بلوچستان نا دارلحکومت کوئٹہ و کیچ آن پاکستانی لشکر نا دو آن زوراکی ئٹ بیگواہ چنک سن مار تون اوار چار بندغ یلہ مسور۔

شابیتی حوال آتا رد ئٹ برجا سال چار جنوری آ کلی قمبرانی آن زوراکی ئٹ بیگواہ کروک میر نصیب اللّٰہ و چنک سن مار گہرام ایلو سنگت آتون اوار یلہ مسر۔

داڑان بیدس تربت نا علاقہ سری کہن و آسکانی بازار آن اِرا بندغ ماجد ولد مولا بخش ہند آسکانی پنچ توہ پانزدہ دے بیگواہی و نور احمد ولد علی جان ہند سری کہن پنجا دے آن زوراکی ئٹ بیگواہی آن گڈ اینو یلہ مریسہ تینا اُرا غا سر مسر۔

بلوچستان ئٹ زوراکی نا بیگواہی تا برخلاف کاریم کروک آک حکومت آن خواست کرینو کہ کل بیگواہ بندغ آتے قانود نا رد ئٹ مون آ ہتنگے و زہمی خاہوت اتون انصاف کننگ مرے۔

بلوچستان نا بنجائی شار کوئٹہ نا علاقہ کلی سوراب خان قمبرانی ئٹ چار جنوری نا نن کم و ود یک بجہ غا اسہ اُرا سے آ کاؤنٹر ٹیررازم ڈیپارٹمنٹ (سی ٹی ڈی) و فرنٹیئر کور (ایف سی) نا کارندہ غاک چھاپہ خلکر، ہراٹی چار بندغ ءِ دزگیر کریسہ نادرست ہند آ سر کننگا۔ ہندا وڑ ضلع کیچ نا علاقہ مند آن ہم اِرا ایلم نا بیگواہی نا حوال آک ہم مون بننگو۔

ہندی بندغ و خاہوت نا رد ئٹ دزگیر مروک آتیٹی داؤد بلوچ ولد حاجی شاہ بخش، نصیب اللّٰہ ولد شہداد خان و اسہ چنک عمر مار گہرام ولد فیض محمد اوار ءُ۔

خاہوت نا پاننگ ءِ کہ تدینی آن گڈ دا چار انگا بندغ آتا اسہ ہم ڈس اس ملنگ کتنے، ہرا نا سوب خاہوت بھاز بے جاراتی و فریشانی نا گواچی ءِ۔

بیگواہ بندغ آتا سیال آتا پاننگ ءِ کہ نن نیمہ غا فورسز نا کارندہ غاک اُرا غا بسر، پٹ و پول کننگا و پن کروک بندغ آتے تینتو دریر۔ اوفتا پاننگ ءِ کہ نئے کہ دزگیری نا سوب پاننگا و نئے کہ دا پاش کریر کہ اوفتے ارانگ دریسہ ءُ۔

ایڑے ضلع کیچ آن حوال آک ءُ کہ پاکستانی لشکر مند ئنا علاقہ گوہرد ئٹ استو پاکستانی لشکر اُرا اُرا غا چھاپہ خلیسہ ہندا نیام ئٹ بشیر ولد گل محمد نا اُرا غا چھاپہ خلیسہ او نا اِرا مار سرور و حاضر ءِ دزگیر کریسہ نادرست ہند آ سر کننگانے۔

بلوچستان نا شار پنجگور ئٹ موٹر سائیکل آ تخوک بمب ئنا تراک نا سوب اسہ بندغ اس مرگ ئنا گواچی و کیہی بندغ آک ٹپی مسنو۔

تدینی اللّٰہ اکبر چوک ئنا خڑک مون آ بس۔

ٹپی تے دمدستی وڑ آ ہندی ہسپتال سر کننگانے، ہراڑے ڈاکٹر آتا رد ئٹ مُسہ ٹپی بندغ نا حالیت بھاز خراب ءِ۔

