دے کہی بلوچستان نا سیم سری علاقہ سراوان مزر ئٹ نادرست بندغ آتا سم کاری آن خضدار نا علاقہ نال کوڑاسک آن تعلق تخوکا حلیم ولد عبدالنبی بیران مسک۔

حوالکار آتا رد ئٹ حلیم تدوک کیہی سال آتیان دے کہی بلوچستان ئٹ مزوری کننگ نا سوب آن ہندی ئس۔

خاہوت نا پاننگ ءِ کہ درو اودے سراوان نا علاقہ مزر ئٹ نادرست بندغ آک سم کاری کریسہ کسفیر۔

واہم خون نا سوب آک سما تمنگ کتئور۔

بلوچستان ئٹ زوراکی نا بیگواہی تا لڑ سلتئو، پین اِرا بندغ نا زوراکی ئٹ بیگواہی نا کیس آک رپورٹ مسُر۔

شابیتی حوال تا رد ئٹ 13 اپریل آ شال ئنا کیب ئنا علاقہ ڈگاری آن اِرا ورنا نصیر ساتکزئی ولد قیصر خان و اکرام ساتکزئی ولد نور خان ءِ پاکستانی لشکر دزگیر کننگ آن گڈ بیگواہ کرینے۔

خاہوت آک اوفتا سرسلامت آجوئی نا خواست کرینو۔

خیال ئٹ مرے کہ اینو تربت، پسنی و شال آن مُسہ پین بندغ پاکستانی لشکر دزگیر کننگ آن گُڈ بیگواہ کرینے۔

بلوچستان ئٹ ہڑدیئی بنداو آ زوراکی نا بیگواہی تا کیس آک رپورٹ مریرہ۔

بلوچستان نا علاقہ پسنی، کوئٹہ و تربت آن پاکستانی لشکر پین مُسہ بندغ ءِ دزگیر کریسہ بیگواہ کرے۔

شابیتی حوال تا ردئٹ ضلع گوادر نا علاقہ پسنی ٹی پاکستانی فورسز سی ٹی ڈی نا کارندہ غاک اسہ اُرا ئسے آ چھاپہ خلیسہ ورنا ئسے دزگیر کریسہ زوراکی ئٹ بیگواہ کریر۔

بیگواہ ورنا نا چاہنداری سخی بخش نا مار شوکت نا پِن ئٹ مسنے، ہرا پسنی نا علاقہ ببر شور نا ہندی ئسے۔

حوالکار تا ردئٹ شوکت ءِ 14 اپریل نا نن دزگیر کننگ آن پد زوراکی ئٹ بیگواہ کرینو۔

ایلو پارہ غان منگچر نا ہندی ماہ دیم بلوچ نا پاننگ ءِ کنا ایلم ڈاکٹر نصیر نا مار سلال ءِ اینو پاکستانی لشکر نا کارندہ غاک ننا خاہوت نا مون آن زوراکی ئٹ بیگواہی نا گواچی کریسہ ننے اذیت ئٹی شاغانو۔

اونا پاننگ ئس کہ اینو اودے ہموتم زوراکی ئٹ بیگواہ کننگا ہراتم ننا خاہوت عئید آن پد منہ ساہت کن پکنک نا ردئٹ چلتن (کوئٹہ) نا پارہ غا ہناسن۔ نن تینا خاہوت تون ہموڑے ئسون کہ اِرا ویگو گاڑی بسر و ننا خن تا مون آن ننا ہفتدہ سال نا ایلم زوراکی ئٹ بیگواہی نا گواچی کریر۔

او پارے کہ ریاستی تادی ءِ اُربو کہ ریاست داسہ خاہوت آتیا پاش جلہو کننگ ءِ۔ کنا ایلم ہرا سیکنڈ ایئر نا خوانندہ ئسے۔

ماہ دیم بلوچ ریاستی ادارہ تیان خواست کریسہ پارے کہ نن ریاستی ادارہ تیان خواست کینہ کہ ننا ایلم ءِ آجو کیر یا اودے عدالت ئٹ ہتیر۔ ایلم نا زوراکی ئٹ بیگواہی نا برخلاف نن ہچ وڑ آ چپ مروفن۔

