بلوچستان نا جتا انگا علاقہ تیان اسہ چنک سن خوانندہ اسیتون اوار پین ہفت بندغ نا زوراکی ئٹ بیگواہی نا رپورٹ آک درج مسنو۔ اوفتیٹی پسنی نا علاقہ شادی کور آن پاکستانی لشکر نا دو آن دزگیر مروک اِرا ایلم ہم اوار ءُ، ہندن کوئٹہ، پنجگور و ایلو علاقہ تیان ہم پنچ بندغ نا زوراکی ئٹ بیگواہی نا حوال آک ءُ۔
حوال آتا رد ئٹ، اسہ نومبر آ بلوچستان نا ساحلی شار پسنی نا ہند شادی کور آن پاکستانی لشکر کہدا گنج ولد دلداد و بیگمان ولد دلداد ءِ دزگیر کننگ آن گڈ نادرست ہند آ سر کرے، ہراڑان گڈ ہڑتوم آ بیگواہ ءُ۔ ہڑتوم آ ایلم ءُ۔
ارٹمی پارہ غان 27 اکتوبر 2026 آ کوئٹہ نا علاقہ کلی قمبرانی، قمبرانی روڈ آن پانزدہ سال ئنا خوانندہ یحییٰ بلوچ ولد پیر محمد ءِ نن ئنا 3:00 بجہ غا او نا اُراغان دزگیر کننگا۔ تروک حوال آتا رد ئٹ دا تدینی ئٹ آئی ایس آئی، ایم آئی و سی ٹی ڈی کارندہ غاک اوار پاننگ مسنو۔
ہندا وڑ پنجگور نا علاقہ پروم آن 5 اکتوبر 2026 آ ہژدہ سال ئنا ڈرائیور زبیر بلوچ ولد سید بلوچ ءِ جیراک بارڈر آن پیشیم دوآنزدہ بجہ نا وخت دزگیر کننگ آن گڈ بیگواہ کننگا۔ دا تدینی ئٹ ایف سی کارندہ غاتا اوار مننگ نا دوبہ خلنگانے۔
کوئٹہ نا علاقہ ایئرپورٹ روڈ آ لائیڈ اسکول نا خڑک آن 20 اگست 2026 آ بیست و پنچ سال ئنا محمد اعظم ولد خدا داد ءِ نن ئنا 1:00 بجہ غا دزگیر کننگ آن گڈ بیگواہ کننگا۔ او نا تعلقداری منوجان روڈ، ہدہ کوئٹہ غان ءِ و پیشہ نا بابت ئٹ ریڑھی بان ئسے۔
تروک شابیتی حوال آتا رد ئٹ آئی ایس آئی و سی ٹی ڈی نا کارندہ غاتے دافتا بیگواہی نا ذمہ وار پاننگانے۔
16 اکتوبر 2026 آ کوئٹہ نا علاقہ کرانی روڈ آن بیست و ہشت سال ئنا دکاندار ظفر بلوچ ولد حاجی غلام محمد ءِ سہب ئنا 3:00 بجہ غا دزگیر کریسا بیگواہ کننگا۔ تروک آ حوال آتا رد ئٹ، ظفر بلوچ ءِ ارٹمی وار ءِ بیگواہ کننگ مسونے و دا تدینی ئٹ ایم آئی و سی ٹی ڈی نا کارندہ غاتا دوبہ خلنگ مسونے۔