یکم جنوری 2026 پنج شمبے نا دے پڑو ادبی کچاری و نشست آن لائن نا پارہ غان اسے دے ئی تاریخی کتاب میلہ اس ساڑی سال ہم منیر احمد چوک آ کتاب ربیدگ ءِ شون تننگ و بلوچستان نا زیبا غا دروشم ءِ تالان کننگ کن “کتاب میراث جہد” نا پن اٹ اڈ پلک۔
۔
دا کتاب میراث جہد ئنا میلہ ٹی تاریخ، ادب، سیاست، فلسفہ، سائنس و صحافت نا سرحال براہوئی بلوچی، اردو انگریزی و ایلو زبان تیٹ ملکی و پیشن نا نوشتوک آتا کتاب آک ساڑی ئسر۔

دا میلہ سُہب ئنا 9 بجہ غان دیگر 5 بجہ اسکان برجا ئس ہراٹی ہر مکتبہ فکر نا ورناک، کماش اک، چُناک، زالبولک بشخ ہلکر و تینا دوست بروک کتاب ءِ بہا ٹی ہلیسہ سال ئنا جشن ءِ کتاب آن کریر۔

داکان بیدس بھلو کچ اسیٹی سیاسی راہشون تیتون اوار اوار ہندی علاقہ نا کماش آک ہم دا کتاب میلہ ٹی ساڑی مریسہ است بڈی کریر۔

دا تاریخی کتاب میلہ ہرا ہفت سال آن سخت یخ و گوریچ اٹ برجا ءِ میراث جہد نا پن اٹ ہڈ ہلیسہ ءِ۔ دا میلہ نا کماشی ءِ ” پڑو ادبی کچاری” نا چیئرمین و نشست آن لائن نا چیف ایڈیٹر سعید نور کرے۔

کتاب میلہ ٹی سریاب و شال نا ایلو علاقہ غاتیان بیدس شال آن پیشن نا مخلوق بشخ ہلک۔

پڑو ادبی کچاری نا چیئرمین سعید نور ساڑی مروک و بشخ ہلوک کل سنگت آتا منت واری ءِ کریسہ تینا کلہو اٹ پارے کہ دا نن کے داد ئنا ہیت ئسے کہ ننا دا کتاب میلہ ہرادے پڑو ادبی کچاری نا سنگت آک یکا تینا کمک تینٹ سریاب آن بناء کریر اینو مچ بلوچستان اٹ جتا جتا تنیظم و کتاب دوست آک سال نا بناء نا ردئٹ اٹ جتا جتا جاگہ غاتیا کتاب میلہ خلنگ ءُ۔

اندُن پڑو ادبی کچاری نا کل سنگت آک حنیف بلوچ، سگار بلوچ، امیر عباس ، منان کرد، احمد علی، عدنان بلوچ، ایلو سنگت آک ساڑی ئسر۔

بلوچستان نا ضلع پنجگور ئٹ پاکستانی لشکر اسہ کاروائی سے نا نیام ئٹ اسہ خاہوت نا پنچ ایلم و اوفتا کاکا ءِ دزگیر کریسہ نادرست ہند آ سر دننگا، ہراڑان گڈ اوفتا بابت ئٹ اسہ ہم وڑ ئسے نا ڈس اس ملنگ کتنے۔

دا تدینی استو پنجگور نا علاقہ بونستان چونگی ئٹ مون آ بس، ہراڑے پاکستانی لشکر اسہ اُرا ئسے آ چھاپہ خلک۔

حوالکار آتا پاننگ ءِ کہ دا نیام ئٹ علی پنی بندغ ئسے نا شش مار، امید علی، عالم، عادل، انس و اویس ہندن اوفتا کاکا اشرف ولد دین محمد ءِ دزگیر کریر۔

خاہوت نا رد ئٹ دزگیر کننگ آن گڈ دا بندغ آتے نادرست ہند آ سر کننگانے و دسکان اوفتا بابت ئٹ اسہ ہم ڈس اس تننگ متنے۔

