ماہل بلوچ نا زوراکی ئٹ بیگواہی، مند ئٹی زالبول تا برانز

بلوچستان نا بنجائی شار کوئٹہ آن بلوچ زالبول ماہل بلوچ نا زوراکی ئٹ بیگواہ آن گڈ جتا ہند آتیٹ تومت آتا بر خلاف مند ئنا  زالبول تاپارہ غان دپ درشانی کننگا–

دا وخت  برانز ٹی اوار بندغ آتا دوتیٹ ماہل نا عکس و پلے کارڈز ارفوک برانز کروک آک ماہل آ دروغ نا تومت خلنگ نا مذمت کریسہحکومتی و فورسز ادارہ آتا برخلاف سخت نعرہ خلکر–

مند زالبول تون اوار برانز ٹی نرینہ آتا ہم بھلو کچ اس اوار اس برانز کروک آک ماہل بلوچ آ خلوک دروغ نا کیس تے ایسر کننگ ودمدستی وڑ ئٹ آجو کننگ نا خواست کریر–

دا وخت پاکستانی فورسز ہندی دکاندار آتے دکان تا بند کننگ آ دزگیر کننگ نا کوشست کرے ہراڑا برانز کروک زالبول آک نیام تمیسہدکاندار آتے دزگیر کننگ کن ہلتوس۔

یاتی مرے برجاہ تو 17 و 18 فروری نا شام 11 بجہ نا خڑک بلوچستان نا بنجائی شار کوئٹہ آن پاکستانی فورسز اسہ زالبول ماھل بلوچءِ اونا چنا تون اوار ارا غان تا دزگیر کریسہ زوراکی ئٹ بیگواہ نا گواچی کریسہ نا درست ءُ جاگہ اس دریسر۔

ویل ئنا ایلو دے بلوچ تنظیم و بندغی حق آتا باسک آتا سخت برانز نا سوب آن سی ٹی ڈی کوالخواک بلوچ زالبول نا دزگیری ءِ پک کریسہجتا وڑ ئنا کیس نوشت کریسر –

ماہل بلوچ نا زوراکی ئٹ بیگواہ آن گڈ جتا کیس آتیٹ دزگیر کننگا نا بر خلاف بلوچستان نا جتا علاقہ آتیٹ برانز نا لڑ برجاہ ءِ تدوکا دےتیٹ کوئٹہ ٹی بلوچ وومن فورم نا پارہ غان سریاب نا ہند آ تولوک برانز کریسہ کسر بند کننگاسس اندن تربت و کراچی ٹی ہم ماہل بلوچنا یلہ کننگ کن دپ درشانی کننگاسس–

ماہل بلوچ نا قانود آن چپ دزگیری نا بر خلاف جتا خوانندہ و سیاسی تنظیم آتا پارہ غان تیوہ  بلوچستان تون اوار  پاکستان نا ایلوشار تیٹ ہم دپ درشانی کننگ نا کلہو تننگانے برانز کروک آتا  پاننگ ءِ  کہ ماہل بلوچ آ خلوک مقدمہ آتے ایسر کریسہ اودے دمدستی  وڑئٹ آجو کیر و بلوچستان ٹی اشتماعی سزاء نا وڑ ئٹ  زالبول تے ٹک کننگ نا عمل ایسر کننگے–