ناجوڑ آ ڈیہہ ئنا طبیب ڈاکٹر لال خان (درّک)
نوشتانک : ساربان سبزل
دی بلوچستان پوسٹ
تہارمہ ءُ شام ئسے ٹی نن نیمہ نا پاس ءِ، وتاخ ئٹ منہ سنگت ساڑی اُن، ایلو سنگت آک تنظیمی کاریم اسیٹی سہب ئنا سر ہلکنو، ننا خنک گڑتی ٹی سنگت آتا کسر آ خلوک ءُ کہ دیچا ہراتم سر مریر، انت حال ئٹ مرور، خدا جان خیر و خوشی ٹی سر کے تا، وتاخ ٹی چپی اس تالان ءِ، ہنداڑتون موٹر سائیکل آتا توار اس مش تیٹی پنک، است آتا دریکہ زیات مریک و بے جاراتی ٹی خنک کسر آ خلوک ءُ کہ ہراتم مش تا ول تیان گدرینگسا سنگت آک کسر آن پاش کرور، خیر سنگت آک بریرہ سر مریرہ است آک گلان مریرہ، سنگت آک دم دروک ءُ، سلام و دعا غان پد دیر کنیرہ و احوال مریک گڑا سنگت آک احوال ہیترہ کہ خیر ئٹ تینا کاریم ٹی سرسہب مسونن۔
ساڑی آ سنگت آتیٹی خننہ کہ اسہ سنگت اس ہندنو ہم سنگت آتیتون اوار ءِ ہراڑتون مالو اوڑدہی متنن، گڑا سنگت تون درستی راستی مرینہ کہ دا زیبا غا ورنا ہرانا دروشم ءِ سیل کننگ آن خنک دم درینگپسہ درّک جان ءِ، او تیوہ غا نن پینگن ءُ کچاری اس مریک، اونا کڑمب انگا خیال آک ڈغار کن اونا است ئٹی دڑد آتے ہندن درشان کیرہ دنکہ اولیکو چنا نا ناجوڑ مننگ آ لمہ اس امر گنوکی ئٹ ڈغار ءِ کاٹم آ ہرفِہ، جنگ و تحریک ئنا زی آ گپ و تران کیک، تینا بے وس آ راج ئنا دڑد و خواری تے ہندن درشان کیک کہ دن محسوس مریک دا کل دڑد و خواری تے او تینا اسٹ انگا جون آ سگنگ ءِ۔ است آک دا کچاری ءِ کشکنگ کن ہچ کشپسہ ولے سنگت آک دم دروک مریرہ گڑا سنگت آک خاچرہ، ولدا دے آن درّک جان و سنگت اس موکل کیرہ کہ اودے تینا محاز آ ہنوئی مریک و پانہ کہ زند مس ولدا خنون تینے ولے اواری نا فلسفہ تینے ولدا خننگ نا ارمان نا دڑد آن است ءِ جارات ہیتک گڑا اواری ءِ۔
خیر اسہ دے اس سفر ئسے ٹی کسری ڈک لگنہ گڑا سلام دعا مریک، ہندا منہ ساعت ئٹی ہم او کنا پلو آ منہ راجی ءُ پنت تفک و رائی مریک۔ داکان پد کنے آ سنگت اس درک جان نا اسہ دے اس سلام اس سر کیک گڑا است ئٹی اونا مہر جاگہ کیک و اونا زیبا غا دروشم ءِ مارسا اوڑتون گدرینگوکا وخت آتے است آ ہتیوہ و مہر و خوشی ٹی سلام ءِ تا وعلیک کیوہ۔ وخت گدرینگسا کیک اسہ دے اس وتاخ ٹی کاریم تے شون تننگ مرینہ کہ سنگت اس نیٹ آن دڑوکا چہرہ تون ننا کنڈا برسا مریک، مر آن خننگ تون محسوس مریک کہ احوال اس است ءِ کشکوکو ہتنگ ءِ، سنگت پائک کہ درک جان ثابت قدم مسنے، ڈغار اونا مہر ءِ قبول کرسا تینا تیدار ءِ اونا خیسن آ دتر تیٹی سینگار کرینے۔ دا احوال ءِ بننگ تون کنے یکدم لگک کہ ای تغ ئسے ٹی اُٹ، دن امر مننگ کیک کہ اسہ سنگت اس منہ دے مالو کنا خنتا مون آ ئس ولے داسہ اوڑتون اوڑدہی مننگ کن کنے پین جہان ئسے ٹی گام تخوئی تمک۔ ہزار ارمان تیتون اودے است آ ہتینہ و گڈسر ئٹ گمر کرسا پانہ کہ شہید آک نمے سلام ءِ! اواری ءِ قربان!
تنظیم نا پارہ غان اونا تفصیل آک شینک مریرہ، گڑا ای اسہ کڑمب ءُ سوچ ئسے ٹی کاوہ، و تینتون پاوہ کنے داسہ سما تما کہ او داخس کڑمب ءُ خیال و پر دڈد ءُ است اس ہراکان ایسوسس، ڈاکٹر لال خان پنی آ گواڈخ ایم بی بی ایس نا زانت ءِ دوئی کریسس، تینا راج ئنا باتی تا ناجوڑی تے او تو ہڑدے تینا خن تیٹی خناسس، و الم ہندا دڈد مسنے ہرا اودے دا ٹک خلنگ آ بےوس کرینے کہ راج ئنا دڈد و ناجوڑی تا بنچخی سوب آک ہراڑے کڈ ءُ، ڈاکٹر چائسس کہ ناجوڑ و غلام آ لمہ ڈغار نا چناک ہم ناجوڑی تا گواچی مریرہ۔ دنکہ ننے سما ءِ کہ او طبیب اس ئس گڑا ڈغار نا ناجوڑی ءِ بسند کرسا اونا سوب ءِ ہم پٹا کہ قوضہ گیر پنی ءُ اوبا اس ڈغار و راج ئٹی تالان مسنے، گڑا دا ناجوڑی نا درمان ءِ پٹنگ کن او ازغندی و پورچنکی آ مش تیکن مون کیک کہ بیرہ ہموکان دا اوبا نا کہسفنگ کن دارو دو بریک و ڈیہہ و ڈیہہ ئنا باتی تا ناجوڑی تا درمان او بیرہ آجوئی ءِ پائک کائک۔
درّک، درّا، دّرین، در نجف
بے مٹ رنگ ئٹ دانہ لال ئنا
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