خاک مسڑ آن طوفان ءِ آہن اسکان
نوشٹ: برزکوہی
مَٹ: باہوٹ بلوچ
دی بلوچستان پوسٹ
سدو نا بننگ ئٹ ہچو ڈرامہ اس اَلو۔ نہ او تینا ایب کیب ئٹ کسہ اس گوْفیسس، نہ تینا بننگ نا پڑو ءِ کرے، نہ تینکن ہمو دوی ءِ تراشا ہرانا ذریعت ئٹ مخلوق تینا ذات ءِ تینا عمل آن بھلن جوڑ کیک۔ سال آتیان او اندا مخلوق نا نیام اٹ ساڑی ئس ہرافتا نیامٹ داسہ ہم ساڑی ءِ، اندا کسر تیٹ پند خلیسہ کرے، اندا مجلس تیٹ اوار مس، اندا خطرہ تیتون زند گدریفسہ کرے۔ ولے کیہی بندغ آتا پاش مننگ ہمو دے غا مفک ہراتم او اولیکو وار مخلوق نا خن تیٹ بریرہ، بلکن ہمو دے غا مریک ہراتم مخلوق ناگمان مارِک کہ ہرا گڑا اوفتا مونا ساڑی ئس، او گواچن ئٹ اوفتا گمان آن بھاز زیات بھلن ئس۔ سدو نا بابت کنا احساس ساندہ اندن مسونے۔
(۱)
بلوچ آتا مَش تا ننک شار تا نن تیان جتا مریرہ۔ شار تیٹ ننک روشنائی تا باہوٹ اٹ مریرہ، داڑے نن زمین نا باہوٹ اٹ مریک۔ مَشک تینا تارمہ غا شابیتی تے آسمان اسکان تالان کیرہ، وادیک تہاری نا تامور آ کرک آتیٹ اویڑدہ مریسہ کارہ، و مُد اٹ اسہ اندنو زباد اس دِرک ایتک ہرادے بیرہ مِش ئنا گند پاننگ اوڑتون تادی اس مرو، انتئے کہ داٹی بے ہم ارے، بارن آ بوچ ہم ارے، شکستہ قافلہ غاتا دنز ہم، و بلکن ہمو بندغ آتا ساہ ئنا توار توار ہم ہرافک دا سرزمین آ ہنیسہ دیہاڑ نا اسہ بے ڈس مروک پارہ ئسے غا ایسر مسر۔ سدو دا ندارہ ءِ دُن ارپک ہرا وڑ کہ لس مخلوق اُریک۔ او ندارہ ءِ بیرہ ارپک، اونا خنک ساندہ ہمو گڑا نا پارہ غا کارہ ہرا ساڑی مریسہ ہم پورہ ساڑی اف۔ او مَش تیٹ بیرہ مَش خنپک، او اوفتا تہٹی سد آ سال تا اودیمی خنک۔ او وادی تیٹ بیرہ چُپی بنپک، او اوفتا تہٹی ڈَم ہلوک مجلس آتا توار ءِ بنیک۔
مخلوق زیات اونا اولیکو چاہنداری ءِ اونا ظاہر اٹ پٹرہ، حالانکہ سدو نا ظاہر اونا تیوہ غاتیان کم آ بشخ ءِ۔ اونا بابت اولیکو ردی دا کننگک کہ اودے بیرہ اسہ زالبول اس سرپد مننگک، و ارٹمیکو دا کہ اودے اسہ چیدہ اس سرپد مننگک، حالانکہ مند ساعت نا مجلس آن گڈ دا ہڑتوما گڑاک تینا معنی ءِ یلہ کیرہ۔ جنس، سَن، وڑ ڈول، دا تیوہ غاک پد ندارہ ئٹ کارہ و مونا بیرہ اسہ مِلی اس سلیک، و اندن مِلی اس ہرا مزاحمت، دَرک، پٹ و پول نا بے جاراتی و ڈُب ہلنگ انداخہ در اوار سوار مریرہ کہ اوفتا جتا چاہنداری کننگ سخت مریک۔
