کراچی نا علاقہ ماری پور ٹکری آن تدوکا منا دے ٹی مسہ بندغ نا زوراکی ئٹ بیگواہی نا تدینیک مون آ بسنو۔
وسیلہ تا رد ئٹ عزیز نا 28 سال نا مار صابر، ہرا مزوری کیک و ٹکری ماری پور نا رہینگوک ئسے، ءِ 7 اگست 2026 نا نن 2 بجہ نا وخت آ اونا ارا غان رینجر تا کارندہ غاک دزگیر کریسہ دریر۔
داکان بیدس عبدالواحد نا 28 سال نا مار عامر ہرا کہ ہندی جاگہ ٹی دکاندار ئسے، 5 اگست 2026 نا نن 8 بجہ نا وخت رینجرز و سی ٹی ڈی نا کارندہ غا تا دو آن بیگواہ مس۔
خاہوت نا رد ئٹ اودے دزگیر کننگ آن پد اونا ہچو ڈس اس ملنگ کتؤ۔
کوئٹہ غان زوراکی ئٹ بیگواہی نا گواچی کننگوک آ مسہ نیاڑی 6 اگست 2026 آ یلہ مسر۔
شابیتی حوال اتا رد ئٹ 30 جوالائی 2026 آ کوئٹہ نا علاقہ کلی علاؤالدین شیخ عمر آن جمعہ خان نا مسڑ تانیہ، خیر اللہ نا مسڑ جویریا و سعداللہ نا مسڑ رافعہ ءِ پاکستانی لشکر دزگیر کننگ آن پد بیگواہ کریسس۔
ہر مسہ نیاڑی تے اسہ ہفتہ ئسے اسکان بیگواہ کننگ آن پد 6 اگست 2026 آ کوئٹہ ٹی یلہ کننگا۔
یات سلے کہ بلوچستان ئٹی دائسکان کیہی نیاڑیک پاکستانی لشکر نا دو آن زوراکی ئٹ بیگواہی نا آماچ مسنو
بلوچستان نا ضلع چاغئے ٹی نادرست سلہہ بند بندغ آک اسہ مڈی ڈوہوکو بس ئسے توریسہ تینا کوزہ ٹی ہلکر، جتا انگا تدینی تیٹی لاری تیا سم کاری کریسہ نسخاں تننگا، داکان بیدس بولان نا ضلع ٹی اسہ پولیس چیک پوسٹ ئسے آ جلہو ئٹی اسہ بندغ اس کسک۔
پولیس سروک آتا رد ئٹ برنج و امب آتا کوڑ اس دروکو مڈی ڈوہوک ءُ بس اس پنچ شمبے و جمعہ نا نیامیکو نن کوئٹہ دالبندین آ ہننگ ئٹی ئسک کہ کسر آ بے ڈس آ سلہہ بند آ بندغ آک اودے توریر۔ سروک آتا پاننگ ئسک کہ جلہو کار آک بس و اونا بندغ آتے تینتون بے ڈس جاغہ ئسے غا دریر۔
داکان بیدس چہتر نا علاقہ ٹی بازار ٹی سلوک مڈی ڈوہوک و بوزر لاری تے سلہہ بند بندغ آک سمکاری کریسہ ٹک کریر ہراٹی لاری تا ٹئیر آک بھس مسر۔
ایلو پارہ غا ضلع بولان ئٹی ننکان بےڈس سلہہ بند بندغ آک بالاناڑی نا بھلا کسر نا زی ئنا دوسا کراس چیک پوسٹ آ جلہو کریسہ پوسٹ ءِ تینا دوٹی ہلیسہ سلہہ تے تینا کوٹہ ٹی کریر۔
پولیس وسیلہ تا رد ئٹ جلہو نا وخت اسہ پولیس والاس کسک، ہرانا درستی راستی حافظ عبدالرشید نا پن ئٹ مسونے۔
ولے دائسکان کسس ہم دا ہر مسہ تدینی تا زمواری ءِ ارفتنے۔
بلوچستان نا جتا جتا انگا علاقہ تیٹ سکیورٹی خلیس آتا دو آن کرفیو خلنگسہ ءِ۔
ضلعی انتظامیہ سوراب نا ضلع ٹی سکیورٹی حالیت آتا سوب 6 اگست 2026 نا نن ئنا 6 بجہ غان 8 اگست نا سہب 6 بجہ اسکان کرفیو خلنگ نا حکم تریسہ دکان و روزگاری جاگہ تے بند کرفنگانے۔