اندن کیچ آن رسینگوک حوال تا ردئٹ اینو 15 اپریل 2025 آ استو یک بجہ غا پاکستانی لشکر بلوچستان نا علاقہ تربت نا ہند جوسک آن شیرخان نظر ءِ دزگیر کریسہ نادرست ہند آ درینے، خاہوت اونا رکھوک آجوئی نا خواست کرینے۔

بلوچستان نا ضلع مستونگ ئٹی دشت روڈ آ بلوچستان کانسٹیبلری نا بس آ آئی ای ڈی بم جلہو ئٹ 3 کارندہ بیران و 19 ٹپی مسر۔

تراک دشت روڈ آ کنڈ مسوری نا خُڑک موٹرسائیکل ئٹ تخوک ریموٹ کنٹرول بمب ئٹ کننگانے۔

پولیس نا رد ئٹ بلوچستان کانسٹیبلری نا کارندہ غاک ڈیوٹی آن واپس بننگ اسُر کہ تراک مس۔ بیران و ٹپی مروکا تے اسپتال آ رادہ کننگانے۔

ڈی ایس پی مستونگ یونس مگسی نا پاننگ ءِ کہ مستونگ نا علاقہ کنڈ مسوری لیویز نا سم آتیٹ بریک، ولے تولوک برانز نا سوب آن ننا افسرک پولیس کارندہ غاتے لیویز تون ڈیوٹی تننگ نا حکم تسُر و ننا ورناک ہڑدے نا وڑ ڈیوٹی آن پد پولیس لائن مستونگ آ بننگ اسُر۔

او پارے کہ اینو 40 آن زیات کارندہ ڈیوٹی آن پد پولیس بس ئٹی واپس بننگ اسُر کہ موٹرسائیکل ئٹ تخوک ریمورٹ کنٹرول بمب ئنا ذریعت ئٹ تراک کننگا، تراک ئٹ مُسہ کارندہ بیران و 19 ٹپی مسر۔

بلوچستان حکومت نا ترجمان نا رد ئٹ غُٹ ٹپی مروکا تے اسپتال آ رادہ کننگانے، و بھوز ٹپی آتے شال آ رادہ کننگ ءُ ہرافتیٹ اِرٹ نا حالیت بھاز خراب ءِ۔

تدینی آن گُڈ بولان میڈیکل کالج اسپتال و سول اسپتال کوئٹہ ئٹ ایمرجنسی خلنگانے۔

بلوچستان ہائی کورٹ بندغی حق آتا جہدکار ڈاکٹر ماہ رنگ بلوچ نا مقدمہ، سی پی نمبر 358/25، نا فیصلہ ءِ بنفے۔

عدالت دا آئینی خواست نمائندگی ٹی بدل کریسہ اودے کاروائی کن سکریٹری داخلہ بلوچستان آ رادہ کرے۔

بلوچستان ہائی کورٹ نا اِرا باسکی بینچ اینو ڈاکٹر ماہ رنگ بلوچ نا کیس ئنا فیصلہ ءِ بنفے۔ عبوری چیف جسٹس اعجاز سواتی و جسٹس عامر رانا نا اِرا باسکی بینچ نادیہ بلوچ بنام گورنمنٹ آف بلوچستان کیس نا فیصلہ بنفسہ پنت تس کہ خواست تروک کل آتیان مُست تینا شکائست آتے وزارت داخلہ نا مونا دے۔

دا ہیت ءِ ڈاکٹر ماہ رنگ بلوچ نا وکیل عمران بلوچ چاگڑدی حوالکاری تلہ ایکس آ پک کریسہ پارے۔

تہار آ زند
(بلوچستان)

