تہار آ زند
(بلوچستان)
نوشتکار: جعفر قمبرانی
دی بلوچستان پوسٹ
سہب مروس یا نن، اونا خن تا مون آ تارمئی اس تالان ئس۔ تہار آ نن اونا کُننگ کن بسکہ، دے ئنا روشنائی ہم اودے ہچو فائدہ تتؤکہ، بلکن اوڑسکان رسینگتؤکا ہم۔ انتئے کہ او دہ (10) سال نا سے اسہ تارمہ ءُ کوٹھی سے ٹی بند ئسک۔ اوڑکن نن و دے ہچو مانی اس تختؤرہ۔ نن تو ایہن تہار ئس، دے تو اوکان ایشتِر۔
حمل نا دوک تفوک منا گِتمزی ءُ کوٹھی سے ٹی مُسن تموک ئس۔ نت مریفنگ ہم کتؤکہ۔ داسا تو او تینا بدن نا اُزبہ غاتے سرفنگ ہم یات آن دریسس۔ بلوچستان و بلوچستان نا دڑد آتیان بیدس اودے ہچو گڑاس یات بتؤکہ۔ او تینا جند ئنا پِن ءِ ہم گیرام کریسس۔ اودے تینا سنگت سیال عزیز و خڑک مُر ئنا مخلوق نا یات بسکہ ولے او غٹ ئنا چہرہ غاتے گیرام کریسُس۔ کیہی ساعت او بیرہ تینا لمہ نا بشخندہ ءِ است آ اتنگ کن ہم سوچاکا۔ دہ سال مسونے، ولے او تینا جند ءِ ہم خنتنے۔ او سوچاکا کہ مُسن تموک سما اف او ہرا رنگ اٹ مسونے۔ اودے تینا جند ءِ ہم خننگ نا بھلو حسرت اس ئسک۔ اونا مون آ وٹّی نا میلا غا دیک اودے بیرہ اسہ عکس اس نشان تننگ کریرہ۔ او عکس تو بندغ ئسے نا لگتؤکہ۔ جنڈی آ سہدار نا جوڑ آک کپ، مون تا تَرخس و خنک نیم کش ئسر۔ اودے سجتؤ کہ دا اونا جند ئنا عکس ءِ دیر ئٹی۔ او عکس ہموتم پناکہ کہ ہراتم او ہندا وٹی نا دیر تیان تینا دووی ءِ پالیفیکہ۔
سہب شام نا گمان ءِ او اسہ نادرست ءُ بندغ ئسے نا بننگ آن کریکہ۔ خیری ٹی مول، چشمکی آ امبل بریسا مر آن اوڑا اِرغ آتے کچک آنبار خساکہ و ہناکہ۔ اونا دَرون بِیرون ہم ہنداڑے مسکہ۔ چنکا کوٹھی بندغ آتا جاغہ آخا میڷ تا گیڈ اس لگاکہ۔ حمل کن سہدار آن پراگندہ غا دا زند داسا ہچو مانی اس تختؤکہ۔ او تینا درون بِیرون نا گند اتون ہم داسا ہیل کریسس۔ اودے سما الؤ کہ اونا بےگواہی ءِ دہ سال مسونے۔ اودے یات بسکہ کہ او بلوچستان اٹ تالان زوراکی نا برخلاف ہیت کریکہ۔ نوشت کننگ کتؤکہ ولے نوشتوک آتیتون مہر نا درشانی کریکہ کہ ہرا بلوچستان نا دڑد آتے نوشت کریسر۔ او سوچاکہ کہ اونا مہر اودے دنو بھلو سزا اس تریفے۔
وتن تون مہر اونا زند ءِ تہاری تا گواچی کریسس۔ او تو دا ہم تتؤکہ کہ اونا خڑک دارہ ایرہ غان پین کیہی بلوچستان نا لال آک اوڑانبار تہاری ٹی مُسن تموک روشنائی نا وداری ئسر۔ دافتیان کس اتون قلم ہلؤ کہ چِھٹی نوشت کروسر۔ کس نا دوک ملوک الؤر کہ تینا جند نا حالیت ءِ بیان کروسر۔
خدا غا وتن پرستی حمل ءِ بھلو ویل اسے ٹی شاغاسس۔ خدا ءِ ہم غاؤ تننگ کتؤکہ کہ اونا نت تے قبلہ و کاٹم ءِ دے ٹک ئٹی تننگاسس۔
گُڑا سما اف خدا اوڑان ہڑسینگاسس یا او خدا غان۔۔۔۔۔؟ ولے داسا او ڈغاری آ خدا تا دوٹی ئسک کہ ہرافتے تون ہر گڑا ئسک بیدس خدائی آ مہر آن۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک