دالبندین شار نا دکاندار و کرایہ نا ارا خواجہ غاتا المی مجلس آن گڈ پریس کانفرنس۔ خلیس ءِ مر کننگ آن بیدس ماسٹر پلان تون ہننگ آن نمن۔
دالبندین نا شار نا دکان تا خواجہ غاک باور کریفنگ و خلیس ءِ مر کننگ آن بیدس ماسٹر پلان آن نمن مریسہ دا بابت ئٹ عدالت آ ہننگ نا تڑی تسر۔
نوتیزئی ہاؤس سرگیشہ ٹی دالبندین نا شار ئٹ لندن روڈ و خڑک نا دکان و اراتا خواجہ غاتا المی مجلس مست ئنا ڈسٹرکٹ چیئرمین میر داود خان نوتیزئی نا صدارت تون ہڈ تننگا۔ ہراٹی بھلو کچ اسیٹی مخلوق اوار مس۔
مجلس آن گڈ میر داود خان نوتیزئی، ملک امان اللہ نوتیزئی، حاجی عبدالباسط محمد حسنی، سردار مدد خان آکازئی، راجیش کمار، دیس ناگپال و ایلوفک پریس کانفرنس ٹی خیال آتا درشانی ءِ کریسہ پاریر کہ اوفتے دالبندین شار نا ماسٹر پلان نا بابت خلیس و بے باوری ارے۔
اوفک پاریر اُلس نا نمائدہ و ہل و تس تخوک کوالخواک مچ آتیان المی اسٹیک ہولڈرز تے باور ٹی ہلنگ افس، ساڑی حالیت آک پاش مفروک ءِ۔ اندن دا نیامٹ دکان و اراتے آ تیا نشان خلنگانے ہرا دافتے دڑفنگ نا منصوبہ بندی ءِ پاش کیک۔ دا وڑ ئٹ ارا خواجہ غاک بھاز بے جاراتی ودانے ہرادے مر کننگ بھاز المی ءِ۔
او پاری کہ دا بابت ئٹی اوفک شابیتی تون چمشانک آن پد اسہ پانزدہ باسکی کمیٹی اس ہڈ تسونو ہرانا اِرا باسک دا بابت ئٹ خواست المی مننگ آ عدالت نا درغ ءِ ہم ٹھکیفنا۔
او پاریر کہ اوفک دا سرپد مننگ افس کہ دا ہرا وڑ نا ماسٹر پلان ئسے ہراٹی ہر ہیت ڈھکنگک اگا دا گڑاک دن ہنیسہ کریر گڑا ہزار آ بندغ تا بے روزگار مننگ نا خلیس ءِ ہرا ہچبر مننگ کن ہلنگپرو۔
او پاریر کہ نن مُستی ہننگ نا خلاف افن بائدے ماسٹر پلان نا بابت پاش ءُ منصوبہ اس مرے نہ تو دالبندین نا شار نا دکان و ارا خواجہ غاک تینا باوہ پیرہی میرات ءِ کس ئنا انا و فائدہ ارفنگ کن الپرون۔