راولپنڈی: گمانی داڑیلی نا وختا ڈسٹرکٹ اینڈ سیشن جج کسفنگا

الّمی خوانبو

راولپنڈی پولیس نا رد ئٹ اینو سئے شمبے نا دے بحریہ ٹاؤن نا علاقہ ٹی اسہ اُرا سے آ مننگ کروک داڑیلی نا وختا سُم کاری ٹی پاکستانی کشمیر آن تعلقداری تخوک ڈسٹرکٹ اینڈ سیشن جج خلنگانے۔

پولیس نا رد ئٹ سہب ئنا مالو تھانہ روات نا علاقہ ٹی ساڑی بحریہ ٹاؤن نا فیز8 نا اسہ اُرا سیٹ داڑیل آک پیہیسہ امجد اسحاق نا مار ءِ برمتہ کننگ نا کوشست کریر، ہراڑا اوفتے مزاحمت تون مون تروئی تما۔

خن ئٹ خنوک شاہدی تا رد ئٹ داڑیل آک اُرا ٹی پیہیسہ سُم کاری کریر ہراڑان سردار امجد اسحاق باز ٹپی مس۔ اسپتال آ دننگ نا وختا او کسر آ ساہ تس۔

حوال تا رد ئٹ مزاحمت نا وختا اسہ داڑیل اس ٹپی مس ہرادے پدان پولیس دزگیر کرے و ایلو داڑیل نرنگ ئٹی سر سہب مس۔

بیران مروک بندغ نا چاہنداری پاکستان نا زیرِانتظام کشمیر نا شار میرپور نا ڈسٹرکٹ اینڈ سیشن کورٹ نا جج سردار امجد اسحاق نا پنا مسنے۔ پولیس پارے کہ جون ءِ اسپتال آ دننگانے ہراڑے پوسٹمارٹم آن گڈ وارث آتا حوالہ کننگو۔

خاہوت آن رسینگوکا حوال تا رد ئٹ امجد اسحاق مُخ ئنا آپریشن آن گڈ مظفرآباد ہائی کورٹ ٹی تعینات ئس۔ اونا تعلقداری راولاکوٹ نا علاقہ ہرنہ میرا کوٹیڑا آن ئس۔ اونا سن 50 سال ئس۔

منَہ سال مست پاکستان نا زیرانتظام کشمیر نا اسہ پین سول جج یوسف ہارون تون ہم اندنو تدینی راولپنڈی ٹی مسس۔ جج یوسف ہارون نا مار راولپنڈی آن برمتہ مننگ آن گڈ اینو اسکان خننگتنے۔

پُوسکنا حوالک

بلوچ راجی مچی نا بشخ مرِسہ جہان ءِ نشان ایتبو کہ نن زندہ و شرفدار ءُ راج ئسے اُن۔ ماہ رنگ بلوچ

بلوچ راج 28 جولائی نا دے گوادر ئٹ سرمریر و جہان ئے کلہو ایتر کہ نن زندہ و خوددار...