طاغت نا پالیسی: کرفیو نا پلویڑ ئٹ بلوچستان – ٹی بی پی سرگپ
بلوچستان نا ضلع مستونگ، خاص وڑئٹ تحصیل کھڈ کوچہ، تدوکا اسہ ہفتہ ئسے آن خراب حالیت آتیتون مون تننگ ءِ۔ علاقہ ئٹ بھلو کچ ئسے آ لشکر کشی برجا ءِ، اندن کھڈ کوچہ ٹی نادرست وخت اکن کرفیو خلنگانے۔ دا وخت آ زالبول، چُنا و ورنا تیتون اوار کیہی بندغ آتا زوراکی نا بیگواہی تا تدینیک ہم رپورٹ مسنو، ہرافتا سوب آن ہندی بندغ آتیٹ خُلیس نا ماحول اس ودی مسنے۔
16 جولائی آ بلوچ لبریشن آرمی (بی ایل اے) کھڈکوچہ نا ہند آ اسہ بھلو فوجی قافلہ ئسے ٹک کرے۔ تنظیم نا پارہ غان شینک کروک بیان ئٹ پاننگا کہ دا قافلہ کوئٹہ آن پنجگور نا پارہ غا ہِننگ ئس و جلہو ئٹ کم آن کم 62 کارندہ مرگ ئنا گواچی مسر۔ ایلو پارہ غان حکومتی کالخواک دا تدینی ءِ پک یا رد کننگ نا بابت ہچو شابیتی ہیت اس مونا ہتور۔ جلہو آن پد زو کالخواک بھلو کچ ئسے آ لشکر کشی بنا کریر۔ دا وخت آ لس آباتی، ہندی علاقہ، و مسیت آتے ہم کاروائی تا گواچی کننگا، اندن کھڈ کوچہ ٹی تیوہ کرفیو خلسا بندغ آتے اُرا اسکان توننگا۔ کرفیو نا سوب آن ہڑدیئی زند تیوہ سلیسنے۔ دا حالیت آ بلوچستان نا جتا سیاسی و چاگڑدی بندغ آک ہم خُلیس نا درشانی کرینو۔ بلوچستان نا مسکوہی وزیر اعلی نواب اسلم رئیسانی تون اوار کیہی سیاسی سروک آک کرفیو ءِ شیف خلسا حکومت آن خواست کرینو کہ کرفیو دمدستی ایسر کننگہ، شاری تے آزاتی ئٹ ہن و بر نا موکل تننگہ و لس آباتی ءِ اشتماعی سزا تننگ نا جاگہ غا سیاسی وڑ و ڈول تینائی کننگہ۔
دا اولیکو وار اف، داکان مُست ہم بلوچستان نا جتا علاقہ تیٹ دا ڈول نا گام آک خننگ ئٹ بسنو۔ برجاء سال و توو تیٹی ضلع خضدار نا علاقہ زہری، ضلع نوشکے و دریابی شار جیونی تون اوار کیہی علاقہ تیٹ ہم مرغن کرفیو خلنگا، ہراڑے مخلوق ءِ ہڑدیئی زند، پوریا، خواننگ و دارو درمان کون آ بنداوی آسراتی تیان پدماندہ کننگا۔ دا تدینیک بلوچستان نا مخلوق ئٹ دا مارشت ءِ گیشتر سوگو کرینو کہ ریاست نا پارہ غان کاریم ئٹ ہتوکا سخت پالیسیک لس شاری تا سختی تیٹ ودکی کننگ ءُ۔ السی و سیاسی کڑدہ تیٹ دا ہیت ہم چرجوئی ئٹ کڑمب مرسا ءِ کہ طاغت آ تالان پالیسی و ہر وخت ئنا فوجی کاروائی تیان ریاست و مخلوق نا نیام ئٹ بے باوری گیشتر شابیت مننگ ءِ۔ ہراتم اسہ تیوہ ءُ علاقہ ئسے کرفیو، ناکہ بندی و بھلو کچ ئسے آ فوجی کاروائی تا ذریعت ئٹ بند کننگک گڑا اونا چاگڑدی، معاشی و نفسیاتی زہم آک بھلو وخت ئسے اسکان مارِنگ مریرہ۔
ارٹمیکو پارہ غان ریاستی گپ دا مسنے کہ بلوچستان ئٹ سلہہ بند مزاحمت کروک آتا کچ محدود و منہ سد بندغ آ تالان ءِ۔ اگہ گواچن ئٹ حالیت آک اندا ڈول ئنا ءُ گڑا بھلا کچ آتیٹ لشکر کشی، مرغن کرفیو، ہن و بر آ سخت رکھ و بھلو کچ اسیٹی فورسز آتا سلفنگ دا دعویٰ تون اسہ پاش ءُ تضاد اس ودی کیرہ۔ دا سوج تینا جاگہ غا ارے کہ اگہ مزاحمت محدود ءِ گڑا تیوہ علاقہ تے اشتماعی وڑئٹ انتئے پابندی تا گواچی کننگک۔
بلوچستان نا ویل بیرہ اسہ سکیورٹی یا عسکری ویل اس اف بلکہ اسہ سیاسی، دیہاڑی و راجی ویل ئسے۔ اونا روتہ غاک راجی حق، سیاسی کالخوائی و پجار تون تفوک ءُ۔ ہراتم اسکان دا بنداوی ویل ئنا ایسری کن معنہ دار ءُ عمل اس بناء کننگپک ہموتم اسکان بلوچستان نا حالیت آک اندن مرور، طاغت نا کاریم ئٹی ہتنگ آن نتیجہ تا پیشتمنگ بھاز سخت لگنگ ءِ۔ بلوچستان ئٹ اگہ سیاسی عمل ءِ اہمیت تننگتو گڑا ساڑی آ حالیت آک گیشتر خراب ءُ دروشم اس ہلنگ کیرہ۔ کرفیو، لشکر کشی، زوراکی نا بیگواہی و سخت سکیورٹی نا گامگیج آتیان بنداوی ویل ایسر مفک۔ بلوچستان نا گواچن آ سیاسی، چاگڑدی و راجی ویل آتے منّسا غٹ ذمہ وار آ فریق آک معنہ دار ءُ عمل ئسے نا بنا ءِ کیر گڑا اندا کسر ڈیہہ اکن پائدار ایمنی و سوگوی نا بنداو مننگ کیک۔ نہ گڑا بلوچستان نا حالیت آک نہ بیرہ اندن مرور بلکہ داکان ہم گیشتر خراب مرور۔