بلوچستان ئٹ دا وڑ ئنا تدینی ہڑدے رپورٹ مریک، ہراڑے بندغی حق آتا تنظیم آک زوراکی ئٹ بیگواہی تیا خلیس درشان کریسہ کرینو۔ دا تنظیم آتا رد ئٹ بلوچستان ئٹ سال تیان دننگا بندغ آتا اسہ بھلو کچ اس بیگواہ ءِ ہرافتا اُرا والاک انصاف نا ودار ئٹی ءُ۔

کیچ، تجابان ئٹ زالبول آتون اوار زوراکی ئٹ بیگواہ بندغ آتا یلہ مننگ کن سی پیک بھلا کسر بند، برانز مسٹمی دے ہم برجا۔

تربت نا علاقہ تجابان ئٹ چار زوراکی ئٹ بیگواہ مروک آتا خاہوت آک بست و بند نا پارہ غان معاہدہ نا برخلافی نا برخلاف اسہ وار پین سی پیک بھلا کسر بلاک کننگا۔ برانز مسٹمی دے ہم برجا ءِ ہراڑے ترند یخ آن گڈ ہم زالبول و چناک نن ئنا تارمئی ئٹ روڈ آ ساڑی ءُ۔

برانزی تا پاننگ ءِ کہ ضلعی بست و بند آن تدوک ہفتہ ئٹ مروک آ مذاکرات ئٹ بیگواہ بندغ، خاص وڑ ئٹ زالبول آتا یلہ کننگ نا باور کرفنگاسس ہراڑان پد برانز ایسر کننگاسس واہم وعدہ غا تینا عمل وے کننگ نا سوب دوارہ برانز ءِ بنا کروئی تما۔

برانز کروک آتا رد ئٹ اسہ خاہوت ئسے نا چار بندغ دائسکان بیگواہ ءُ ہرافتیٹی اِرا زالبول اوار ءُ ہندن اوفتیٹی اسہ زالبول اس نوہ توہ ئنا نت کُبین ئسے۔ برانزی تا پاننگ ءِ کہ خاہوت نا آجو مفننگ بھلو خلیس اس ودی کرینے۔

ارٹمی پارہ غان برانزی تا پاننگ ءِ کہ فورسز تجابان آن تعلقداری تخوک اِرا زالبول تون اوار چار بندغ ءِ حب چوکی آن دزگیر کریسہ نادرست ہند آ سر کرے۔ برانزی تا رد ئٹ او بندغ آتا خودکش جلہو نا ڈٹ بندی نا دوبہ سوشل میڈیا غا پیری کریسہ ءِ ہرادے خاہوت و برازیک رد کیرہ۔

برانزی تا پاننگ ءِ کہ اسہ پارہ غان جہان پوسکن آ سال ئنا مجلس آتیٹ اختہ ءِ ہندن ارٹمی پارہ غان بلوچستان ئٹ زالبول و چناک تینا بندغ آتا یلہ مننگ کن ترند یخ ئٹ کسر آتیا برانز کننگ آ بیوس ءِ۔

دائسکان ضلعی بست و بند یا سیکیورٹی ادارہ آتا پارہ غان دا جیڑہ آ اسہ ہم سیدھا ءُ ہیت اس مون آ بتنے۔

بلوچستان ئٹ زوراکی ئٹ بیگواہی تا جیڑہ اسہ مرغن ءُ وخت ئسے آن نازرک مسونے، و بندغی حق آتا تنظیم آک وار وار داڑا خلیس پاش کریسہ کرینے۔

سی پیک بھلا کسر نا بند مننگ نا سوب نئے بیرہ ہندی آبادی بلکن ایلو ضلع آتیا سفر کروک آ مسافر آک ہم ترند زہمی مریسہ ءُ، ہندن برانزی تا پاننگ ءِ کہ اسکان اوفتا خواست آتے پورا کننگ متنے، برانز برجا مرو۔