و اندا مِلی نا اودیم آ خانہ تیٹ، ہراڑے یات، چاہنداری نا رنج و ڈُب ہلنگ اسہ ایلو تون اندن اوار سوار ءُ کہ اوفتا نیامٹ سیم کشنگ سخت مریک، اسہ پین دروشم اس سال تیان چُپی تون ودشت کریسہ کرے، ہرا دروشم داسہ بی ایل اے نا چاہنداری تلہ ادارہ نا پردہ غا، بلوچستان نا اسہ نادرست، شکّل و مُر ئنا مَشی ہند ئسے آن، اسہ مرغنو مزاحمتی کُلہو ئسے نا دروشم ئٹ مونا بسونے۔ خنک اولیکو وار سلہہ بند زالبول تا اسہ سوگوْ بنائی کُڑدہ ئسے نا نیام اٹ خنار، جنگی لباس و گڑا تیتون شون تروک، دنز و مُج، تلار، چُپ آ دروشمک، و دا تیوہ غاتا نیام آن اسہ اندنو زالبول اس ہرانا ساڑی مننگ ئٹ زالبول مننگ پد ندارہ ئٹ کائک و بیرہ کمان، ارادہ و پامداری سلیرہ۔
دا ہمو سدو ءِ، ہرادے جہان داسہ کمانڈر شہناز نا پِن ئٹ چائک و ہرادے خڑک ئناک مابت و تینائی تون سدو توار کیرہ۔ کیچ نا دیہاڑ تخوک آ خلق تمپ نا مِش تیان بش مروک سدو تینا بنائی خواننگ نا ساعت آتے دی اوسس اسکول نا تلہ غا گدریفے، دوارہ تمپ ڈگری کالج ئٹ تینا بڑزکو خواننگ نا پند ءِ کرے۔ خواننگ نا اندا دے تیٹ او بلوچ اسٹوڈنٹس آرگنائزیشن آزاد نا فکری سنگت آتیتون تفوک مس۔ ہمو بی ایس او آزاد ہرا بلوچ مزاحمتی سیاست ئٹ ساندہ اسہ نرسری، اسہ بنائی مدرسہ، اسہ فکری تلہ و اسہ دَرغ ئسے نا کڑد ءِ ایسری تسونے، ہراڑے ورنا ذہن آک اولیکو وار راج، دیہاڑ، محکومی، آزاتی و بندغ نا شرف ءِ بیرہ کتابی لوز نہ بلکن تینا زند ئنا بنماسی سوج آتا ڈول ماریرہ۔
سدو بیرہ اسہ لس گوریلا جنگجو آخہ، اونا معنہ داڑان کیہی زیات شابیت ءِ۔ او بلوچ مزاحمتی دیہاڑ ئٹ اولیکو اندنو زالبول کمانڈر ئسے نا ڈول مونا بسونے ہرا تنظیمی صف تیٹ کمان، راہشونی و چِم آتا ڈول تے تینا وجود ئٹ جذب کرینے۔ اونا شخصیت نا تیوہ غاتیان بسوک و راز آتیان پُر آ بشخ دادے کہ او ہفت سال آن زیات وخت دا سخت آ کسر آ پند کریسہ کرے، اسہ لس سپاہی ئسے نا ڈول ئٹ بناءِ کرے، دوارہ مدان مدان راہشونی نا دا ہند اسکان سر مس ولے دا تیوہ غا پند ئنا نیامٹ اونا رازداری، سوگوی، پامداری و تہہ ئنا خیالداری نا دا حالیت مس کہ اونا بھاز خڑک ئنا توڷ بش کروک و ہڑدے نا سنگت آتے ہم دا مرغنا ہمگرنچی نا دیخہ در ہم سما تمتئو۔ دا اودیمی بیرہ ڈھکنگ اس اَلو، دا اونا مزاج نا بشخ اس ئس، ہمو مزاج ہرا ذاتی نشان تس، خود غرضی، بیرہ پن ئنا چاہنداری و تینا ایب کیب ئٹ دروغ نا کسہ گوْفنگ نا اُست خواہی ءِ تینا رہی آ دیخہ ہم ہلیپک۔
