شعور انت اسے۔۔۔؟ – جعفر قمبرانی

شعور انت اسے۔۔۔؟

تحریر: جعفر قمبرانی

دی بلوچستان پوسٹ

شعور انت ءِ پارہ۔۔۔؟ بلوچستان اٹ شعور والا مننگ نا انت مطلب۔۔۔؟

دا اسہ بھاز اہمیت والو سرحال اسے، کہ اینو نا دا ٹیکنالوجی و کتاب آن مری و تینا جند انا سِر اتون جل انگا دور اٹی شعور ءِ پہہ مرین و شعور نا دوئی کننگ کن نت و دو خلین۔ سنگت وہاب جان سوج کرسا مزغ اٹ شاغا کہ شعور انت اسے؟ دا کتاب آتیان امر رسینگک؟ شعور ہرا بلا ءِ پارہ؟
کل آن مست برین کہ شعور انت ءِ پارہ۔

یات سلے کہ شعور مزغ انا اسہ ہندن ءُ حالیت اسے پارہ ہراٹی انسان تینا چاگڑد، حالیت، احساس و خیال آتا بابت چاہنگ ءِ ہیل کیک۔ یعنی شعور نا تعلق انسان نا تہہ اتون ءِ۔

لس پاننگ کینہ کہ شعور علم آن پد ہمو احساس ءِ پارہ کہ اسہ انسان اسے ٹی تینا چاگڑد و ایلو انسان و ساہدار تیکن ودی مریک۔

مسخت دا کہ انسان ہرا وخت انت اس خوانک، بنک، خنک تو دا اونا مزغ اٹ جاگہ ہلیرہ۔ پدی داکان پروسس مرسا انسان نا جند انا و چاگرد نا نیام اٹ اسہ سمجھنگ نا تعلق اس جوڑ کیرہ، دادے نن شعور پاننگ کینہ۔ ولے شعور ءِ اسہ پورو ءُ تعریف اس مفننگ نا سوب آن دادے سمجھنگ زرس وخت ہلیک۔

شعور ءِ کڑمبی اٹ سرپد مننگ کن ننے شعور ءِ علم آن جتا کروئی تمک، و پدی تعلیم و علم انا فرق ءِ ہم ہروئی تمک۔ یعنی دا کل اسہ ایلو تون ول پیچ تروک ءُ۔ دافتے سمجھنگ کن اسٹ ایلو آن ول آتے تا کشون گڑا ننا مزغ اٹ تولور کہ دیر انت اسے۔

شعور دنکہ مہالو پارین کہ مزغ انا بدل مننگ نا ہمو حالیت نا پن ءِ کہ او پہہ مننگ ءِ بنا کیک۔
ولے یات سلے کہ شعور تینا مزغ اٹ احساس ودی مننگ نا پن ءِ، ایہن تو ساہدار تے ٹریننگ ایتس ہم تو بیدس احساس آن اوفک ہم ہمو کاریم تے کیرہ کہ انسان کیک تا۔ دانا بھلو درور اس مِٹو نا ہیت کننگ، کچک نا دُز ہلنگ و بولو نا انسان تا وڑ اٹ راگ کننگ و دائے ارے۔

اوکان پد علم ہمو گڑا ءِ کہ جہان اٹ اخہ در گِڑا اریر دا کل انا یا اوفتیان گڑا سے نا بابت چاہنگ ءِ پارہ۔ یعنی اسہ بندغ اسے تون علم مرو ولے ضروری اف اوڑتون شعور ہم ارے۔۔۔ آخا۔

اسہ درور اس تخن کہ دا علم ہر بندغ ءِ ارے کہ اسہ بھاز بھلو طاقت اس ارے ہراکہ تیبہ جہان ءِ جوڑ کرینے و جہان نا بڑز شیف نا مالک و ودی کروک ءِ۔ ولے بھاز کم بندغ آتے شعور ارے کہ ہمو مالک و ودی کروک نا طاقت ءِ پہہ مریر۔ یعنی چاہک تو ہر بندغ، پہہ مریرہ ہموفک ہرافتے شعور ارے۔ یعنی خدا نا چاہنگ آن پد دا احساس مننگ کیک جائی کہ خدا سجدہ کڑزوک ءُ ذات اسے۔

پاننگ نا مسخت دا کہ گِڑا تا بابت بیرہ چاہنگ علم پاننگک و ہمو علم کہ مزغ اٹ توس، پدی مزغ انا تہٹی ہمو احساس ودی مننگ و انسان نا کل کاریم تیا ہمو وڑ عمل کرفنگ شعور ءِ۔ انتئے کہ مچ آ انسان نا بدن نا سُرفوک و سروک ءِ۔

گُڑا مزغ اٹ تولوک آ گِڑا انسان ءِ ہمو گڑا نا وڑ بیوس ہم کیک کہ بندغ تینا مزغ انا وڑ کاریم کے، ہیت و گپ و تول و بش کے۔ یعنی نن انت کہ چاہسن یا ہیل کرین، پدی اودے تینا مزغ اٹ ہندن جاگہ تسن کہ مزغ انا حالیت بدل مس و پدی مزغ ننا تینا حالیت ءِ ہم بدل کرے۔