ضلع نا انتظامیہ کل شار والا تے ہدایت کرینے کہ ہندا وخت آتیٹ شار تیان پیش تمپس و سکیورٹی ایس او پیز آتیا سختی ئٹ عمل کیر۔
پڑؤ ئٹی ساف پاننگاسس کہ کرفیو نا برخلافی کروک آ بندغ آک تینا ہر وڑ نا نسخان تا زموار تینٹ ءُ، کانود نا برخلافی کروک آتا برخلاف کانودی کاروائی کننگو
یات سلے کہ منا دے نا ئسے قلات ئٹی ہم کرفیو خلنگانے، سیکیورٹی سروک آک شار والا تے حکم تسنو کہ کرفیو نا وخت آ ارا تیان پیشتموک آتے سم ئٹ خلنگو۔
داکان مست مستونگ نا علاقہ کھڈکوچہ ٹی ہم کرفیو خلنگاسس، ایکان زہری و نوشکے ٹی ہم منا تو مالؤ آن کرفیو خلوکے۔
کیچ ئنا علاقہ دشت ئٹی پاکستانی لشکر نا پارہ غان شار والا تا ذاتی و روزگار کروک لاری تے دوئی کننگ نا حوال رسینگانے۔ ہرانا سوب آن شار ئنا مخلوق ئٹی اِربشی اس تالان ءِ۔
بلوچستان نا ضلع کیچ نا تحصیل دشت آن بروک آ حوال آتا رد ئٹ پاکستانی لشکر درو نا دے آن شاری تا ذاتی و زورگاری آ لاری تے دوئی کریسہ ءِ۔
ہندی وسیلہ تا رد ئٹ پاکستانی لشکر اینو دا وخت اسکان شار والا تیان 30 آن بڑزا لاری تینا دوٹی ہلکونے و ایکان لشکر لاری تا خواجہ تے باور کریفینے کہ 14 اگست آن پد لاری تے پدی تننگک۔
ولے پاکستانی لشکر نا دو آن دائسکان دا پک کننگتنے کہ شار والا تا لاری تے ہرا مسخت کن ہلیسہ ءُ، شار والاک خلیس نا درشانی کرینو کہ مننگ کیک دا لاری تے 14 اگست آ مروک آ دیوان تیٹی کارمزر کننگ کینگ کیرہ۔
یات سلے کہ تیبہ بلوچستان ئٹی جلہو آتا خلیس نا سوب آن ٹرانسپورٹرز آک تینا لاری تے تننگ آن چک و پد مریسہ بسنو۔ واہم دشت ئٹی دا وار پاکستانی لشکر نا پارہ غان ہندنی بندغ آتا زاتی و واپاری والا لاری تے پلنگ نا حوال اس مون آ بسونے
بلوچستان نا ضلع مستونگ ئٹی اینو سہب ئنا سے پاکستانی لشکر آپریشن ئٹی گٹ ءِ، علاقہ نا آباتی تیا ڈرون جلہو و لشکر نا زیہا آئی ای ڈی جلہو نا حوال ارے
مستونگ نا علاقہ دشت، کمبیلہ ٹی اینو سہب ئنا مالؤ پاکستانی لشکر آپریشن نا بنا ءِ کرینے۔ لشکر نا بھلو کچ اس علاقہ ءِ گڑفیس کریر و ہندا وخت آ ڈرون جلہو و مارٹر گولہ غاک فئیر کننگنگ ئٹی ءُ۔
حوال آتا رد ئٹ بمب تراک آتیان لس آباتی تے نسخان رسینگانے واہم دا رد ئٹ شابیتی حوال آک برور۔
داکان بیدس آپریشن ئٹی آختہ پاکستانی لشکر نا پند ئٹ ہنوکا کارندہ تے آئی ای ڈی بمب تراک آن نسخان رسینگانے۔ سروک آک دا رد ئٹ دائسکان ہچو شابیت حوال اس تتنو