و بلکن اندا سوب اونا وجود ئٹ اسہ آہنی ولے بیدس تکبر نا باوری ئسے۔ اوڑتون تولوک بندغ ءِ وار وار دا احساس مریک کہ او تینا زمانہ نا ہڑدے ڈول نا تُرندی تون سوچ خلپک۔ او یکدم تون ایسری تیا سرمننگ نا منوک اف۔ او ہمو بندغ آتیان اف ہرا ہر سوج اکن وختی آن تراشوک ورندی تخرہ۔ او اشتاف اٹ مفک، بلکن اندا سوب کہ اودے سما ءِ کہ زند نا زیات گواچن آک سیدھا غا لکیر تیٹ رسینگپسہ۔ اوفک تہہ پہ تہہ مریرہ، ہر بشخ ئنا شیف اسہ بشخ اس مریک، ہر پڑدہ نا پد ئٹ اسہ پین پڑدہ اس، داڑاسکان کہ بندغ ءِ سما تمپک کہ او گواچن نا پارہ غا ہِننگ ءِ یا گواچن نا امکان نا پارہ غا۔ سدو بلکن اندا سوب ورندی تیان زیات ساخت آتیٹ اُست خواہی تخک، انتئے اودے سما ءِ کہ ہرا بندغ آک بیرہ ورندی تا رند ئٹ مریرہ، اوفک زیات ہمو سوج آتا گواچن ءِ بیڈس کیرہ ہرافتیان ورندی ودی مریک۔
وخت وخت کنے محسوس مریک کہ سدو نا اصل ہمگرنچی ساڑی حالیت تون نہ بلکن تینٹ زمانہ تون ءِ۔ او تینا عہد نا تہٹی الّمی مریک ولے اونا خنک بیرہ ساڑی ساعت آ سلپسہ۔ ہراتم او اسہ تدینی ئسے نا بابت ہیت کیک گرا اونا مونا ساندہ اونا وختی و اوڑان گڈ ملوک مریک۔ اوڑکن ہر تدینی اسہ مرغنو دے تا چرجوئی نا اسہ بشخ اس مریک، اندا سوب او گڑا تے ہچبر اوفتا دمدستی دروشم تون امنا کپک۔ اودے ہر ویل ئنا بنماس پٹنگ نا عادت ءِ، و دوارہ او بنماس نا شیف ساڑی اسہ پین بُن ئسے نا۔ کیہی بندغ آک ایسری دوئی کننگ آن بناء ءِ کیرہ، سدو سوب آتیان بناء ءِ کیک۔ کیہی بندغ آک ورندی تا پارہ غا دُدینگرہ، سدو سوج نا حالیت آ چمشانک شاغک۔ بلکن اندا سوب اونا ہیت آتیٹ زیات وخت اندنو چُپی اس ساڑی مریک ہرا بے سمائی نا آخہ بلکن پام کننگ نا چُپی اس مریک۔
خاک مسڑ آن طوفان ءِ آہن اسکان
برزکوہی | براہوئی مَٹ: باہوٹ بلوچ @Bahut_b pic.twitter.com/d8CdRB9Yzo
— The Balochistan Post – Brahui (@TBP_Brahui) June 19, 2026
(۲)