ایران نا بست و بندی دے کیہی بلوچستان نا شار زاہدان ئٹ اہل سنت آن تعلقداری تخوک آ مولوی عبدالحمید اسماعیل زاہی جمعہ نا دے تینا تران ئٹ مُلک ئٹ برجا ساڑی آ دے تیٹ مروک آ برانز آتا ہیت ءِ کریسہ پارے کہ ‘ایرانی اُلس نا زند و زرگزرانی حالیت ترند سختی تا گواچی مروک ءِ’۔

او دا ہیت آ زور شاغا کہ ‘اُلس ءِ پرامن برانز نا حق دوئی ءِ و حکومت ءِ برانزی تیتون اوار ترند رویہ تینا کروئی اف’۔

او گیشتر مروک آ حالیت آتا پارہ غا اشارہ کریسہ پارے کہ ‘ نن کل ایرانی اُن۔ اینو بندغ آک لنگڑی نا گواچی ءُ و کیہی سرمایہ دار آتا ہم ترند سختی تیتون مون تِس ءِ۔ کالخواک بائدے اُلس نا توار ءِ بنر و اوفتا خواست آتیا پام ایتر۔

مولوی عبدالحمید ملک ئٹ کوپن سسٹم آ نغد کریسہ پارے کہ دنو اسکیم یا ڈٹ بندیک کاریمی مفسہ۔ کالخواہ تے اروئی ءِ کہ اُلس نا خواست انت ءِ، اُلس نا کسر و خواست ہی معیار ءِ، کس ئسے تینا ہیت ءِ زور ئٹ کس آ گڈو کروئی اف۔

ایران نا ‘کوپن سسٹم’ اسہ متکنو بست و بند ئسے ہرا وخت بے وخت زرگزرانی سختی و پابندی تا نیام ئٹ دور ئٹ تخنگسہ مسونے۔ دا بست و بند نا رد ئٹ مچٹ کھٹیا کروک آ شاری تے المی آ گڑا ہندن اِرغ و دیر نا گڑا (سی، بورہ، سو، برنج) و آہن اڑزان نرخ تون اوار تننگک۔

یاتی مرے کہ ایران ئٹ زر نا قدر ئٹی بے کچ کمی و گیشتر مروک آ کبینی نا برخلاف اُلسی برانز آتا کم و ود پنچ دے مالو بنا مسوسس ہرا دسکان برجا ءِ۔ برانزی و ایرانی فورسز نا نیام ئٹ تدوک پنچ دے ئٹ مروک آ دو پہ دو مننگ نا سوب دا وخت اسکان شش برانزی و اسہ پولیس کارندہ ئسے نا مرگ ئنا گواچی مننگ نا حوال آک ءُ۔

بلوچستان نا ضلع کیچ آن پاکستانی لشکر اسہ بندغ ئسے دزگیر کریسہ بیگواہ کرے۔ خاہوت نا رد ئٹ دا تدینی پنچ شمبے و جمعہ نا نیامیکو نن کیچ نا علاقہ گومازی ئٹ مون آ بسونے۔

ہندی بندغ و خاہوت نا پاننگ ءِ کہ پاکستانی لشکر نن ئٹ گومازی ٹی اسہ اُرا ئسے آ چھاپہ خلک و فضل ولد مولابخش پنی ءُ بندغ ئسے دزگیر کریسہ تینتو اوار دریر، ہراڑان گڈ او بیگواہ ءِ۔

خاہوت نا رد ئٹ فضل ولد مولابخش ءِ دزگیری نا اسہ ہم سوب اس پاننگ آن بیدس دریر و دسکان اوفتے او نا دزگیری یا ہند آن تعلقداری تخنگ تون تفوک ہچ اس پاننگ تنے۔

یاتی مرے کہ بلوچستان ئٹ زوراکی ئٹ بیگواہی تا ویل اسہ مرغنو وخت ئسے آن بندغی حق آتا ادارہ آتون اوار جتا انگا جہانی ادارہ آتا پارہ غان مون آ بریسہ کرینے۔