ورنا غا شاعر و نوشتکار عمران فریق نا افسانہ غاتا ارٹمیکو کتاب “اِڑز” شینک مس۔ کتاب نا شینکاری بلوچ کلب بحرین نا پارہ غان کننگانے۔
اِڑز نوشکے آن تعلقدار عمران فریق نا افسانہ غاتا ارٹمیکو کتاب ءِ داکان مالو اونا افسانہ غاتا کتاب “اینو ہم خدا خوش ءِ؟” 2018 ئٹ شینک مسوسس ہرادے شیوان ادبی کاروان شینک کریسس۔
عمران فریق شیوان ادبی کاروان بلوچستان نا بنماسی باسک آتیان ءِ۔ دا وخت اسکان اونا ہفت کتاب شینک مسونو ہرافتیٹ اونا شاعری نا کتاب آک ہم اوار ءُ۔
شیوان ادبی کاروان، بلوچستان ٹی براہوئی ادب و بولی کن کاریم کننگ ءِ۔ دا وخت اسکان براہوئی نا چندی کتاب آک شیوان نا پارہ غان شینک مسونو۔ کتاب شینکاری تون اوار شیوان ادبی کاروان نا پارہ غان ادبی مجلس، کتاب مُچی و بلوچ دود ربیدگ نا دیک ہڈ تننگسہ مسونو۔
اندن بلوچ کلب، بحرین نا پڑ آ اسہ ادارہ ئسے ہرا بلوچ راج و تینا ہڑتوم آ بولی تیکن کاریم کننگ ءِ۔ دا ادارہ نا پارہ غان بلوچی و براہوئی نا چندی سیمینار، ساز زیملی پروگرام، مشاعرہ، کتاب آتا شینکاری، بحرین ٹی ساڑی بلوچ باتی تیکن تعلیمی کلاس، ربیدگ و گوازی نا پڑ آ چندی کاریم مریسہ کرینو۔