داسہ نن پین زیات پینگُن مسونے۔ مَشک تارمئی تون اویڑدہ مننگ ءُ۔ مُر جاہ اس اسہ تنیا ءُ چراغ اس لڑزنگ ءِ۔ تہو یخ مننگ ئٹی ءِ۔ سدو چُپ تولوک ءِ و ای ہم ٹَک خلنگ اُٹ کہ بلکن سدو نا گواچن اہمیت داٹی اف کہ او انت چائک، بلکن داٹی ءِ کہ او گڑا تے امر اُریک۔ جہان ئٹ علم تخوک بندغ تا کمبوتی اَف، بلکن اونا تہہ ئٹ اوننگ نا لائخی تخوک بندغ آک رسینگپسہ۔ و سدو ہمو رسینگپروک بندغ آتیان ءِ، ہرا ہر گڑا ءِ اونا زی آن آخہ بلکن اونا تہہ آن اوننگ آ زور تخرہ۔ بلکن اندا سوب اونا خڑکی ئٹ بندغ ءِ تینا بابت ہم اندنو گڑا سما تمنگ آ مریرہ ہرافتے او سال آتیان تو چائسکہ ولے اوفتا دَرک تختوکہ۔ و بلکن اندا ہمو ہند ءِ کہ ہراڑے اسہ بندغ ئسے نا چاہنداری کرفنگ ایسر مریک و اونا گواچن کسہ بناء مریک۔
کنے یات اف کہ اخس وار دُن مس کہ مخلوق اسہ ویل ئسے آ مرغنو شرہ اسیٹ اڑینگوک مرے و سدو چُپ تولوک مرے۔ او دمدستی تون نیام تمپک۔ بلکن اندا سوب کہ اودے سما ءِ کہ زیات مجلس آک تینا بنا ٹی گواچن ئٹ خیال تا درشان آخہ بلکن جوزہ غاتا درشانی مریرہ۔ مخلوق ہیت کیک کہ تینا بے جاراتی ءِ شون تننگ کیر۔ مخلوق دلیل ایتک کہ تینا باوری ءِ رکھوک تخنگ کیر۔ مخلوق دیہاڑ نا حوالہ ایتک کہ تینا ساڑی وخت ءِ جواز تننگ کیر۔ سدو دا تیوہ غاتے بنک، ولے اونا بِننگ نا بنجاہ لوز آک مفسہ۔ او ہمو مفروضہ غاتے بِنک ہرافتیا لوز آک ٹہیفوک مریرہ۔ او ہمو تیوہ غا مقدمہ غاتے سیل کیک ہرافتے تیوہ غاک منانو ولے کس اس بیان کتنے۔ اندا سوب ہراتم ایسر او ہیت کیک گڑا اندن محسوس مریک کہ مجلس اولیکو وار تینا گواچن آ سرحال نا رہی آ سر مسونے۔
اونا طب ئٹ اسہ عجب ڈول نا منیپننگ ئسے۔ او آسان آ درشانی تے امنا کپک۔ او ہمو بیانیہ تیان ہم رکھوک ءِ ہرا ہر ویل ئنا اسٹ آ سوب ءِ پٹیرہ، و او اوفتیان ہم ہرا ہر گواچن ءِ انداخہ در سرگڑدان جوڑ کیرہ کہ ہچو اخلاقی ہیت اس پین سلیپ۔ اونا رہی آ جہان نہ داخہ در سادہ ءِ اخس خطیب آک بیان کیرہ، نہ داخہ در اودیم کہ اخس کہ کہیک فلسفہ سرپد مریرہ۔ گواچن دا ہڑتوم آتا نیام اٹ اسہ سخت ءُ ہند ئسے غا مریک، ہراڑے بندغ ءِ اسہ وخت آ درشانی ہم درکار مریک و باوری ہم۔ بلکن اندا سوب سدو تینا ہیت ءِ ایسری تران جوڑ کپک۔ او ایسری دوئی کیک ولے ایسری نا پرستش کپک۔
