غزل
شاہ بیگ شیدا
نی شُوگ شانہ کپہ ، دیوالے مُتکننگا
بسف ہمو نی تینا ، بس خیالے متکُننگا
تاریخے پِیرہ ئی آ ، پِشخارہ اینو ولدا
بہ توڷ کنتو ایتے ، احوالے متکُننگا
چوکاٹا تینا خڷک ، نی رکھ ئکے اُڑانا
نی خوار ئسےتو پٹہ، اے نَعلے مُتکُننگا
نےتِف ہراکہ سیخا ، ہم میوہ ئس مفیتہ
چُوڑان کشہ بٹ نی ، اے نیال مُتکُننگا
نےدیر پائے پٹہ ،پھوتی تےمُست ئنا نی
بر داسہ پاو کُٹِّف ، جنجالے مُتکُننگا !!!
شاہ بیگ آن مس شیدا تپیسہ انتہ اودے
دوئے تخک نی اُست آ، نا سیال ء متکُننگا
بلوچ لبریشن آرمی نا ترجمان تینا شنگ کروک بیان ئٹی پارینے کہ بی ایل اے نا سرمچار آک قلات و مستونگ ئٹی اِرا جاگہ غا کوزہ گیر پاکستانی لشکر ءِ ٹک کریر و اسہ دزگیر کروک ریاستی مخبر و آلہ کار ئسے راجی غداری نا ڈوہ ئٹی کھسفیر۔
او پارے کہ بی ایل اے نا سرمچار آک استو قلات نا علاقہ منگچر ئٹی کوزہ گیر پاکستانی لشکر نا بنجائی کیمپ ئنا رکھوک چوکی آ ساڑی کارندہ آتیا چغلی بمب جلہو آن گڈ بنجائی کیمپ ءِ جلہو ئٹ ٹک کریر، دا جلہو ئٹی کم آن کم مُسہ دشمن کارندہ ٹپی مسر۔ سار آن ہنوک دشمن لشکر پدان لس آبادی تیا تینا مون سم کاری کرے۔
او پارے کہ ایلو کنڈ آن بلوچ لبریشن آرمی نا سرمچار آک مستونگ نا علاقہ اسلپنجی، مَرو ٹی 11 اگست آ اسہ کارروائی ئسیٹی پاکستانی لشکر و ڈھکوک ادارہ آتا اڈ تروک پن ئنا ڈیتھ اسکواڈ نا اسہ اہم کارندہ عبید کرد ولد خدابخش کرد سریاب نا ہندی، ءِ دزگیر کریر۔ عبید کرد ءِ بلوچ لبریشن آرمی بھلو وخت ئسے آن ہلنگ نا کوشست کننگ اس۔
ترجمان پارے کہ تفتیش نا وختا عبید کرد منا کہ او پاکستانی لشکر نا پاننگ آ مَرو، کولپور و دشت ئٹی سلہہ بند ٹولی تا سروکی ءِ کننگ اس ہرا پن کروک علاقہ آتیٹی لشکر کشی تیٹ کوزہ گیر لشکر تون کمک کریرہ۔ او منا کہ فوج تون اوار مَرو ئٹی ٹکری واحد کرد و اونا چنکا ایلم داد محمد کرد تون اوار ایکو بندغ آتا زوراکی ئٹ بیگواہی تیٹ تُد مسنے۔
اونا پاننگ اس کہ آلہ کار عبید مَنا کہ پن کروک علاقہ آتیٹی کوزہ گیر لشکر اونا سلہہ بند ٹولی تے دُزی و داڑیلی تون اوار تاوان کن برمتہ کننگ نا موکل تسنو۔ عبید مَنا کہ او پن ئنا ڈیتھ اسکواڈز نا سرغنہ شفیق مینگل تون تفوک مسنے و 2011 ٹی شفیق مینگل آ بلوچ لبریشن آرمی نا مجید برگیڈ نا جلہو نا وختا او پانزدہ نا کچ ٹپی مروکا تے اسپتال آ دننگ ئٹ کمک کرینے۔
او ودیک پارے کہ پٹ و پول نا وختا آلہ کار تینا نیٹورک نا ایلو بندغ آتا پن و حوال تے پاش کرے۔
