شاہرگ آن اسہ لاشہ اس خننگانے ہرادے آپریشن نا وخت آ کسفنگانے

بلوچستان نا علاقہ شاہرگ آن اینو سہب ئنا ملوک آ حوال آتا رد ئٹ پاکستانی لشکر فوجی آپریشن نا وخت کیہی ارا تیٹی پترینگسہ پٹ و لوٹ کرے، ایکان کیہی بندغ آتے دزگیر کریسہ بے ڈس آ جاگہ تیا دننگا۔

ہندا وخت ئٹی پاکستانی لشکر ہشت بندغ ءِ دزگیر کریسہ تینتون درے ہرافتیٹی حاجی بابو درخان، طور خان، حاجی مڑز علی، احمدان، صابر تون اوار پین بندغ ہم اوار ئسرہ۔

ہندی مخلوق نا پاننگ نا رد ئٹ فوجیک پٹ لوٹ نا وخت آ سازین و چما پنی آ ارا زالبوک تے ہم تادی تا گواچی کریر و ایکان فوجیک تا سم کاری آن عزیز الرحمان سمالانی پنی آ بندغ ٹپی مسوسس۔

خاہوت و ہندی بندغ آک خواست کریسر کہ پاکستانی لشکر نا دو تیان بیگواہ مروک بندغ آتا باروٹ حوال تننگ مرے و ٹپی تے زوت آن زوت جانجوڑی نا آسراتی تننگے۔ واہم پوسکن حوال آتا رد ئٹ پاکستانی لشکر نا تیر گواری آن ٹپی مروک عزیز الرحمان نا لاشہ خننگانے۔

ریاست سروک آک دائسکان دا رد ئٹ ہچو شابیتی حوال اس تتنو۔

بی ایل اے شار ئنا کنٹرول ءِ دوئی کریسہ جلہو کننگ خوائک۔ پولیس نا شاری تے خیالداری کننگ نا پنت۔

بلوچستان پولیس نا بنجاہی دفتر (سی پی او) اسہ تھریٹ الرٹ اس شینک کریسہ خلیس نا درشانی کرینے کہ کوئٹہ نا شار ءِ بھلو، کٹہ و ترند ءُ جلہو ئسے تون مون ترویج تمنگ کیک۔

پولیس نا پارہ غان شینک مروک ہدایت نامہ نا رد ئٹ بی ایل اے جتا جتا انگا گروپ آتیٹ اسہ کلہو اس رادہ کرینے ہراٹی 7 اگست آ کوئٹہ ٹی ترند ءُ جلہو ئسے نا پڑو تننگانے۔

پولیس نا رد ئٹ ہندا کلہو ئٹی ٹک کریسہ پاننگاسس کہ چار ہزار بی ایل اے نا سرمچار ہرافتیٹی جند ندر بم تراک ہم اوار مرور، دا کاروائی تیٹی بشخ ہلیرہ و تنظیم شار ءِ دوٹی ہلنگ نا کوشست کیک۔

بی ایل اے دا وخت ئٹی ہندی مخلوق ءِ ارا تیان پیشن مفرنگ نا ہم پارینے۔

ہدایت نامہ ٹی کل پولیس سروک آتے تینا علاقہ تیٹ سکیورٹی و رکھ اکن گامگیچ پین سخت کننگ، کچ آن ود چست مننگ و ہر وڑ ئنا تدینی آن بچنگ کن مالؤ آن بست و بند کننگ نا ہدایت کننگانے

داکان بیدس بلوچستان پولیس نا بنجاہی دفتر ہندا وڑ ئنا ایس ایس پی و ایس پی تے ہدایت تسونے کہ دا رد ئٹ ارفوک آ گامگیچ آتا رپورٹ آتے مسہ دے نا تہٹی بنجاہی دفتر آ رادہ کننگے تانکہ دافتے انسپکٹر جنرل پولیس بلوچستان نا ارنگ کن مون آ دننگے۔

دا مراسلہ بلوچستان پولیس نا بھلا سروک آتیان بیدس چیف سیکٹری بلوچستان، نیکٹا، ایف سی، رینجرز و ایلو خڑک سیالدار ادارہ غاتے ہم معلومداری و المی کاروائی کن مون تننگانے۔