بلوچستان نا بابت اونا ہیت آتے بِننگ اسہ جتا ءُ آزموندہ ئسے۔ دا خاطر آخہ کہ او غیر معمولی دعویٰ کیک بلکن دا سوب کہ او دا سرزمین ءِ اسٹ ءُ داستان اسیٹ قید کننگ آن نمن مریک۔ اونا رہی آ اسہ ہم راج اس بیرہ تینا مظلومیت آن جوڑ مفک، دنکہ ہچو راج اس بیرہ تینا کٹنگ آتیان ہم جوڑ مفک۔ راج آک یات داشت، خطا، شرف، بھیم، مزاحمت، چاہنداری، آمخی، سوگوی و نزوری تا سرگڑدان کروک آ اواری تیان جوڑ مریرہ۔ اندا خاطر او ہر ہمو بیان آن خیال کیک ہرا دیہاڑ ءِ بیرہ مودہ یا گِمر ئٹ بدل کے۔ اونا رہی آ ہڑتوم آ حالیت آک یاد داشت تون ناانصافی ءُ، انتئے ہڑتوماک بندغ ءِ گواچن نا بیرہ اسہ کنڈ تون چاہندار کیرہ۔
دا دیہاڑ تخوک شعور نا توار اونا زوت نا تران ئٹ ہم بِننگ اٹ بریک، ہراڑے او بلوچ زالبول نا داستان ءِ بیرہ ساڑی آ آدینک ئٹ آخہ بلکن دیہاڑ نا مرغنا برجاء غا دے تیٹ اُریک۔ اونا رہی آ بلوچ چاگڑد ئٹ زالبول نا ہند ہچو پوسکنو یا پین تیان ہلوک ہند اس اف، بلکن دا اشتماعی دود نا بشخ ئسے ہراٹی شرف، قدر و اواری ساندہ اسہ ایلو تون گوْفوک مسونو۔ او پائک کہ دیہاڑ تینٹ دا گڑا نا شاہد مرو کہ بلوچ زالبول چاگڑدی و سیاسی زند ئٹ ہچبر بیرہ کُنڈ ئنا مخلوق الوکہ، بلکن نرینہ غاتیتون ہم کوپہ زند نا سخت آ بشخ، اشتماعی فیصلہ و راجی سرنوشت نا معاملہ غاتیت اوار مسونے۔ اندا رِدئٹ او میر چاکر خان رند نا ہیڑ بانڑی بلوچ نا حوالہ ءِ ایتک، ہرانا شخصیت اونا رہی آ دا گڑا نا پاش آ شاہدی ءِ کہ سد آ سال مُست ہم راہشونی، چم و مِڑ تس نا میدان بلوچ زالبول کن ناولد اَلو۔
سدو نا خڑک دا دود نا ایسری قدرتی اَلو۔ او سرپد مریک کہ اسیکہ سنڈیمنی بست و بند بلوچ چاگڑد نا کیہی متکنا ڈول تے نزور کرے و دُوارہ پاکستانی کوزہ گیر دا فرخ ءِ پین زیات پینگن کریسہ سیاسی، ربیدگی و چاگڑدی پِڑ تیا بے ڈول و جنسی فرخ نا پوسکنا دروشم ودی کرے ولے اونا رہی آ دیہاڑ نا سفر ساندہ اسہ کنڈ ئنا مفک۔ اندا سوب او دا ہیت آ زور شاغک کہ مزاحمت نا ساڑی حالت ئٹ نرینہ و زالبول اسیکہ وا اسہ صف، اسہ سنگت و اسہ مسخت نا رِدئٹ اوار مسونو۔ اونا خیال ئٹ دا بدلی نا پد ندارہ ہمو فکری زاویہ ءِ ہرا ندر مننگ، خڑکی و اشتماعی ذمہ واری ءِ جنس نا ہد آتیا کشوک اسہ راجی فرض اس پِن کرے، و دُن زالبول و نرینہ نا نیامٹ ٹہیفوک دروغ نا مُری تے اسیکہ وا سوج آتا تلہ غا ایس سلیفے۔
اندا فکری بِسونی نا رِدئٹ سدو ربیدئی، گَڑس و مصلحت اندیش سیاسی مزاج آن ہم جتا خننگک و غیر منظم، بے اصول، غیر انقلابی و جنگی ڈول آن ہم تینا ذات ءِ رکھوک تخک۔ اونا تہٹی ذاتی نشان تس، خودغرضی و پِن کٹنگ نا اڑزان آ اُست خواہی خننگپک۔
