افغانستان ٹی ڈیوٹی نا وختا مسہ زالبول پولیو ورکرز ءِ سلاء بند بندغ آک سم کاری کریسہ کسفیر۔
افغان میڈیا نا پاننگ ءِ پولیو تروک مُسہ زالبول ءِ صوبہ ننگرہار نا شار جلال آباد ٹی سم کاری نا اِرا جتا تدینی تیٹ کسفینو۔
ہندی میڈیا نا پاننگ ءِ سم کاری نا اولیکو ویل سہب ئنا 11 بجہ آ مس، ہراڑے جلال آباد نا علاقہ مجبور آباد ٹی نادرست سلا بند ڈودار آک پولیو تروک اسہ زالبول ئسے ڈیوٹی نا وختا سم کاری کریسہ کسفیر۔
سم کاری نا ایلو تدینی اوکان اسہ گھنٹہ ئسے آن گڈ مس و جلال آباد نا علاقہ لال قاسم آغا ٹی نادرست بندغ آک سم کاری کریسہ اِرا زالبول ورکرز ءِ کسفیر۔
افغانستان و پاکستان ٹی پولیو ورکرز آتا خوْن ئنا بھازا تدینیک داکان مست ہم مسونو، ہرا تیٹ بھاز آ تدینی تا ذمہ واری ءِ مذہبی تنظیم آک ارفیسہ کرینو۔