او پارے کہ عبید کرد ءِ راجی غداری نا ڈوہ ئٹی بلوچ راجی عدالت سزا موت تس ہراڑا بی ایل اے نا سرمچار آک درو عمل کرسا اودے اونا منطقی انجام آ سر کریر۔
او ایسر ئٹ پارے کہ بلوچ لبریشن آرمی ہن کروک آلہ کار ءِ کھسفنگ و کوزہ گیر لشکر آ جلہو تا زمہ واری ءِ ارفک۔ کوزہ گیر لشکر و اونا کمکار آتیا ننا جلہوک اندن برجاء مرور۔
کوئٹہ آن پاکستانی لشکر اسہ ورنا ئسے بیگواہ کرینے۔
بلوچ یکجہتی کمیٹی نا رد ئٹ ریاض احمد بلوچ ءِ 14 اگست آ شام ئنا 7بجہ آ فورسز آک بیگواہ کرینو ہرا جناح ٹاؤن کلی شابو نا ہندی ئسے۔
پاننگانے کہ ریاض احمد اسہ شئیر پاروک ئسے ہرادے اسہ شئیر ئس خلنک نا سوب آن بیگواہ کننگانے۔ دا رد ئٹ اونا خاہوت نا کنڈ آن اسہ پریس کانفرنس ئس کننگو و اونا آجو مفننگ نا دروشم ئٹ مُستی نا لائحہ عمل نا پڑو کننگو۔
ایلو کنڈ آن بلوچ یکجہتی کمیٹی نا سروک بیبرگ بلوچ پارینے کہ راجی مچی نا گپ تران ئٹی بی وائی سی نا کنڈ آن اسہ خواست دا ہم اس کہ راجی مچی ٹی اوار مروکا یا تعاون کروکا باسک آتے بیر ہلوک کارروائی تا گواچی کننگوف ولے ریاست معاہدہ ءِ پورو کننگ اف و ننا بندغ آتے زوراکی ئٹ بیگواہ کننگ ءِ۔
بیگواہی نا شش سال حکومت و عدالتی بے سوبری آن انصاف رسینگنگ سخت ءِ۔
پاکستان ئٹ تدوکا شش سال آتیان زوراکی ئٹ بیگواہی نا گواچی بلوچ باسک راشد حسین بلوچ نا لمہ پارینے کہ پاکستان ئٹ عدالت آک انصاف تننگ ئٹ بے سہب ءُ و ریاست بلوچ نا ویل ءِ ایسر کننگ ئٹ بے سوبری نا درشانی کننگ ءِ۔
چاگڑدی حوالکاری تلہ غا تینا اسہ ویڈیو کلہو اسیٹ بلوچ باسک نا لمہ کوئٹہ ئٹ ساڑی سیاسی و بے سیاسی غٹ فکر آتیتون تفوک بندغ آتیان خواست کرینے کہ او 18 اگست آ راشد حسین نا آجو مفننگ نا برخلاف مروک ریلی ئٹ اوار مریر۔
راشد حسین نا لمہ ودیک پارینے کہ انصاف نا دوئی کننگ کن غٹ قانودی در آتیا ہِنان انصاف نا خواست کرین کراچی آن کوئٹہ و کوئٹہ غان اسلام آباد اسکان عدالت آتا در آتیا ہِنان واہم ننے انصاف فراوان کننگتو۔
او پارے کہ پاکستان ئٹ قانودی ڈول ئٹ انصاف دوئی کننگ ءِ ناممکن جوڑ کننگانے اندا خاطران زوراکی ئٹ بیگواہ بندغ تے مخلوق نا توار بکار ءِ۔
ضلع کیچ نا تحصیل بلیدہ ئٹ سم کاری آن خوانندہ اس کسکنے۔
شابیتی حوال تا ردئٹ بلیدہ صاحب خان بازار ئٹ موٹر سائیکل سوار سلہہ بند بندغ آک انور نا مار رحیم جان ءِ اونا دکان ئٹ سم کاری کریسہ کسفیر۔