او بلوچ راج ءِ خبڑدار کیک کہ زوراکی نا مونا چُپی بیرہ سیاسی نزوری آخہ بلکن راجی غیرت، اشتماعی شرف و بندغی قدر نا برخلاف ءِ۔ انداڑتون او بلوچ زالبول تون ہم ہمکلام مریک، ولے اوفتے بیرہ جوزہ، چیدہ یا وختی بش مننگ ڈول توار کپک، او خوائک کہ زالبولک دا تحریک ئٹ علم، شعور، حکمت و فکری چاہنداری تون اوار مریر، انتئے کہ اونا رہی آ ہمو اواری ہرا چاہنداری آن ہورک مرے، بھلو وخت اسیکن معنہ ودی کننگ کپک۔ سیال ئنا عسکری طاغت ءِ ہکّل تریسہ اونا توار پین سخت، پین پاش و پین آہنی مریک۔ او پائک کہ بلوچستان نا مَسنک داسہ آسان ہدف افس، او زوراکی نا مونا طوفان نا ڈول بش مروک سلوک ءُ و دا ڈیہہ نا تیوہ غاتیان بھلا عسکری ڈھانچہ نا اقتدار آتے مون پہ مون چیلنج کننگ ءُ۔
سدو نا اسہ پین جُوانی اس کنے ساندہ تینا پارہ غا پامدار کیک، او دا کہ سدو باہ تننگ و سرسُہبی ءِ عارضی حالیت سرپد مریک۔ بھاز آ بندغ آک شکست ئٹ تینا تیوہ غا چاہنداری ءِ گیرام کیرہ، و کیہیک سرسہبی ئٹ۔ سدو ہڑتوما آتیان اسہ مُری اس تخوک مریک۔ اونا رہی آ اصل سوج دا اف کہ اسہ راج اس اخس سرسہبی دوئی کرے یا اخس بے سہبی سگا۔ اصل سوج دادے کہ دا آزموندہ غاک اونا شعور تون انت کریر۔ او اوفتیان گڑاس ہیل کرے؟ انت او تینے جُوان سرپد مس؟ انت او تینا دھوکہ تروک آتے چائس؟ اگہ نہ، گڑا سرسہبی ہم شکست نا اسہ مہذب ءُ دروشم اس جوڑ مریک۔
بلکن اندا سوب ءِ کہ او امیت ءِ ہم جتا ڈول اٹ سرپد مریک۔ اوڑکن امیت اسہ جوزہ ئی کیفیت اس اف، نہ اسہ خودکار باور اس۔ امیت اسہ فکری و اخلاقی عمل ئسے۔ او بندغ آن خوائک کہ او گواچن ءِ اونا تیوہ غا سختی تیتون اُرے، ولے داڑان گڈ ہم بروک وخت ئنا امکان آن دُو ارفپ۔ اندا خاطر سدو نا تہٹی خوش فہمی خننگپک، ولے اُست کُٹئی ہم خننگپک۔ اونا رہی آ اسہ مسٹمیکو کیفیت اس ساڑی ءِ، ہرادے بلکن برجائی پاننگ مریک۔ ہمو برجائی ہرا بندغ ءِ توار توار آن بیدس تینا ہند آ سلوک تخک۔
(۳)
نن داسہ ایسری پاس آتیٹ ءِ۔ آسمان نا سیاہی ئٹ کڑمبی اس ودی مسونے ہرا بیرہ ہمو ساعت آتیٹ ودی مریک ہراتم ساف دائسکان تمتنے ولے تہاری نا بادشاہی اٹ اولیکو اودیم آ تَل تمانے۔ بلوچ آتا مَشک تینا تیوہ غا شکّل آ دروشم و قدر تون برجائی تون ساڑی ءُ، ولے خن تیان چَپ، دنکہ سد آ سال تا پیرانگا رکھوک آک ہرافک تینا رکھ پان ءِ یلہ کتنو ولے تینا وجود نا پڑو کننگ ءِ ہلانو۔ وادیک تینا تہٹی بے کچ توار، بے کچ پِن، بے کچ گمنام زند خمب کروک تموک ءُ۔ تہو ہراتم اوفتا نیام آن گدرینگک گڑا کنے ساندہ اندن محسوس مریک دنکہ ڈغار نا بندغ تیتون ہیت ئٹ مرے۔ بلوچستان ئٹ کیہی ننک اندن مریرہ ہرافتیٹ بندغ ءِ تینا زمانہ آن زیات تینے آن مُست ئنا احساس مریک، دنکہ دے تا تیوہ غا تبیک اسٹ ایلو غاک سُرانو و ناگمان دیہاڑ، یات داشت، تغ، لڈ و ہنپ، باہ تننگ، اُست خواہی، دتر، مابت، تیوہ غاک اسہ تارمہ غا جو ئٹ وہیسہ خننگر۔
سدو کنے داسہ اسہ دروشم، اسہ توار، اسہ مجلس، یا اسہ تدینی ئسے نا دروشم اٹ یات بننگ اف۔ او کنے ہمو جوہر نا ڈول یات بننگ ءِ ہراڑان زمانہ غاک تینا شخصیت آتے تراشرہ۔ دنکہ مِش ئٹ بے اوار مرے، دنکہ دیر ئٹ اسہ معدنی حالیت اس اوار مرے، ایہن ہم کیہی ارواح تیٹ اسہ اندنو گڑاس اوار مریک ہرانا ہچو پِن اس تخنگ مفک۔ او بیرہ علم آخہ، او دانائی آخہ، او دلیری آخہ، او سوگوی ہم آخہ۔ او بلکن دا تیوہ غاتیان مُست ئنا گڑاس ءِ۔ اسہ متکنو جوہر، اسہ تہہ ئنا سفت اس، اسہ اندنو ڈھکوک بنجاہ اس ہرانا دامون ایمون بندغ نا باطن پیری کیک و ہرانا پِننگ آ بندغ تینا تہہ آن ناوَلد مریک۔
سدو نا کماندار نا ڈول مونا بَننگ اسہ بندغ ئسے نا پاش مننگ آخہ، بلکن اسہ اندنو تنظیمی و علامتی ارتقا ئنا بڑزی تیا سر مننگ نا ٹِک ءِ ہرانا پاش انگا تمہید 2022 ئٹ شاری نا جند ندری آن نوشت مس، ہراتم مزاحمت نا بیانیہ ئٹ اولیکو وار فدائیت نا اسہ زالبولی کنڈ اس پورہ ترندی تون پاش مس و زالبول، ارادہ، ندر مننگ و سلہہ بند جدوجہد نا اوار تعلقداری تیوہ غا ڈیہہ ئٹ اسہ پوسکنو فکری سُر پُر اس ودی کرے۔ داڑان گڈ سمعیہ قلندرانی، ماہل، دروشم بلوچ، ہتم ناز، بانڑی، زرینہ بلوچ، مریم بزدار، حوا و آصفہ مینگل کوْن آ جتا چاگڑدی و تعلیمی پد ندارہ تیان تعلقدار زالبول تا فدائیت دا ارتقا ءِ پین شابیتی بشخا۔ دُن بلوچ آجوئی کن مزاحمت ئٹ زالبول نا ساڑی مننگ بیرہ علامتی یا جتا اروک سلتئو، بلکن چرجوئی تون مزاحمت نا عملی، تنظیمی و عسکری پاش آ بشخ جوڑ مریسہ کرے۔