نوشتکار: جعفر قمبرانی

دی بلوچستان پوسٹ

سہب مروس یا نن، اونا خن تا مون آ تارمئی اس تالان ئس۔ تہار آ نن اونا کُننگ کن بسکہ، دے ئنا روشنائی ہم اودے ہچو فائدہ تتؤکہ، بلکن اوڑسکان رسینگتؤکا ہم۔ انتئے کہ او دہ (10) سال نا سے اسہ تارمہ ءُ کوٹھی سے ٹی بند ئسک۔ اوڑکن نن و دے ہچو مانی اس تختؤرہ۔ نن تو ایہن تہار ئس، دے تو اوکان ایشتِر۔

حمل نا دوک تفوک منا گِتمزی ءُ کوٹھی سے ٹی مُسن تموک ئس۔ نت مریفنگ ہم کتؤکہ۔ داسا تو او تینا بدن نا اُزبہ غاتے سرفنگ ہم یات آن دریسس۔ بلوچستان و بلوچستان نا دڑد آتیان بیدس اودے ہچو گڑاس یات بتؤکہ۔ او تینا جند ئنا پِن ءِ ہم گیرام کریسس۔ اودے تینا سنگت سیال عزیز و خڑک مُر ئنا مخلوق نا یات بسکہ ولے او غٹ ئنا چہرہ غاتے گیرام کریسُس۔ کیہی ساعت او بیرہ تینا لمہ نا بشخندہ ءِ است آ اتنگ کن ہم سوچاکا۔ دہ سال مسونے، ولے او تینا جند ءِ ہم خنتنے۔ او سوچاکا کہ مُسن تموک سما اف او ہرا رنگ اٹ مسونے۔ اودے تینا جند ءِ ہم خننگ نا بھلو حسرت اس ئسک۔ اونا مون آ وٹّی نا میلا غا دیک اودے بیرہ اسہ عکس اس نشان تننگ کریرہ۔ او عکس تو بندغ ئسے نا لگتؤکہ۔ جنڈی آ سہدار نا جوڑ آک کپ، مون تا تَرخس و خنک نیم کش ئسر۔ اودے سجتؤ کہ دا اونا جند ئنا عکس ءِ دیر ئٹی۔ او عکس ہموتم پناکہ کہ ہراتم او ہندا وٹی نا دیر تیان تینا دووی ءِ پالیفیکہ۔

سہب شام نا گمان ءِ او اسہ نادرست ءُ بندغ ئسے نا بننگ آن کریکہ۔ خیری ٹی مول، چشمکی آ امبل بریسا مر آن اوڑا اِرغ آتے کچک آنبار خساکہ و ہناکہ۔ اونا دَرون بِیرون ہم ہنداڑے مسکہ۔ چنکا کوٹھی بندغ آتا جاغہ آخا میڷ تا گیڈ اس لگاکہ۔ حمل کن سہدار آن پراگندہ غا دا زند داسا ہچو مانی اس تختؤکہ۔ او تینا درون بِیرون نا گند اتون ہم داسا ہیل کریسس۔ اودے سما الؤ کہ اونا بےگواہی ءِ دہ سال مسونے۔ اودے یات بسکہ کہ او بلوچستان اٹ تالان زوراکی نا برخلاف ہیت کریکہ۔ نوشت کننگ کتؤکہ ولے نوشتوک آتیتون مہر نا درشانی کریکہ کہ ہرا بلوچستان نا دڑد آتے نوشت کریسر۔ او سوچاکہ کہ اونا مہر اودے دنو بھلو سزا اس تریفے۔

وتن تون مہر اونا زند ءِ تہاری تا گواچی کریسس۔ او تو دا ہم تتؤکہ کہ اونا خڑک دارہ ایرہ غان پین کیہی بلوچستان نا لال آک اوڑانبار تہاری ٹی مُسن تموک روشنائی نا وداری ئسر۔ دافتیان کس اتون قلم ہلؤ کہ چِھٹی نوشت کروسر۔ کس نا دوک ملوک الؤر کہ تینا جند نا حالیت ءِ بیان کروسر۔

