بلوچستان نا بھلا شار کوئٹہ ٹی غٹ محکمہ غاتا سرکاری نوکر آک اسے جاہ مریسہ گرینڈ الائنس نا پنٹ برانزی مچی اینو مسٹمیکو دے ام برجاء، دا برانزی مچی وزیر اعلیٰ نا اُرا نا خڑک ہاکی چوک آ برجاء ءِ۔
گرینڈ الائنس نا غٹ آن بھلا خواست دادے کہ سرکاری نوکر آتا پگار ٹی 25٪ ودکی کننگ مرے، انتیکہ منہ وخت مست غٹ پاکستان نا ملازم آک پاکستان نا بھلا شار اسلام آباد ٹی برانزی مچی کریر اوکان گڈ پاکستان نا وفاقی وزیر آک سرکاری نوکر آتا پگار ٹی 25٪ ودکی نا موکل تریسہ غٹ صوبہ آتے لکھار کہ او تینا ملازم آتا پگار ٹی 25٪ ودکی کیر ولے بلوچستان نا حکومت دائسکان تینا ملازم آتا پگار ٹی ودکی کتنے۔
دا حوالہ ٹی وزیر اعلیٰ بلوچستان جام کمال خان نا پاننگ ءِ کہ اگہ نن دا ملازم آتا پگار ٹی 25٪ ودکی کین گڑا حکومت نا خزانہ خالی مریک پدا مسے سال کن ترقیاتی کاریم آک سلیرہ و صوبہ ءِ چلیفنگ کن ننے وام ہلوئی تمک۔
بلوچستان حکومت نا ترجمان لیاقت شاہوانی نا دا ردئٹ پاننگ ءِ کہ دا برانزی مچی کروکا سرکاری نوکر آتا پگار ٹی ودکی کننگ نا مطلب دادے کہ سرکار آن 15 ارب رپئی کائک، آیا نن دا 15 ارب روپئی اندا ملازم ایتن یا 15 ارب تخیسہ دافتا جاگہ غا پین ملازم بھرتی کین۔
یاتی مرے بلوچستان حکومت نا پارہ غان درو نا دے صوبائی وزیر خزانہ ظہور بلیدی نا کماشی ٹی وزیر و سیکرٹری تا اسے 12 باسکی کمیٹی اس ہڈ تننگانے۔
دا حوالہ ٹی صوبائی وزیر خزانہ ظہور بلیدی تینا موقف تریسہ پارینے کہ کمیٹی زوت آن زوت تولک و ملازم آتا ویل آتے ایسر کیک، ایلو پارہ غا برانزی مچی کروکا سرکاری نوکر آک حکومت نا دا کمیٹی ءِ رَد کریسہ پاریر کہ ہچو کمیٹی جوڑ کننگ نا گرج اف بلکن حکومت ننا پگار آ 25 ٪ ودکی نا پڑو کے۔
یاتی مرے سرکاری نوکر آتا دا برانزی مچی نا اپوزیشن نا غٹ پارٹیک حمایت کریسہ غٹ پارٹی تا راہشون آک برانزی مچی ٹی تینا خیال آتا درشانی کرینو۔
کوئٹہ: سرکاری نوکر آتا برانزی مچی مسٹمیکو دے برجاء
الّمی خوانبو
