شہید ڈاکٹر لال خان
نوشت: برمش بلوچ
دی بلوچستان پوسٹ
وختس شہید اسے نا کسہ و داستان ءِ خوانن گڑا لوزآک ہموڑے گیمرینگوک وماندہ سلوک مریرہ۔ او بندغ ئس ہموڑے بے ڈول ءُ تجسس اسیٹی ڈُب ہلیسہ تینے سرپد مننگ نا کوشست ءِ ہم کیک۔ او مستی ہنداکان بندغ نا تہٹی ئسے خوندی ءُ سوج ئس دا ودی مریک کہ آخر او ہرا ازلی و ابدی مابت ءِ ، کہ شکّلا ءُ مار اسے نا اوڑان اونا زیبل آ جون ءِ بیرہ آخہ بلکہ تیوہ اونا خوش انگا جوانی ءِ مہرو مابت ئس تیناہی کننگ آ دیک او بلوچ قوم نا بروکا آسودگی کن اسہ ندری و دروشم اسے اٹ خوائک و عمل نا پڑا سرسوبی نا خواجہی کیک و دیک۔
ہائے شہید ! ہمو شہید شہید لال خان! لال خان تینٹ دُر اس ئس، موتی اس ئس ، جواھر و لال اس ہم ئس۔شہید لال خان نا زند و بود عملی کاریمک اینو ننا مون ٹی اندن اسے سوج ئس جوڑ مسونو ہرا ہچ بر گیرام مفسہ ، اودیم مفسہ۔
شہید لال خان ایم بی بی ایس نا اولی سال نا نودربر اس اسکہ۔ ہموڑے بندغ اسے نا ودی مروکا تغک مدان مدان آ گواچنی نا دروشم ءِ دوئی کیرہ و ارمان تے پورویک ہم ہموکان مرسہ کیرہ۔ لال خان اسہ ڈاکٹر اس ئس و تینا ذاتی زند نا آسودگی و خوشحالی ءِ دیخس ہم خواتو۔ او دا گچین کرے کہ قوم نا آسودگی کنا بنداتی سرسہوبی ءِ۔ ہندن او اسہ حساس ءُ خوانندہ اس اسکہ ہرا کتاب آتے تینا سنگت کرے۔ او توفک ءِ تینا بروکا وخت نا چیدہ جوڑ مننگ نا کسر پو مَس ۔ توفک و کتاب نا سنگتی ءِ اسے جوانو زندگی سے نا کنڈا دننگ نا کسر نشان تِس کہ زندہ ہموفک سلیرہ ہرا زاتی اُست خوائی ، آسودگی تا زند ئٹ مفسہ۔ بلکہ تینا قوم کن مرے۔ ہندا کتاب و توفک او وخت بندغ ءِ رد و راست نا پجار ءِ ہم کریفرہ۔ گڑا ہندن لال ہم تینکن اندا کسر ءِ گچین جوڑ کرے و تینکن مَش تا کسر ءِ ہَرفے و گام خلک ۔ لال تینا تعلیمی آسودگی ، بروکا وخت، زاتی خواہش دا کل ءِ اسے بلّو مسخت اسے نا مونا تِخا۔ بیرہ دا گڑا کہ ندر کرے کہ وطن نا آجوئی آن بیدس ننا زند بے مسخت ءِ او دا زند اِچ ننے بکار ہم اف ۔ گڑا داڑے دا بیرہ اسے ورنا سے نا کسر نا ہَلنگ الّو۔ بلکہ دا تینا ذات آن بلُن اسے تیوہ ءُ قوم سے نا رنج ءِ تینا رنج پو مرسہ پین جہان اسے نا خواست اس ہم ئس۔
ڈاکٹر اسینا کاریم بیرہ اسے جون سے نا دارو درمان کننگ اف ، بلکہ مرز نا جڑ تسکا سر مننگ نا پنے ۔ وہ جون نا تیٹی ڈکوکا مرز ءِ پٹک اونا سبب ءِ پو مریک۔ او پدا درمان کننگ نا تے کوشست ءِ کیک ۔ ہراتم ناجوڑ اسے تیوہ ءُ قوم ئس مرے ۔ گڑا اونا مرز ءِ ہرادے پٹنگ مریک اودے لال جان نا وڑ ءُ بیرہ لال اس پو مریک۔ ہندن