خدا غا وتن پرستی حمل ءِ بھلو ویل اسے ٹی شاغاسس۔ خدا ءِ ہم غاؤ تننگ کتؤکہ کہ اونا نت تے قبلہ و کاٹم ءِ دے ٹک ئٹی تننگاسس۔
گُڑا سما اف خدا اوڑان ہڑسینگاسس یا او خدا غان۔۔۔۔۔؟ ولے داسا او ڈغاری آ خدا تا دوٹی ئسک کہ ہرافتے تون ہر گڑا ئسک بیدس خدائی آ مہر آن۔

بلوچستان نا ضلع حب ئنا علاقہ وندر و شاہ نورانی نا خڑک آن اِرا جتا ہند آتیان اِرا بندغ نا جونک خننگانو۔

وندر نا دریابی علاقہ بریدہ کیمپ آن خڑک سمندر آن اسہ نادرست بندغ ئسے نا مُسٹ آن چار دے متکنو جون اس خننگانے۔ ایدھی حوالکار تا ردئٹ کہوکا بندغ نا سن کم و ود 35 سال پاننگک، واہم اونا چاہنداری دائسکان مننگ کتنے۔ جون ءِ بنائی کاروائی آن پد سول اسپتال حب آ دننگا۔

شاہ نورانی درگاہ آن خڑک اسہ بندغ ئسے نا جون خننگانے، ہرانا چاہنداری سید علی حسن شاہ نا مار عمران شاہ نا پِن ئٹ مسنے۔ پن کروک بندغ نا سن کم و ود 60 سال پاننگک۔ کمکار 1122 جون ءِ خڑک ئنا تھانہ غا درے، ہراڑے قانودی کاروائی آن پد اودے ایدھی ہوم سراب گوٹھ نا مردہ خانہ ٹی تخنگانے۔

کوئٹہ آن تعلقداری تخوک اِرا ورنا پاکستانی لشکر ہموتم زوراکی ئٹ بیگواہ کر ہراتم او پکنک آن واپس اُراغا بننگ اسُر۔

کوئٹہ نا جہی محمد یاسر پارینے کہ کنا ایلم محمد مدثر ولد محمد ظاہر شاہوانی تینا سنگت مدثر ولد منظور سبی آ ہناسُر و 11 مارچ آ سبی آن واپس اُراغا بننگ اسُر ولے دائسکان سر متنو۔

او پارے کہ نن اوفتے بھاز پٹان ولے دائسکان اوفتا بارو ئٹ ہچ حوال رسینگتنے۔ او ذمہ وار ادارہ تیان اوفتا آجوئی نا خواست کرینو۔

بلوچستان نا علاقہ وڈھ آن تعلقداری تخوک ورنا فہد مینگل نا بیگواہی نا برخلاف جہی مخلوق برانز کرسا کلی براہمزئی نا ہند آ کراچی کوئٹہ دگ ءِ بند کرینو۔

برانز ئٹ نیاڑی تا بھلو کچ ئس اوار ءِ، ہرا تولوک برانز کرسا خواست کرینو کہ فہد مینگل ءِ دمدستی آجو کننگِہ۔

برانزیک پلے کارڈ و بینر دو ٹی ہرفینو ہرافتیا فہد مینگل نا آجوئی نا حق ئٹ نعرے نوشتہ ءِ۔ تولوک برانز ئٹ اوار بندغ آتا پاننگ ءِ کہ ایسکان ورنا ئے آجو کننگپک، برانز برجاء مرو و کسر بند مرو۔

فہد مینگل نا خاہوت نا رد ئٹ، ورنا پنچ دے مُست تینا سنگت آتون اوار جاگہ ئس ہہِننگ اس کہ نادرست آ بندغ آک اودے زوراکی ئٹ بیگواہ کریر۔ تدینی نا حوال دمدستی جہی بست و بند ئے تننگا، ولے دائسکان ہچو گھامگیج متنے۔

دائسکان بست و بند یا قانود نافذ کروکا ادارہ غا تا پارہ غان تدینی نا رد ئٹ ہچو بیان مونا بتنے۔ برانزی تا پاننگ ءِ کہ اگہ اوفتا خواست آک پورو متور تو برانز نا پلویڑ پین بھلن کننگو۔

