افسانہ: نیمہ دے
نجیب محفوظ| براہوئی مٹ: درناز رحیم
دی بلوچستان پوسٹ
ای تینا باوہ نا راستیکو دو ئے سوگوی ئٹ تورِسہ اوڑتون اوار ہِننگ اسُٹ۔ کنے پوسکنو پُچ بینوک اس، مونو کوش، سکول نا خرُن آ وردی، و خیسُنو ٹھوپ ئس۔ ولے کنے دا گڑا تا ہچ خوشی الو انتئے کہ اینو ہمو دے اس کہ کنے اولیکو وار اسکول ئٹ چغل تننگ اسر۔ نن ہِننگ اسُن و کنا لمّہ دروازہ غا سلوک ننے ہُننگ اس و ای وار وار آ کمک نا اومیت ئٹ اودے ہُننگ اسٹ۔ نن اسہ ہندنو کوچہ ئسیٹ ہِننگ اسن ہرا نا راستیکو و چپیکو پاسو آ فصل آک اسر و کرّک آتیٹ ہِلار و ناشپاتی نا رخت آتا قطار اس۔
“اسکول انتئے؟” ای ہرّفیٹ، “ای انت کرینُٹ؟”
“ای نے ہچ گڑا ئسے نا سزا تننگ افٹ” او مخِسہ پارے۔ “سکول سزا نا جاگہ ئس تو اف۔ دا اسہ ہندنو جاگہ ئس ءِ ہراڑے چُنا تہ اندنو بندغ جوڑ کننگک کہ و کاریم ئٹ بریر۔ مگہ نی تینا ایلم تا وڑ مننگ خواہپیسہ کہ اسہ کاریم ناس مریس۔؟”
ای دا ہیت ئٹی بتوٹ۔ کنے دا ہیت آ باور بتو کہ اُرا غان ہرفِسہ کنے دا بھلا دیوال ئیا ماڑی ٹی خسنگ ئٹ راستین نا فائدہ ئس ارے۔
ہراتم نن درگہ ئے سر مسن تو مار و مسن تیان پُھر انگا اسکول نا مونغی خننگ مسکہ۔
“تینٹ تہٹی ہِن و دافتتون حال حوال کر”، کنا باوہ پارے۔ “مون آ تینا بشخندہ ئس سارے و ایلوفتیکن گچینو مثیل ئس مر۔”
ای شش و پنچ ئنا حالیت ئٹ اونا دو ئے سوگوی ئٹ توریٹ ولے او کنا دو ئے مدا مدا تینا دو آن کشا۔ “نرینہ ئس مر”، او پارے۔ “اینو نی گواچن ئٹ تینا زند ئے بناء کننگ اُس، چُھٹی نا وختا ای داڑے نا گِنار ئٹ سلوک مروٹ۔”
ای منَہ گھام مُستی ہناٹ۔ داسا ای مار و مسن تا مون تِہ خننگ اسٹ۔ ای اوفتان اسٹ ئے ہم درست کتوٹہ و اوفتان کس ئس ہم کنے تتوکہ۔ کنے اندن مارشت مس کہ ای بدر ئسے اُٹ و کسر آن رد کرسا داڑے بسونٹ۔ ولے ولدا منَہ مارکو کنے تجسس ئٹ ہُننگ بناء کریر و اوفتان اسٹ کنے آن ہرّفے، “نے دیر ہیسُنے۔”
“کنا باوہ”، ای خلوت کرسا پاریٹ۔
“کنا باوہ کھسکنے” او بس انداخس پارے۔
کنے سما الو کہ داسا انت پاروئی ءِ۔ درگہ بند مسس۔ منَہ چُنا ہوغنگ بناء کریر۔ گھنٹی لگا۔ اسہ نیاڑیس بس ہرا نا بج آ منَہ نرینہ اسر۔ نرینہ غاک ننے ٹولی تیٹ بشخار۔ ننے بھلا بھلا ماڑی تا مرغن قطار نا نیامٹ تالان ہمو فراغت آ مونغی ٹی چیڑگنی ئٹ سلیفیر۔ ہر اسہ مزل آ ساڑی پاٹ تیٹ جوڑ کروک بِروی تیٹ ننے ہُننگ اسر۔
“دا نُما پوسکنا اُرا ءِ”، نیاڑی پارے۔ داڑے نُما لمّہ باوہ غاک ہم اریر۔ ہر ہمو گِڑا داڑے ارے ہرا نُمے سواد تننگ و خوش کننگ کیک۔ تینا خڑینک آتہ پھاکبو و خوشی ئٹ زند ئتون مون ایتبو۔”
اندن گمان مسکہ کہ کنا بد گمانیک بے بنیاد اسر۔ اولیکو پاس آن ای کیہی سنگت جوڑ کریٹ و کیہی مسن تتون مابت نا جوزہ ئٹ دزگیر مسُٹ۔ کنا گمان ئٹ ہم الو کہ اسکول داخس گچینو خوشی تروکو آزموندہ غا تیان پُھر مرو۔
نن کیہی وڑ ئنا گوازی کرین۔ باگلی آ کوٹی ٹی نن تینا اولیکو باگل ئے خلکن۔ بولی تون ہم ننا چائندئی مس۔ نن ڈغار نا گلوب ئے خنان ہرا پھیری کریکہ و داڑا کیہی ڈیہک و براعظمک خننگارہ۔ نن حساب کننگ ئے ہیل کرین و ننے خدا و کائنات نا جوڑ مننگ نا کسہ غا تِہ بنفنگا۔
نن خوئش تامو (خوش مزہ) ورغ کُنگن، قیلولہ کرین و بیدار مرسا تینا سنگتی و مابت، گوازی و ہیل کننگ ئے برجاء تخان۔
ننا کسر تیبہ اڑزان و خوئشی تیان پُھر الو۔ ننے سگھ ئٹ بھاز گڑا ہروئی مسکہ۔ دا بیرہ گوازی و مَستی کننگ نا معاملہ الو۔ داڑے دشمن تیان ساڑ ودی مننگ کریکہ ہراڑان جنگ مننگ نا ہم خُلیس اس۔ او نیاڑی ہراڑے وخت وخت بشخندہ کریکہ تو بھاز وار چِھڑاکہ و کوکار ہم کریکہ۔ بلکہ بھاز وخت او جسمانی سزا ہم تسکہ۔ داڑتون اوار داسا ارادہ بدل کننگ نا وخت ہم ایسر مسس و بہشت کون آ اُرا غا دوارہ ہِننگ اسُل منکن الو۔ ننا مونا داسا خواری، کوشست و نت تِہ توننگ (ثابت قدمی) آن بیدس ہچو کسر الو۔ ہرا لائخ اسر او وارخواہی تیان سواد ارفِیر و سرسوب مسر۔
گھنٹی نا توار دے و کاریم نا ایسری نا پڑو کرے۔ چُناک رُمبِسہ درگہ نا کنڈ آ ہنار ہرا دوارہ ملنگاسس۔ ای تینا سنگت آتِہ و مابت کروکا مسِن تیان رسخت کریٹ و درگہ آن پیشتماٹ۔ ای دانگ اینگ ہُراٹ ولے تینا باوہ نا، ہرا کنے آن مُست درگہ آن پیشن ساڑی مننگ نا قول کریسس، ہچو نشان خنتوٹ۔ ای اسہ پاسوئی اونا گنار ئٹ سلیسُٹ۔ مُرغن و بے سواد گنار آن گڈ ای فیصلہ کریٹ کہ ای تینٹ اُراغا کاو۔
ای منَہ گھام ہناٹ و ہبکہ مرسا سلیُٹ۔ او خدا! ہمو کوچہ ارانگ ہنا ہرا نا دامون ہیمون ئٹ باغ آک اسر ؟ او ارانگ گوئنگا ؟ دا غٹ اُلاخ آک اراتم داڑے بسر ؟ او دا غٹ بندغ آک اراتم ڈغار آ بسر؟ دا غڑدل تا ڈھیر ئنا مَشک کسر نا کرّک آتیا امر بسر؟ ہمو فصل آک ارانگ ہنار ہرا تومکا پاسو آن کسر نا کرّک آتیا اسر؟ ہر پاسو آن بھلا بھلا ماڑیک اسر، کوچہ غاک چُنا تیان پُھر اسر و چِھرک (تہو) ئٹ فریشان کروک شور ئنا توار اس۔ دانگ اینگ مداری سلوک اسر ہرا تینا ٹوکری تیان دوشہ کشِسہ وا غئیب کننگ نا کرتب نشان تننگ اسر۔ ولدا اسہ بینڈ ئس اسک ہرا سرکس نا بناء مننگ نا پڑو کننگ اس ہرا نا مون ئٹ مسخرہ و پہلوانک ہِننگ اسر۔
او خدا کنا! ای ہبکہ مسُٹ۔ کنا مِلی پھیری کننگ ئٹی اس۔ بیرہ اسہ نیمہ دے ئٹی، سہب و نن ئنا یام ئٹ، دا غٹ امر مننگ کیرہ۔ اُراغا سر مسُٹ تو کنے تینا باوہ غان دا سوج ئنا ورندی رسینگو۔ ولے کنا اُرا ارانگ ءِ؟ ای چھار راہ ئنا کنڈ آ رُمب کریٹ انتئے کہ کنے یات اس کہ اُرا غا سر مننگ کن کنے روڈ آن ہیمون ہنوئی تمو۔ ولے اُلاخ آتا موڷ کنے ہیمون ہِننگ الیتو۔ بھاز فریشانی و ہبکئی نا حالیت ئٹ ای سوچاٹ کہ سما اف اراتم ای روڈ آن ہیمون ہِننگ نا لائخ مروٹ۔
ای بھاز ہُرے اسکان ہموڑے سلوک اسٹ و ہموتم کرّک آ پُچ سلوکا (دھوبی) نا دکان آن پُچ استری کروکا کاریمی آ مارکو کنا رہا بس۔
او تینا دو ئے کنے آ مُستی کرے و پارے، “بابو، بر ای نے روڈ آن ہیپار دیو۔”
انگریزی سرحال: Half a Day
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
