بساک و بی ایس او، راہشونی نا وسیلہ غاک
محمد عمران لہڑی
دی بلوچستان پوسٹ
منہ دے مُست بلوچستان نا خوانندہ غاتا اِرا بھلا گَل آتا بنجائی لس مجلس تدوکا ذمہ وار باسک آتا کمک اٹ سرسہبی اٹ ہڈ ہلیسہ بروکا وخت اکن پوسکنا لس مجلس نا باسک آتے گچین کریسہ ایسر مس۔ بنجائی لس مجلس خوانندہ گَل آتا ہمو دیوان ءِ ہراٹی کہ اسے گَل سینا مچا شیفی بڑزیک مننگ کیرہ، گَل ہرانا وسیلہ اٹ مونی کائک یعنی راہبند، اوٹی ہم رد و بدل اندا دیوان اٹ مننگ کیک تو دا گَل نا کُل آن بھلا ادارہ ءِ۔ ایہن تو راہبند نا کمک اٹ ہر ارا سال آن پد دا دیوان ہڈ ہلیک و بروکا ارا سال کن لس مجلس نا باسک آک گچین مریرہ ولے باز وخت حالیت و واقعات آتا دُو آن مونی پدی مننگ کیک۔ اسے گَل سینا سرسہبی اندا گڑا غان ہم پاش مریک کہ او اِرا سال اٹ خوانندہ غاتا راہشونی ءِ کرسہ اوفتا ویل آتا ایسری تون اوار مچا باسک آتا سیوت اٹ ارٹمیکو بنجائی لس مجلس اسکان سر مرسہ بروکا اِرا سال کن لس مجلس نا پوسکنا باسک آتا گچین کاری تے کرسہ ایسر مرے۔
بلوچ اسٹوڈنٹس آرگنائزیشن نا بنجائی لس مجلس 19، 20، 21 مارچ 2021 شال ٹی شہید چیئرمین منظور بلوچ، شہید حیات بلوچ نا پن اٹ و واجہ عطاء شاد نا یات اٹ ہڈ ہلک۔ دا دیوان تدوکا لس مجلس نا باسک آتا کمک اٹ مسہ دے برجاء سلیسہ بھاز سرسہبی اٹ بروکا وخت اٹ گَل ءِ شون تننگ و سرسہبی اٹ خوانندہ غاتا مسخت ءِ دوئی کننگ کن لس مجلس نا پوسکنا باسک آتا گچین کاری تے کرسہ ایسر مس۔ بروکا وخت اکن بی ایس او نا کماش جہانگیر منظور بلوچ گچین کننگا۔ بلوچ خوانندہ غاتا اندا امیت ءِ کہ پوسکنا گچین مروکا باسک آک اسے پوسکنو جوزہ و تُرندو ہمت سیٹی تعلیمی پڑ آ ساڑی وخت نا گُرج آتے سرپند مریسہ تینا ورنا تا کمک و راہشونی ءِ کیرہ۔
ارٹمیکو خوانندہ گَل بلوچ اسٹوڈنٹس ایکشن کمیٹی نا بنجائی لس مجلس نا دیوان 26، 27، 28، مارچ 2021 آ شہید رزاق بلوچ و ایماندار الیاس بلوچ نا یات اٹ و سنگت فیروز بلوچ نا پن اٹ کراچی ٹی ہڈ تننگا۔ دا مُسہ دے ئی دیوان سرسہبی اٹ ایسر مرسہ اِرا سال کن لس مجلس نا باسک آک گچین کننگار ہراٹی گَل نا کماش ڈاکٹر صبیحہ بلوچ گچین کننگا۔ بلوچ راج اکن دا ہم اسے بھلو سرسہبی سے کہ خوانندہ غاتا راہشونی ٹی زالبول آک ہم کڑد دوئی کننگ ءُ، جہان نا دیہاڑ اٹ دا نوشتہ ءِ کہ راج آتا شونداری و سرسہبی اٹ زالبول آتا بھلو کڑد اس مسونے۔ بلوچستان نا دیہاڑ اٹ دا ارٹمیکو زالبول ءِ ہراکے خوانندہ گَل نا کماش گچین کننگا۔ داڑان مُست شہید بانک کریمہ بلوچ ( بانک ءِ تدوکا سال نا آخریکو تُو دسمبر اٹ کینیڈا ٹی شہید کننگا) بناء ٹی اسے خوانندہ گَل سینا کماش جوڑ مس۔