اینو کراچی نا علاقہ ملیر ئٹ بلوچ یکجہتی کمیٹی نا پارہ غان کشوکا پرامن ریلی آ پولیس سم کاری و لٹ و کٹ کرے، ہرانا سوب آن کیہی برانزی تے دزگیر کننگا۔ بی وائی سی نا ترجمان نا ردئٹ دا ریاستی تادی نا ترندی برانزی تیٹ سوختئی ودی کرینے۔

بلوچ یکجہتی کمیٹی نا دا ریلی کراچی نا شرافی گوٹھ، ملیر ئٹ اڈ تننگاسس، ہراٹی سد آ بندغ آک اوار مسر۔ اوار مروک آتیٹ بھلو کچ اس زالبول آتا ہم ئس، ہرا تینا بندغ آتا آجوئی کن بینرز و عکس ارفسہ اوار مسوسر۔ برانز کروک آک کوئٹہ نا جیل ئٹ بند بلوچ راہشونک ڈاکٹر ماہ رنگ بلوچ، بیبرگ بلوچ، بیبو بلوچ، شاہ جی بلوچ و ایلو سیاسی بندی تا آجوئی نا خواست کریر و نعرہ خلکر۔

ریلی تیوہ وڑئٹ پرامن ئس، ولے خن خنوک شاہدی تا ردئٹ پولیس ناگمان آن برانزی تے دانگ اینگ کننگ کن ہوائی سم کاری کرے، و پدان لٹ و کٹ کریسہ کیہی بندغ آتے دزگیر کرے۔ دزگیر مروک بندغ آتیٹ زالبول و ورناک ہم اوار ءُ، ہرافتے نادرست ہند آتیا دننگ نا حوال آک ہم رسینگسہ ءُ۔

بی وائی سی نا ترجمان سوج ارفینے کہ پرامن برانز ءِ طاغت نا ذریعت ئٹ لتاڑنگ نا انت سوب ئس؟ اسہ جمہوری ریاست اسیٹی سیاسی بندی تا آجوئی نا خواست کننگ امر ڈوہ اس مس۔

برانز کروک آتا پاننگ ءِ کہ بلوچ الس مالو آن تینا بندغ آتا زوراکی ئٹ بیگواہی، بیدس عدالت کسفنگ و ریاستی تادی تا گواچی ءِ، و داسہ اوفتے پرامن برانز نا ہم موکل تننگ افس۔

بی وائی سی نا ترجمان پارے کہ کراچی آن پد بلوچستان نا اہم صنعتی شار حب ئٹ ہم بلوچ یکجہتی کمیٹی نا پرامن برانزی تیا پولیس سم کاری و لٹ و کٹ کرے و کیہی بندغ آتے دزگیر کرے۔ دا تدینی سیاسی باسک و راہشون تا دزگیری نا برخلاف مروک برانز نا وخت مس۔

اینو بلوچ یکجہتی کمیٹی نا پاننگ آ تیوہ بلوچستان ئٹ برانز آتا لڑ برجاء ءِ۔ حب ئٹ برانز کروک آک ریاستی تادی، بیدس قانود دزگیری و سیاسی بندی تا دزگیری تا برخلاف برانز کریر، ولے ریاستی ادارہ غاک اسہ وار پدا پرامن برانز ءِ بیدادی نا ذریعت ئٹ لتاڑنگ نا کوشست کریر۔

خن خنوک شاہد آتا ردئٹ اندنکہ برانز مونی ہِنا، پولیس نا بھلو کچ اس ہمو جاگہ غا سر مس و پرامن برانزی تیا سم کاری و لٹ و کٹ بنا کرے۔ دا وخت آ کیہی برانزی تے بیدادی نا گواچی کریسہ دزگیر کننگا۔ برانز کروک آتیٹ زالبول، ورنا و کماش آک اوار ئسر، ہرا بلوچستان ئٹ زوراکی نا بیگواہی و بیدس عدالت گام تا برخلاف توار ارفنگ ئسر۔