بلوچستان نا ضلع حب ئنا علاقہ وندر و شاہ نورانی نا خڑک آن اِرا جتا ہند آتیان اِرا بندغ نا جونک خننگانو۔
وندر نا دریابی علاقہ بریدہ کیمپ آن خڑک سمندر آن اسہ نادرست بندغ ئسے نا مُسٹ آن چار دے متکنو جون اس خننگانے۔ ایدھی حوالکار تا ردئٹ کہوکا بندغ نا سن کم و ود 35 سال پاننگک، واہم اونا چاہنداری دائسکان مننگ کتنے۔ جون ءِ بنائی کاروائی آن پد سول اسپتال حب آ دننگا۔
شاہ نورانی درگاہ آن خڑک اسہ بندغ ئسے نا جون خننگانے، ہرانا چاہنداری سید علی حسن شاہ نا مار عمران شاہ نا پِن ئٹ مسنے۔ پن کروک بندغ نا سن کم و ود 60 سال پاننگک۔ کمکار 1122 جون ءِ خڑک ئنا تھانہ غا درے، ہراڑے قانودی کاروائی آن پد اودے ایدھی ہوم سراب گوٹھ نا مردہ خانہ ٹی تخنگانے۔