بلوچستان آن شینک مروک آن لائن نیوز نیٹورک کرنٹ بلوچستان دو شمبے نا دے دی بلوچستان پوسٹ ایڈیٹوریل بورڈ تون مروک اسہ حوالکاری اوڑدہی اسیٹی ٹی بی پی نا ادارتی پالیسی تون امناہی کریسہ بیدس شڑط آتیان پورو دی بلوچستان پوسٹ میڈیا نیٹورک ئٹ اوار مننگ نا پڑو کرے و بروک آ وخت دی بلوچستان پوسٹ نا تلہ غان تینا صحافتی ذمہ واری تے ایسری تننگ نا فیصلہ کرے۔
کرنٹ بلوچستان مسہ بولی بلوچی، انگریزی و عربی ئٹ شینک مروک اسہ آن لائن نیوز نیٹورک ئسے۔ ہرا جتا چاگردی حوالکاری سائٹ آتے کاریم اٹ ہتیسہ تینا خوانوک آتے اسکان تدوک اِرا سال آن بلوچستان نا حوال و گواچنی حالیت آتے سرکننگے۔
دو شمبے نا دے مروک اوڑہی اٹ کرنٹ بلوچستان نیوز نیٹورک نا ٹیم دا پڑو ءِ کرے کہ او بلوچستان پوسٹ نا ادارتی پالیسی و کاریم نا وڑ ڈول تون پورو امناہی کریسہ، کرنٹ بلوچستان ءِ بیدس شڑط آن ٹی بی پی ئٹ اوار کریسہ تینا آنلائن پنہ غاتے و بلاگ نا ساڑی حالیت ءِ دمدستی تون ایسر کرور۔ اوفک داڑتون اوار تینا خوانوک آتے آن خواست کریر کہ او بروکا وخت ئٹ حوال، چمشانک، تیدری و نوشت آتے اسکان سر مننگ کن دی بلوچستان پوسٹ نا آفیشل ویب سائٹس و راجی حوالکاری نا پنہ غاتیا کار۔
یاتی مرے دی بلوچستان پوسٹ دا وخت چار بولی انگلش، اردو، بلوچی و براہوئی ئٹ چار جتا ویب سائٹ آتیا شینک مریک۔ داڑان بیدس راجی حوالکاری نا ویب سائٹ فیس بک، ٹوئیٹر، وٹساپ، ٹیلی گرام، انسٹاگرام آ ہم ٹی بی پی بھلو ہند اس دوئی کرینے۔ داڑتون اوار ٹی بی پی پبلشنگ ہاؤس آن دائسکان اسہ کتاب ئسے نا شینکاری مسونے و مُسہ پین کتاب نا شینکاری آ کاریم برجاء ءِ۔