اینو نا دور اٹ اگہ بلوچ راج نا خوانندہ غاتا کڑد آ چمشانک اس شاغنگے تو بھاز آ بدلیک نظر بریرہ، دا بدلی تیٹی سرسہبی نا ہم ارے و بے سرسہبی و نزوری نا بدلیک ہم خننگیرہ۔ اسے جاچ اس تینا خوانندہ غاتا سرسہب و شوندار آ کڑد نا ہلین تو دا نظر بریک کہ اینو نا خوانندہ غاک شعوری وڑ اٹ تینا زند ءِ تیر کرسہ کتاب تون سنگتی کننگ ءُ، اینو نا اکثر ورناک نوشت و خوان نا پارہ غا خیال کننگ ءُ، تینا فارغ آ ساعت آتے لائبریری تیٹی تِیر کننگ ءُ، ورنا تا کڑد اٹ دا ہم نظر بریک کہ تینا راج، بولی، دود و ربیدگ نا شونداری کن بھاز جوزہ اٹ بیدس جوفہ و غرض آن کاریم کننگ ءُ، چاگردی گندئی تے راج آن ایسر کننگ کن ہر پڑ آ کوکار کننگ ءُ و گلی، کوچہ و ہنکین تیٹی اندا گندئی خاص کر نشہ آن برخلاف شعور تالان کرسہ مخلوق اٹ سرپدی تالان کننگ ءُ۔
دا گَل آتا تدوکا کاریم تا جاچ اس ہلین تو دا سما تمک کہ دا تنظیم آک بلوچ راج اٹ راجی شعور، کتاب کلچر، تعلیم دوست، تینا بولی تون مہرو محبت، تینا دیہاڑ و تہذیب آن واقف مننگ و خوانندہ غاتے بروکا وخت اٹ سرسہب مننگ نا کمک و راہشونی کرسہ سختی سوری تے سگیسہ تُرندی اٹ مونی گام خلکنو۔ بھاز جاگہ نزوریک ہم اندا گَل آتے پلویڑ کریسہ بے سہب مسونو۔ داسہ امیت اندادے کہ پوسکنا عہدہ دار آک تدوکا وخت نا نزوری تے مونی تخیسہ تینا گَل ءِ بچیفسہ خوانندہ غاتے ساڑی وخت نا گُرج و چیلنجز آتے مون تننگ نا راہشونی و کمک ءِ کرور۔
بی ایس او تدوکا وخت اٹ خوانندہ غاتا تعلیمی ویل آتا ایسری کن تُرندی اٹ جہد کرے۔ اندا ویل آتیٹی فیس آتا ناجائز ودیفنگ، یونیورسٹی تیٹی خوانندہ غاتا سیاسی سرگرمی تے بند کننگ، بلوچ خوانندہ غاتے بیگواہ کننگ، یونیورسٹی تیٹی زالبول آتے تنگ و بلیک میل کننگ، خوانندہ غاتے ہاسٹل تیان کشنگ، کالج و یونیورسٹی تیٹی پوسکنا داخلہ نا ویلاک، ایلو صوبہ غاتیٹی بلوچستان نا reserve seat آتے ایسر کننگ و پین کہی چنکا بھلا ویل آتا ایسری کن پُرامن ڈول اٹ جہد کننگا۔ بی ایس او نا باسک آک بلوچ خوانندہ غاتا ویل آتا ایسری کن عدالت آتیٹی ہم کیس آتے خلیسہ ایسری نا کوشست ءِ کریر دنکہ کرونا وائرس نا دور آن لائن کلاس آتا ویل۔ داکان بیدس راجی شعور تالان کننگ، ورنا تیٹی کتاب نا شونق ودیفنگ و تینا راجی ذمہ واری تے پُوہ مننگ کن دیوان، سرکل و سیمینار آک ہڈ تننگار۔
بساک نا تدوکا کاریم تا بھلا سرسہبی دادے کہ بھاز گچین ڈول اٹ بلوچستان و بلوچستان آن پیشن نا تعلیمی ادارہ غاتیٹی “کتاب کاروان” نا پِن اٹ راج اٹ کتاب کلچر ءِ تالان کرسہ ہر ہنکین و گدان اسکان سر کننگ نا سرسہب ءُ کوشست اس کرے۔ ارٹمیکو بھلا سرسہبی دادے کہ تینا گَل نا ترجمان میگزین اس “نوشت” نا پن اٹ شینک کننگ ءِ برجا کرے۔ دا بیرہ خوانندہ غاتا نوشت و خوان نا لائخی تے مونی ہتنگ نا وسیلہ اف بلکہ بلوچ راج نا بولی براہوئی و بلوچی ٹی شینک مریسہ بولی تے شون تننگ نا اسے سوبر ءُ کڑد ئسے۔ نوشت ارٹمیکو شمارہ نا مون پاشی ہم اندا بنجائی لس مجلس نا دیوان اٹ مس۔ اسے پین سرسہبی اس بساک نا ورناک دا دوئی کریر کہ تینا بیگواہ غا سنگت فیروز بلوچ (ہراکے منہ ہفتہ مُست آجو مرسہ خیر خوشی اٹ تینا اراغا سر مس) نا پن اٹ “بُک ڈونیشن کمپئین” اس برجا کرے ہراٹی زون و یونٹ نا باسک آک تعلیمی ادارہ غاتیٹی کیمپ خلیسہ کتاب مُچ کریر ولدا اندا کتاب آتے بلوچستان نا علاقہ غاتا السی لائبریری تیکن مُون تسر۔ یقیناً دا راج نا شونداری و ورناتے کتاب تون سنگتی کننگ نا اسے بھلو کڑد ئسے۔ کرونا وائرس نا وخت اٹ تعلیمی ادارہ غاک بند کننگار و خوانندہ غاتا کلاس آتے انٹرنیٹ نا وسیلہ اٹ برجا تخنگا۔ بلوچستان نا خوانندہ غاتیکن دا اسے بھلو ویل اس ئس۔ انتئے کہ بلوچستان نا گڑاس شار تیان بیدس مچا بلوچستان اٹ انٹرنیٹ نا سگنل اف۔ اندا ویل نا ایسری کن بساک نا باسک آک برانز کریر داڑاسکان قید و زندان تیٹی بند کننگار۔ داکان بیدس ایلو تعلیمی ویل و بلوچ بیگواہ تیکن ہم ہر فورم آ ہیت کریر۔
اگہ اندا گَل تا تدوکا وخت نا نزوری تیا چمشانک اس شاغن تو کنا خیال اٹ کُل آن بھلا نزوری دا ئس کہ گَل آتیٹی باسک آتا تربیت مفرنگ نا برابر ئس ہرانا سوب آن خوانندہ غاتیٹی راہشونی نا لائخی بھاز کم ءِ۔ خوانندہ گَل آتا ذمہ دار آتیکن دا گڑا المی ءِ کہ او ہمو وخت اٹ گَل نا ورناتا انداخہ تربیت و اوفتیٹی لائخی ودی کیر تانکہ بروکا وخت اٹ ہمو باسک آک خوانندہ غاتا راہشون جوڑ مریسہ راج ءِ شون ایتر۔ ورنا تا راہشونی کننگ کن المی ءِ کہ ساڑی وخت نا گرج آتے پُو مننگ، کتاب آتا مطالعہ نا شونق تخنگ، وخت نا ترندی ءِ سرپند مریسہ تیر کننگ، تینا ہیت و گپ، تول بش اٹ ورنا تیٹی شعور تالان کننگ و اوفتیٹی سرسہبی کن جہد کننگ نا جوزہ ودی کننگ کونا کڑد آک مریر۔
داکان بیدس بلوچ خوانندہ گَل آتیٹی سیوت نا کمبوتی ہم اسے بھلو نزوری ئسے۔ بائیدے کُل بلوچ گَل آک خوانندہ غاتا ویل آتا ایسری کن سیوت اٹ گام ارفیسہ جہد کیر۔ دنکہ تدوکا وخت اٹ کرونا وائرس نا دُو آن تعلیمی ادارہ غاتا بند مننگ آن گڈ آن لائن کلاس آتا ویل نا بنا مس دا بلوچستان نا خوانندہ غاتیکن اسے بھلو ویل اس ئس، دانا ایسری کن اندا خوانندہ گل آک اسٹ اسٹ مرسہ برانز کریر، اگہ سیوت اٹ برانز مرے تو اوٹی بھلو طاغت اس مریک۔ دنکہ بی ایم سی نا مسئلہ نا زی آ کُل سیوت اٹ برانز کریر ہرا ایسر مس۔ ٹیک تینا گَل نا کاریم و پالیسی تے ہر اسٹ تینائی کریسہ جہد کے ولے ہرا وخت کہ ویل اس مچا بلوچ خوانندہ غاتے پلویڑ کرے تو اوڑے بائیدے دا کُل تنظیم آک سیوت اٹ جہد کیر۔
پوسکنا گچین مروکا باسک آتیان اندا امیت ءِ کہ بروکا وخت اٹ ساڑی دور نا گُرج آتے مونی تخیسہ سائنسی راہبند آتیا خوانندہ غاتا راہشونی و کمک ءِ کرور۔ تعلیمی ویل آتا ایسری و راجی شعور تالان کننگ کن زند نا ہر پڑ آ جہد و کوشست کرور۔ بلوچ خوانندہ غاتا ویل و سختی تے ایسر کننگ کن سیوت اٹ گام خلور۔ اندن تدوکا وخت نا نزوری تے اُست آ تخیسہ ولدا ہموتا گواچی مفرور و سرسہبی تے پین ترند کننگ کن بلوچ خوانندہ غاتیٹی تینا راج، دیہاڑ، تہذیب و دود ءُ ربیدگ نا آگاہی و معلومداری تالان کریسہ مُستی گام ارفور۔ بی ایس او، بساک مدام بلوچ راج نا بروکا وخت کن تینا ورنا تا راہشونی نا وسیلہ جوڑ مریسہ جدوجہد ءِ برجا تخور۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