تمپ دازان نا ہندی عمر نا مار ظریف بلوچ نا خاہوت تربت پریس کلب ئٹی پریس کانفرنس کریسہ پاریر کہ 27 دسمبر 2024 آ ظریف بلوچ ءِ کسفنگا و لاشہ ءِ تا خسنگا۔ ایکان 22 مئی 2026 آ اوفتا ارا تیٹ خڷ و بٹ کننگا و ارا تیان خیسن، نغد زر و پین گڑا ہم دننگا۔

خاندان نا رد ئٹ بیرہ اوفتا ارا آخہ بلکن اوفتا ایلو ہیڑ و سیال آتا ارا تے ہم نسخان تننگانے۔

او پاریر کہ اول سر ئٹ ظریف بلوچ بسرہ، داسا دیر کن بننگو، اوفتا ارا تیٹ داسا کس نرینہ ساڑی افک۔

او مستی پاریر کہ 21 جولائی آ پدی اوفتا ارا تا زیہا کاروائی کننگانے و نہادی آ گڑا تے دزی کریسہ دننگانے۔

پریس کانفرنس ئٹ تران کریسہ خاہوت نا اسہ زالبول اس پارے کہ اوفتے اسہ کش خلیفیسہ کننگ ئٹی ءُ۔ او اسہ نیاڑی ئسے وخدا نا امیت آ زند گدریفنگ ءِ۔ اونا پاننگ ئسک کہ اونا ہلہ و ایلو سیال آتے ہم تادی تا آماچ کننگانے۔ لاری تیٹ گڑا تے لوڈ کریسہ دننگا۔

او پارے کہ ارا تیان خیسن زر و ایکو نہادی گڑا تے ہم دننگانے۔ اگہ کس ئسے اوفتیان زاتی ءُ ویل اس ارے تو اوفتے پاننگے انتئے کہ اونا پاننگ نا رد ئٹ اوفتا ارا ٹی نئے سلہہ اس ارے و نئے کہ غیر کانودی ءُ پین گڑاس۔

خاہوت خواست کرینے کہ اوفتے انصاف تننگے، اوفتیتون مروک آ تدینی نا نلہ پٹ پول کننگے، اوفتے رکھنگ مرے و تنک کننگ نا ریسہ ءِ بند کننگے۔

بلوچستان نا بنجاہی شار کوئٹہ ٹی سکیوررٹی خلیس نا دو آن تیبہ غا شار ءِ بند کننگانے۔

وسیلہ تا رد ئٹ کوئٹہ ریڈ زون ءِ مسہ پارہ غان پورہ سیل کننگانے۔ انتظامیہ نا رد ئٹ زرغون، انسکمب و جعفر خان جمالی کسر آتے ہر وڑ ئنا ہن و بر کن بند کننگانے۔ ریڈ زون آ ہنوک آ کسر تیٹ فوج و ایلو فورس آتا کچ ءِ گیشتر کننگانے۔

سما مرے کہ بلوچستان نا گیشتر شار آتیٹ سلہہ بند جلہو آتا سوب آن سکیورٹی نا سخت انتظام آک کننگانو۔ نوشکے و قلات ئٹی کرفیو نا وڑ ءُ حالیت ئسے و کسر کشک آتیا کڈ ہم ختانو ہرا نا سوب آن اولس ءِ بھاز سختی تیتون مون تروئہ تمنگ ءِ

یات سلے کہ ہندا سال جنوری ٹی بلوچ لبریشن آرمی نا آپریشن “ارٹمی ہیروف” نا وخت آ بلوچستان نا دوانزدہ ضلع ٹی اسہ وخت ئٹی جلہو کننگاسس ہرافتیٹی سلہہ بند بندغ آک کوئٹہ نا ریڈ زون ئسکان سر مننگ ئٹی سرسہب مسوسر۔ داکان پد حکومت ریڈ زون نا داپار ایپار دیوال تفنگ و پین لگامگیچ کریسس۔ داکان پد ہم اینو ہم گیشتر سیکیورٹی نا سخت رد و بند آک کننگنگو۔

