بلوچستان نا جتا انگا علاقہ تیان چار بندغ نا زوراکی ئٹ بیگواہی نا رپورٹ آک درج مسنو، ہرافتیٹی کوئٹہ غان اسہ خوانندہ اس ہندن ضلع آواران نا علاقہ جھاؤ آن باوہ و مار تو اوار مُسہ بندغ اوار ءُ۔
شابیتی حوال آتا رد ئٹ کوئٹہ نا علاقہ ایسٹرن بائی پاس نا رہائشی بیست سال ئنا خوانندہ کفایت بلوچ ولد ہدایت اللہ بنگلزئی ءِ 18 ستمبر 2026 نا نن کم و ود 9:00 بجہ غا یونیورسٹی آف بلوچستان نا مون آن دزگیر کریسا بیگواہ کننگا۔ تروک حوال آتا رد ئٹ، او نا زوراکی ئٹ بیگواہی نا ٹی کاؤنٹر ٹیررازم ڈیپارٹمنٹ (سی ٹی ڈی) نا کارندہ غاک اوار ءُ۔
ارٹمی پارہ غان ضلع آواران نا علاقہ جھاؤ ئٹ پاکستانی لشکر باوہ و مار ئتو اوار مُسہ بندغ ءِ دزگیر کریسا بیگواہ کرینے۔
شابیتی حوال آتا رد ئٹ 1 نومبر 2026 آ پاکستانی لشکر چھاپہ نا وخت مولا بخش ولد داؤد و او نا مار غفار ولد مولا بخش ءِ دزگیر کریسا نادرست ہند آ سر کرے، ہراڑان گڈ اوفتا بابت ئٹ ہچو حوال اس مون آ بتنے۔
ہندی حوالکار آتا رد ئٹ، درو پاکستانی لشکر علاقہ ئٹ اسہ پین چھاپہ اس خلیسا دوست محمد ولد احمد ءِ ترند بیدادی نا ٹک کریسا دزگیری آن گڈ بیگواہ کرے۔