غلامی بیرہ زنجیر آتا پن اف ، تینا ڈغار آن تینا خواجئی نا پُلنگ او تینا گام تا آجوئی ءِ گوہنگ و تینا بروکا وخت نا بندغی حق آتیان مُر منگ و تخنگ نا پن ءِ ۔ دا اسے دنو مرز سے ہرا بِنا اٹ جون ءِ آخہ بلکہ بندغ نا شعور و روح ءِ مفلوج / ایسر کیک و بے کار جوڑک ۔ اسے قوم سے نا بندغ بظاہر زندہ مننگ کیک ، ولے او اشتماعی وجود سے آن دنو بیماری اسے اٹ آختہ مریک ، اونا توار ہر اُست اسکان سر مفک۔
لال جان اولی سال ٹی مننگ کیک دا گواچنی ءِ پو مسک۔ ہرادے پو مننگ اٹ باز وخت ہلتو بلکہ زند آک گدرینگیرہ ۔اگہ مریض اسے نا تیوہ راج اس ناجوڑ مرے ، گڑا درمان ہم بندغ نا وس آن پیشن مریک و فریشان مریک ولہ جوڑ مننگ نا تے کسر الم مریک لال جان ہمو کسر تا درمان مننگ ءِ تینا کاریم و کسر پو مسک ۔
لال خان نا استاد اودے بیرہ بندغی جون نا ساخت ءِ خوانیفے ۔اندن اُست انا دھڑکن ، دتر نا پیری کننگ ، عصاب دماغ نا حرکت و زندہ مننگ نا ایلو کل گڑاتے خوانیفے۔ ولہ زندگی لال خان ءِ اسے پین جون ئس نشان تِس پین جہان ئس ہم نشان تِس ہرا بلوچ قوم نا ڈیھ و ڈغار نا جہان اس۔
اندن بندغ نا جون اسے نا کنڈ ئس بیمار مرے تو تیوہ جون ءِ دَرک لگک و بے جارات مریک۔ اندن چاگڑد نا ہرا بشخ ئٹ دڑد ئس مرے گڑا ہمو تیوہ اشتماعی وجود نا دڑد جوڑ مریک۔ او دادے ہر بندغ پو مس گڑا پو مرے زند مننگ نا کسر انت ءِ ہرا کسر گچین پاننگک ۔
ڈاکٹر لال خان کن وطن بیرہ اسے ڈغارنا ٹکر ئس الّو بلکہ او ئسے زندہ ءُ گواچن اس اسکہ ۔ ہرا نا نبض تب ئٹ تینا بندغ تا رنج و غم ، محرومی، تغ ، و آجوئی نا خواست آک ہم اسُر۔
اندا سوب آن او تینا عملی دروشم ٹی کتاب آتے کرفسہ او مون کرے مش تا او پَٹیسہ شہید آتا کسر ءِ ہرفے۔ او ہموفتا دترتو وفا کرے۔ اونا دا عمل خواننگ آن بغاوت ئس الّو ، بلکہ خواننگ ءِ شونتری نا پین کنڈا دننگ نا کوشست اس ئس ۔ او جون نا ڈاکٹر ئس مننگ آن مُست اسے قوم ئسے نا تب ءِ چائسہ و پٹیسہ اِنا ۔ ہندن اندا داستان کسہ نا کل آن بلا بشخ ئس کہ او بِنا اٹ ہچو افسانوی کردار ئس الّو ۔ او اسے لس ورنا اس ئس ۔ تینا پچ و پوشاک تا خیال کریکہ ، ہر ہفتہ ٹی تینا ریش ءِ جوڑ کریکہ ، او نا ہم تغک اسُر ، او نا ہم مونا زندگی اس ئس ، ہرادے او تینا خن تا مونا جوڑ مننگ ئٹ خنیسہ ئس۔ ولے دوارہ اونا مونا اسے دنو سوج ئس بس ہرا اونا زاتی زندگی آن باز بلّو ورندی ئس خوائسکہ۔
ڈاکٹر تینکن آسودئنگا کسر تا جاگہ غا ہمو کسر تے گچین کرے ہراڑے او تینا بزگ آ قوم نا درد ءِ خناکہ و اندا درد اودے بے جارات کریسُس کہ بس وطن ارے تو نن ارین۔ او ننا پجار ارے او وطن لمہ ءِ۔ او لمہ ہر گڑا ءِ ۔ ہندن وخت تدے سا کرے ، زند ایسر مس ، ولے ڈاکٹر نا تینا کسر اینو ہم اسے سوج ئسے ،اسے درد ئسے، او کہ شہیدا آتا ہر ورنا تغ تے پوروینک کن تینا کوشست ءِ کے او اندا کوشست آتیان اوفتا روح تے جارات مِلک۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