امریکہ ٹی بی بی سی نا شریک دار ادارہ سی بی سی خبر تروک ءِ معاملہ نا براہ راست سما مروک ارا وسیلہ غاک پارینو کہ ایران تون جنگ ئنا وخت ئٹی امریکہ تینا مُر خلوک آ میزائل آتا کوڑ تا کل بشخ آتے کارمرز کرینے۔

سی بی سی خبر والا نا رد ئٹ خبر تروک ادارہ روئیٹرز کل آن مست دا احوال ءِ تسوسس کہ آپریشن ایپک فیوری نا وخت امریکہ تینا مر خلوک آ میزائل آتا کوڑ تا کل بشخ آتے کارمرز کرینے۔

سی بی سی احوال تروک داکان مست ہم رپورٹ کرینے کہ امریکہ تون رکھوک انٹرسیپٹرز و شابیت مر خلوک میزائل آتا کوڑ آک کم مریسہ ءُ ہرا بست و بند نا تہٹی ہلہلہی نا سوب جوڑ مسنو۔ و دا ہم کہ ایران تون جنگ ئنا بنائی ساعت آتیٹ ہرا تیزی ٹی امریکہ جوان نشانہ خلوک ءُ سلہہ کارمرز کرے، اوفتے ہندن تورنگ ممکن افک۔

تینا رپورٹ آتیٹ سی بی سی احوالکاری وسیلہ تا رد ئٹ پارینے کہ امریکہ تینا کل آرمی ٹیکنیکل میزائل سسٹمز ہرافتے اے ٹی اے سی ایم ایس پاننگک، و پریسیژن سٹرائیک میزائل (مزل ءِ جوان نشانہ کروک آ میزائل) تے استعمال کرینے۔

امریکہی سروک آک پاریر کہ اے ٹی اے سی ایم ایس و پریسیژن سٹرائیک میزائل آتا کچ کم ءِ و کل آن گیشتر ہلہلی پیٹریاٹ و ٹرمینل ہائی الٹیٹیوڈ ایریا ڈیفینس (تھاڈ) انٹرسیپٹرز آتا کچ کساس نا بابت ئٹ ءِ۔ انتئے کہ فیکٹری نا پارہ غان پوسکنو میزائل تیار کننگ نا رفتار مدان ءِ۔ ایکان دافتے استعمال کننگ نا رفتار زیات ءِ

سینٹر فار سٹریٹجک اینڈ انٹرنیشنل سٹیڈیز نا جولائی نا اسہ رپورٹ ئسے نا رد ئٹ جنگ ئنا بنا مننگ آن مست امریکہ تون 2330 پیٹریاٹ انٹرسیپٹرز ئسرہ و جولائی نا ایسر ئسکان دافتا کساس کم مریسہ 759 آن 827 ئسکان نا نیام ئٹ رہینگاسر۔ رپورٹ نا رد ئٹ جنگ آن مالو امریکہ تون 452 تھاڈ انٹرسیپٹرز ئسر و 27 جولائی اسکان دافتا کساس 234 آن 278 نا نیام ئسکان بچار۔

سی ایس آئی ایس نا اسہ پین پوسکنو رپورٹ ئسے نا رد ئٹ ہڑتوما قسم ئنا کوڑ آتے جنگ آن مالو نا کچ اسکان ہتنگ کن کم و ود 2029 نا نیام اسکان نا وخت لگنگ کیک۔

پینتاگون نا چیف حوالکار (ترجمان) شان پارنل سی بی ایس خبر والا ءِ اسہ بیان ئسے ٹی پارے: ‘ امریکہ نا فوج جہان نا کل آن طاغت تخوک آ فوج ءِ و داڑتون ہمو کل گڑاک ساڑی ءُ ہرافتا اودے صدر نا پارہ غان گچین کروک آ وخت و جاگہ غئے کاروائی نا گرج مریک۔

او مستی پارے کہ نن جتا انگا جنگی کمانڈز آتا رد ئٹ کیہی سرسہب ءُ آپریشن کرینن و داڑتون اوار دا ہم باور کریفینن کہ امریکہ نا فوج اتون تینا اولس و مفاد آتا رکھ اکن بھلا صلاحیت آتا کوڑ آک ساڑی اریر۔

