ورنا بلوچ آرٹسٹ صمد عبداللہ بلوچستان نا ساحلی شار پسنی ٹی کزیت کرینے، او بھلو وخت ئسے آن معدہ نا کینسر نا ناجوڑی نا گواچی ئس، صمد عبداللہ نا تعلق بلوچستان نا ساحلی شار پسنی آن ئس، عکس کشی و سینڈ آرٹس ئٹ او تینا اسہ چائنداری اس جوڑ کرینے۔
اونا فن پارہ غاک بلوچی بولی ٹی شینگ کروک آ کتاب و میگزین آتیٹ سرورق نا دروشم ئٹ شینک مریسہ کریرا، و گوادر آر سی ڈی کونسل ٹی دا اونا کاریمک نشان تننگار ہراٹی صمد عبداللہ نا کاریم ءِ بھاز داد رسینگا، و اونا کاریم آن زیمی مریسہ پسنی تون اوار گوادر و ایلو علاقہ آتیٹ ورناک عکس کشی و سینڈ آرٹ نا کنڈا پام کریر۔
صمدعبداللہ عکس کشی ٹی دیر و آئل کلر میڈیم ٹی ہم کاریم کرینے و اندا وڑ او ریک آرٹ نا ہم لائخی تخاکہ، اونا تخلیقی و فنکارانہ لائخی ءِ ہر وخت دوست تخینگانے، بیروزگاری و معدہ نا کینسر نا ناجوڑی نا سوب آن بھاز پریشان و اُست کٹہ مسوسس۔
او اُست کٹہ و پریشانی نا امو عالم ٹی تینا عکس کشی نا کاریم ءِ ہم ہلاسس انتئے کہ او کلرز، کاغذا و عکس کشی پین ازباب ہلنگ نا طاغت تختوکہ۔
بلوچستان نا بھاز آ فنکار آک بیروزگاری و فن ئنا بے دوستی ءِ یلہ کریسہ بد حالی ٹی تینا فن و زند آن دو ارفیرا، ورنا بلوچ آرٹسٹ صمد عبداللہ نا کزیت کننگ شعبہ عکس کشی و سینڈ آرٹ ئٹی اسہ بھلو نسخان ئسے۔