جی آؤ دن کہ مزغ ہمو گڑا ءِ ہرفسا بھاز مستی ہننگ بنا کرے، امنا کرے یا نمن مس، تو پدی او بدن ءِ ہم ہمو نا بابت کاریم کننگ آ بیوس کرے گڑا دادے پارہ شعور۔

پدی برین تعلیم آ ہراکہ اسہ نظام اسے ہرانا تہٹی بس ڈگری ہلنگ و اسہ استاد واسہ نظام اسے نا کیرغ آن ہیل کننگ ءِ پارہ۔

داسہ مستی گونڈ کرسا ہرن تو دا ہیت پک مریک کہ تعلیم تو جوان چلینگ مننگ کیک، ولے تعلیم نا نظام اٹی کتاب، استاد سیبو و دائے مفننگ نا دو آن علم انا کمبوتی مننگ کیک یعنی نظام تو روان ءِ ولے چناک ہچ تپسہ۔

ہندن علم انا کسر تو ارے، بھاز بندغ آک استاد آن، بھاز آک نیٹ آن، بھاز آک کتاب آتیان و بھاز آک تینا جند انا زند انا آزموندہ غا تیان ہیل کننگ کیرہ، و جہانی کہول آ مرے یا علاقہ و قومی کہول آ، گِڑاتا بابت پہہ مریرہ۔ ولے لس علم والا بندغ شعور نا کچ آ سر مروک ہم تو مفک، شعور نا مطلب کہ ہمو ہلوک آ علم آن تینا مزغ آ اثر شاغنگ۔ اگہ نن دنیا جہان نا ہر گِڑا ءِ چان و پہہ مرین ولے عمل اٹ ننا ہچ اس تا خننگپک تو داسہ ہیت پک مریک کہ نن تون علم بھاز ءِ ولے نن شعور آن خالی ہُن۔

سوج دادے کہ شعور کتاب آن ہم دوئی مننگ کیک؟ دا ہیت مزغ اٹ مرے کہ کتاب آن بندغ علم دوئی کیک و پدی ہمو علم انسان نا تہٹی ساڑی شعور ءِ یکجا کرسا احساس نا دروشم اٹ بش کننگ اٹی کمکار مریک۔ کتاب آن شعور آخا علم رسینگک ہراکہ شعور نا بش کننگ نا سوب جوڑ مریک۔

یعنی ہر کتاب خوانوک شعور والا مننگ کپک۔ بھاز آک کتاب خوانور ولے ہمو احساس ءِ تینا تہٹی بش کننگ اٹی سرسہب مفرور۔ یعنی شعور علم آن ودی مروک آ مزغ انا ہمو حالیت ہراٹی مزغ علم انا اثر آتے ہرفسا جوان و گندہ گڑاتے جتا و، تا کیک و سہی انگا کسر اٹ کاہک و پراگندہ غا کسر تے یلہ کیک۔

دن کہ اینو بلوچ نا ہر چنا چوچہ پہہ مریک کہ نن تون انت مننگ ءِ۔ ولے اینو ہم ننے آن ہفتاد درسد بندغ آک چپ جوڑ تے گنڈوک تینا حالیت اٹی خوش و خف تے بند و خن تے تر کرینو۔ دا اوفتا قصور اف، دا قصور ءِ اوفتا علم انا کہ اوفتا علم اوفتے شعور نا کچ آتسکان سر کتنے۔ علم والا بھاز رسینگو ننے ولے شعور والا بھاز کم۔

یات تخنگے کہ شعور والا علم، عمل آن خالی مفک۔ شعور ہمو علم انا پِن ءِ ہرا عمل کن مزغ انا زمزیر تے مَلک۔ شعور ہمو علم ءِ ہرا مزغ ءِ دا کسر ایتک کہ نے تون ہر ہمو طاقت ارے کہ نی دا کپ کپ ٹھپ ٹھپ و ژند و بند یا چست انگا بدن ءِ کاریم اٹ اتیس۔ یعنی کس ءِ شعور مس دن چا کہ اودے خف ہم ارے، دوی ہم ارے، خن ہم ارے و کہنگ کن بدن اس ہم ارے و ہسون مننگ کن است اس ہم۔۔۔

انتئے کہ بے شعور اٹی احساس مفک، اودے الس نا، ساہدار تا سما مریک و چاگڑد اٹ ساڑی تیبہ گڑاتے چاہک ہم ولے محسوس کپک تا۔ ای تو پاوہ یخین اٹ شعور والا بندغ نا است دا راج اٹی الم ہسون مرو۔ خاص وڑ اٹ بلوچستان اٹی اگہ کس نا است ہسون مفک تو او پکا شعور نا دنگ آتیان مُر ءِ، اسل بھاز مُر۔