بلوچستان نا علاقہ بیلہ کراس آن برجاء سال 9 جولائی آ زوراکی ئٹ بیگواہ مروک پیر انگا بندغ مالو مری نا مار ہیبتان، بیلہ نا ہندی، نا جونمنا دے مالؤ حب ساکران ئٹ غریب آباد نا خڑک آن کسر نا پاناد آن خننگا۔ جون آ تادی و سم تا نشان آک ہم ئسرہ۔
یات سلے کہ بلوچستان ئٹی زوراکی ئٹ بیگواہ مروک آ بندغ آتا بیدس قانود خون آتا تدینی تا کسہ اسہ کش برجا ءِ۔
دالبندین نا علاقہ چہتر ئٹی پاکستانی لشکر نا لاری تیا سلہہ بند جلہو و خاران ئٹی البت و پتکن نا نیام نا بنجاہی کسر آ سلہہ بند بندغ آتا ناکہ بندی نا کسہ غاک مون آ بسنو۔
شابیتی حوال اتا رد ئٹ چاغئے نا علاقہ چہتر ئٹی بے ڈس سلہہ بند بندغ آک پاکستانی لشکر نا لاری تے تک کرینو
ہندی وسیلہ تا رد ئٹ جلہو کار آک سلہہ تینا تیتون سم کاری کریر، وسیلہ تا پاننگ ئسک کہ جلہو آن پد اسہ ایلو سم کاری ہم مسک، ولے جانی و مالی نسخان تا نسخان حوالہ ئٹ دائسکان سرکاری پڑ آ ہچو خاص وڑ ئنا بیان اس شینک کننگتنے۔
ایلو پارہ غئے ضلع خاران ئٹی البت و پتکن نا نیام نا بنجاہی کسر آ سلہہ بند بندغ آک ناکہ بندی کرینو۔ وسیلہ تا رد ئٹ سلہہ بند بندغ آک کسر نا زیہا ٹریفک ءِ زرس توریسہ کیہی لاری تے لٹ لوٹ کرینو
ہندی وسیلہ تا پاننگ ءِکہ ناکہ بندی کیہی گھنٹہ تے اسکان برجا ئسک، ہرا نا وخت آ کسر نا زیہا لاری تا ریسہ اس لگا۔
ولے دائسکان ہچو گل اس دا ہڑتوم آ تدینی تا زمواری ءِ ارفتنے۔
بلوچستان نا ضلع کوئٹہ غان اسہ ورنا ئسے نا زوراکی ئٹ بیگواہ مننگ نا تدینی مون آ بسونے۔
کوئٹہ نا ہندی ورنا بلال احمد نا مار صدام حسین ءِ یک شمبے نا دے سہب ئنا 12 بجہ کوئٹہ شاپنگ مال نا خڑک آن پاکستانی ڈھکوک ادارہ غاتا کارندہ غاک دزگیر کریسہ بے ڈس ءُ جاگہ سے آ دریر، ہراکان پد اونا ہچو ڈس اس رسینگنگ افک۔
خاہوت نا رد ئٹ صدام حسین دکانداری نا روزگار کریکہ و ہندا وخت آ لس بیرشت ئٹ بندغ آک اودے دزگیر کریر۔ تدینی آن پد اونا باروٹ ہچو حوال اس تننگتؤ۔
خاہوت نا پاننگ ئسک کہ اگہ صدام حسین نا برخلاف مقدمہ یا دوبہ اس ارے تو اودے کانود نا رد ئٹ عدالت ئٹی اتنگے، نئے تو اودے زوت آن زوت آجو کریسہ اونا خاہوت نا دوٹی ایتنگے۔
ضلع خضدار نا علاقہ ساسول گورو ٹی درو پاکستانی لشکر نا ڈرون جلہو آن اسہ کم سن ئنا چنا ئسے نا کہنگ نا حوال مون آ بسونے
کہوک آ چنکا چنا نا درستی راستی یار محمد نا مار محمد ایمن نا پن ئٹ مسونے
ہندی وسیلہ تا رد ئٹ تدینی نا وخت آ ہندا چنا ہمو جاگہ نا اسہ ہوٹل ئسے ٹی ساڑی ئسک کہ ڈرون جلہو مس، ہراٹی او تینا ساہ آن دو تے سلہ۔