وزیر رکھ، پیٹ ہیگسیتھ داڑان مالو امریکہ نا جنگی مڈی تا بابت ہلہلہی خلیس تے چھپ تسونے۔

14 جون ئنا پروگرام ‘ فیس دی نیشن ود مارگیٹ برینن’ ئٹی ہیگسیتھ پاریسس کہ ‘ دا چھپ چوٹ ءُ کسہ ئسے ہرادے میڈیا شون تننگ خوائک و گواچن دادے کہ ننا جنگی مڈیک تا کوڑ آک گچین حالیت ئٹی ءُ و گیشتر سوگؤ مریسہ ءُ

ننا آڑسندہ غاتو باز مست آن رشتہ ئس جوڑ مس
ننا دا دیگر آتو اڑدے ہر نن کسہ ئس جوڑ مس

ننے ہریف ننیان بخت تینا مون ۓ اڑسانے
ننے خفتور ننتون مہرداری مش اوغانے

ننیا بر ننے خن کوپہ غاتۓ یار ۓ ارفین اُن
ہزار ارمان مودہ تو نما نن شار آن ہمپین اُن

تینا خنتیٹی تینا سنگت آتے نن خنان بے لاد
امر پا نن مرین داکان پد نا زندگی ٹی شاد

ارافتے ہچ روادار الوینہ نن تہوش ئس پل
ہموتا ٹکر آ بالاد ءِ تینا دوتیٹ کرینک مُچ

ننیا مش سچاپی آ تینا ڈوک آتے ڈھیرانے
سات آ رخصتی نا نے سما انت قہر شاغانے

برک کان باغبانہ ۓ تینا نن ہار جغر نا کین
بہ کان خضدار ۓ تینا نن دتر نا پل انام کین

شاغن دوتے اونا لخ ٹی اوڑان حق بخشی کین
بہ کان نوغل نا پاک آ خاک ے تینا مہبر ہستی کین

اراڑے کاسہ استان نی کنا پل آ وطن زہری
سلس دیخس نا مڷ آک زندہ او کیرہ امن زہری

ننا پل زندگی نا غمتے تو دا سنگتیس جوڑ مس
وطن نا ویل دڑد آتو ننا بن دولخیس جوڑ مس

سعد زہری

برمتہ کروک ظہور جمالزئی نا پارہ غان ظلم و زوراکی برجا، اسماء جتک نا “رکھ ئنا خواست” ئنا بیان آن منا گھنٹہ پد اونا باوہ ءِ کسفیر۔

خضدار نا ہندی بی بی اسماء جتک بلوچ وڈیو اس کشیسہ پارے کہ اودے برمتہ کروک ظہور جمالزئی دائسکان اوفتے دھمکی تریسہ ءِ۔ داڑسکان کہ ہندا ٹولی اونا باوہ و ایلم تے کسفنگ نا دھمکی ہم تسونے۔

اسماء بلوچ نا رد ئٹ تدینی آن پد ہم برمتہ کروک آتا برخلاف ہچو کاروائی اس کننگتؤ و برمتہ کروک آ دائسکان ہرجاہ آزاتی ٹی پیری کننگ ءِ۔

زالبول نا رد ئٹ برمتہ کروک ظہور جمالزئی و اونا ٹولی تڑی تسونو کہ اودے ولدا برمتہ کننگ کیرہ، اگہ صوبائی حکومت و ہندی سردار اوفتے انصاف تفسہ و دوبہ دار آتا برخلاف سخت ءُ کاروائی کپسہ گڑا او بے وس مریسہ تینا ساہ ءِ ایتک، ہرانا زمواری وزیر اعلی بلوچستان سرفراز بگٹی و مسکوہی وزیر اعلی و ساڑی صوبائی حکومت نا باسک ثنا اللہ زہری آ تخنگو۔

واہم پوسکن بروک آ ڈس آتا رد ئٹ درو خضدار ئٹی سلہہ بند بندغ آک سم کاری کریسہ اونا باوہ عنایت اللہ جتک ءِ کسفیر۔

