری نا بنیات آ براہوئی ادب ءِ اسہ پین رنگ ئس تننگ نا کوشست ءِ کرے۔