واہم دا بدلی نا روتہ غاک بیرہ مَش، سنگر و مِڑتس اٹ رسینگپسہ۔ اندا سال تیٹ بلوچ راجی زند نا اسہ پین ندارہ اس ہم درشان مریسہ کرے، ہراڑے ماہ رنگ بلوچ ڈول آ مسنک زوراکی نا بیگواہی، سیاسی حق و اشتماعی انصاف نا خواست ءِ ارفیسہ برانزی کاروان، تولوک برانز و عوامی تحریک نا اولیکو چِر اٹ خننگسہ ئسر۔ دا ہم مزاحمت نا اسہ دروشم اس ئس۔ دا اسہ اندنو کسر اس ئس، ہرا دا امیت تون تینا کننگا کہ برانزی کُوک بلکن اُست خل آ کالونیل ماڑی تے اسکان سر مننگ کے ولے بلوچ سرزمین آ نوآبادیاتی حکمران آک دا امیت ءِ ہم بھٹی ٹی شاغار۔ دزگیریک، تھری ایم پی او، فورتھ شیڈول، سیاسی باسک آتا سزا، و دوارہ زوراکی نا بیگواہی تا دا چرجوئی نا زالبول تے اسکان تالان مننگ، دا تیوہ غا تدینیک بلوچ اشتماعی شعور ئٹ بیرہ سرکاری گام ارفنگ نا ڈول رکھوک تخنگتور بلکن دا اسہ شابیت آ آزموندہ غلامی، تینا زمین آن کشنگ و محکومی نا علامت جوڑ مسر۔
سدو اندا بدل مروک وخت نا اسہ اندنو دروشم اس جوڑ مریسہ بس۔ اگہ ماہ رنگ و اونا ہم کوپہ زالبولک، بلوچ نیاڑی نا سیاسی چاہنداری و پرامن مزاحمت نا چیدہ ءُ، گڑا سدو اندا بیداری نا اسہ پین، زیات سخت، زیات مون تروک و زیات غیر مصالحت پسند آ درشان ءِ۔
(۴)
داسہ مُر زمین و آسمان نا اواری ئٹ اسہ مدان ءُ روشنائی اس پاش کننگ ءِ۔ دائسکان سہب متنے، بیرہ تارمئی نا ساندہ ہی آ اولیکو تل تمانے۔ ای دا ساعت ئٹ سدو ءِ اسہ بندغ، اسہ پِن، منصب یا تنظیمی مرتبہ نا دروشم ئٹ اُرپرہ۔ او کنے اسہ اندنو درغ ئسے نا ڈول محسوس مریک ہرا اسُل داسہ ملنگانے۔ اسہ اندنو کسر اس ہرانا ایسری ءِ دائسکان خنک سر مننگ کپسہ۔ دا بناء ءِ۔
(۵)
داسہ آسمان آ ساف دیخہ در پین پاش مسونے۔ مَش تا تہار آ پیشانیک مدان مدان روشنائی نا لاغر آ چُلک تون رژنا مریسہ ءُ۔ نن دائسکان ساڑی ءِ ولے اونا توار ئٹ مالو نا ڈول باوری سلتنے۔ و بلکن اندا ہمو ندارہ ءِ ہراٹی سدو ءِ سرپد مننگ کیک۔ نہ یات ئسے نا ڈول، نہ افسانہ ئسے نا ڈول، نہ ربیدگ ئسے نا ڈول بلکن بناء ئسے نا ڈول۔ اسہ اندنو بناء اس ہرانا تیوہ غا معنویت دائسکان بروک وخت ئنا بدن ئٹ اودیم ءِ۔ اندا خاطر ای اونا بابت ہچو ایسری ہیت اس نوشتہ کپرہ انتئے کہ ایسری ہیت آک ہمو بندغ آتیکن مریرہ ہرافتا کسرک چُٹوک مریر۔ سدو ہمو نا پورہ سُہب آتیان ءِ ہرافتا بابت ئٹ بیرہ انداخس سما مریک کہ دے دائسکان پورہ پاش کتنے، ولے آسمان اونا بننگ نا شاہدی ءِ تننگ بناء کرینے۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