یات سلے کہ خضدار نا ہندی زالبول ءِ 5 فروری 2024 ئٹی پولیس لائن خضدار آن سلہہ بند ” ڈیتھ اسکواڈ” نا بندغ آک برمتہ کریر کہ ہرا نا برخلاف تیبہ بلوچستان ئٹی برانز، ہتڑ و ریلیک کشنگار۔

ہندا ڈیتھ اسکواڈ بلوچستان نا مسکوہی وزیر ثناء زہری نا سروکی ٹی کیہی سال تائے چُست ءِ۔ برمتہ نا بنجاہی دوبہ دار ظہور جمالزئی و اونا ایلم زہری و داپار ایپار ئٹی ڈیتھ اسکواڈ نا مُخ تفی ءِ کیرہ۔

سال 2024 نا تدینی آن پد برانز آتا سوب آن پولیس اسماء جتک ءِ گمانی وڑ اٹ یلہ کرفے و ایکان بلوچستان حکومت برمتہ کروک آتا برخلاف کاروائی کننگ نا پڑو ہم تسس، ولے برمتہ کروک آ دائسکان دزگیر متور۔

مولانا خلیل اللہ شہاب تینا پوسکنو بیان اسیٹ پارے کہ بلوچ نلہ نسلی مسلمان مسونے و او نمے آن (پاکستان آن) جوان ءُ مسلمان ئس ہم رہینگانے۔ ہرا اسلام نا تشریح ءِ نی و نا رند ءِ ہلوکا چینل آتا زیہا کننگ ئٹی اُرے او اسلام نا گواچنی تشریح آخا بلکن بےشرفی ءِ۔

او مستی پارے کہ دا بلوچ ورناک ننا چناک ءُ، دافتا باوہ لمہ، خاہوت، پیرہ بُن بیرہ کل ءِ نن چانہ۔ گڑا دافتے انڈیا نا ایجنٹ پاننگ نا ہمو بیانیہ ءِ ہرا داسا تینا گڈیکو ساہ تے ہلیسہ ءِ۔

او مستی پارے کہ بلوچ اینو تینا نت تیا سلوک ءِ۔ گدرینگوک ہشتاد سال آن او نا دو تیان زوراکی تے سگیسہ بسونے۔ نا ظلم و زوراکی تیان بلوچ اینو جنگ کننگ اکن بے وس مسونے گڑا بلوچ نا اسلام و مسلمانیت ءِ شکبر کننگ دروغ ئنا زیہا سلوک اسہ بیانیہ ئسے تانکہ مخلوق ءِ وطن (بلوچستان) تو میبت آن تورنگے۔

مولانا گپ کریسہ مستی پارے کہ اینو بلوچستان ئٹی مسہ سد آن بڑز ادیرہ غاتے لاوارث آتا ادیرہ پاننگانے۔ دا امر لاوارث ءُ؟ داکان ود پین ظلم مننگ کیک کہ اسہ مسڑ اس تینا دشتار کن ودار ئٹی ءِ، اسہ ہیڑ اس تینا ایلم کن و اسہ پیر ءُ لمہ اس تینا مار اکن کور انگا خن تیتون وداری ءِ۔ انت دافتا بندغ آک ہندا ادیرہ تیٹی دفن کننگتنو؟

“اسٹ نا اسے وونٹ اس دزی مریک تو او خڷ بِٹ اس شاغک ولے اسٹ نا ورنا اس زورانسری ئٹ بیگواہ ءِ و او چھپ مرو۔ ہندنو بندغ ہم اریر کہ ہرا بیست سال آن زوراکی ئٹ بیگواہ ءُ و دافتیان پد ہم نن امر چھپ تولن!”

مولانا خلیل اللہ شہاب پارے کہ اینو بلوچ ورنا تیٹی شعور بسونے و اوفک نے ہر تلہ غا چَھپ تسونو۔ نے و نا ریاست آن نمن ءُ، نا پروجیکٹ آک و بلوچستان نا پن آ تروک آ پیکج آک چَھپ تننگانو و دا زوراکی نا مون ئٹ دافک نے کٹور ہلور۔