کہوک ساچ اسکول چیئرمین عبدالرحمن بازار کیمپس نا خوانندہ اس ئس و علاقہ ئٹ چاگڑدی بابت کاریم کریکہ۔
علاقائی بندغ آک تدینی نا مذمت کریسہ پارینو کہ دا بھاز اُست ہسون ءُ تدینی ئسے کہ غریب و معصوم آ بندغ آتے گواچی کننگسہ ءُ۔ دن انگا تدینی تیان علاقہ ئٹ بدامنی تالان کننگسہ ءُ، ہراڑے دن انگا تدینی تیان اسہ تپہ ئسے نا بندغ اس ہم رکھوک اف۔
اندن پاننگک کہ کسفنگوک آتا تعلقداری سرکاری مُخ تف ٹولی آن ءِ، داڑان مالو دا ٹولی بلیدہ ئٹ کیہی خون و ڈوہ تیٹ اوار مسنے۔
بلوچستان نا ضلع کیچ آن پاکستانی لشکر اسہ بندغ ئسے دزگیر کرسا بیگواہ کرینے۔
بیگواہ کننگوک بندغ نا چاہنداری امید نا مار کمبر نا پن ئٹ مسنے۔
حوال تروکا تا رد ئٹ ورنا ءِ استو ننکان یک بجہ نا وختا فورسز آک کیچ ئنا علاقہ بلیدہ بگ آ چھاپہ خلِسہ دزگیر کرینو ہراکان گڈ اونا بارو ئٹ ہچو معلومداری رسینگتنے کہ او ہراڑے و امر ءِ۔
خیال ئٹ مرے بلوچستان ئٹی زوراکی نا بیگواہی تا تدینیک چرجوئی ئٹ رپورٹ مننگ ءُ۔ تدوکا دے خاران آن پاکستانی لشکر اِرا بندغ ءِ دزگیر کرے ہرافتا خاہوت نا برانز خاران ریڈ زون ئٹی برجاء ءِ۔ داکان بیدس تدوکا دے تیٹ گوادر اوتھل و کوئٹہ آن ہم زوراکی نا بیگوہی تا تدینیک رپورٹ مسنو۔
یاتی مرے کہ پن کروک ورنا داکان مُست ہم زوراکی نا بیگواہی تا گواچی مسنے ہرا ہفت دے آن پد آجو مسس داسا اسہ وار پدا فورسز آک اودے زوراکی ئٹ بیگواہ کرینو۔
کوئٹہ نا ایب کیب ئنا علاقہ آتیٹ پاکستانی لشکر نا ہیلی کاپٹر آک بال کننگ آ خننگ مسنو۔
حوال تا رد ئٹ زرغون و اونا ایب کیب ئنا علاقہ آتیٹ اینو پاکستانی لشکر نا ہیلی کاپٹر آک چرجوئی ئٹ بال کننگ ءُ۔
کوالخواک دا رد ئٹ دائسکان شابیتی حوال تتنو۔
ہندی مخلوق نا رد ئٹ علاقہ ٹی فوجی آپریشن نا خلیس نا درشانی مننگ ءِ واہم دا ہیت دائسکان پک اف۔
گواڑخ دسیو کیو سینگار بولانے
ہُورہ مریو شلیو کیو سینگار بولانے
شوان ئتو بُزگل گھر گھٹ تلارآتے
خنتا تِخیو کیو سینگار بولانے
گہوش پُدینا پِر بلسم زیبل ڈغار
لوز پٹیو ہتیو کیو سینگار بولانے
دیوان دا مشتے تون مُدامی مرے
ٹاکو خلیو مخیو کیو سینگار بولانے
خنپر مونجا ہِچ اسُل تلار آتے تینا
غمتے ای کُنیو کیو سینگار بولانے
دیدن گوا آجوئی نا پِرِک کِن ہُریس
شعر تفیو کیو سینگار بولانے
دیدن بلوچ
بلوچستان نا بنجاہی شار کوئٹہ غان پاکستانی لشکر اِرا بندغ ءِ زوراکی ئٹ بیگواہ کرے۔
پاکستانی لشکر نیام غنڈی آن اِرا ایلم ءِ زوراکی ئٹ بیگواہ کرے ہرافتا چاہنداری بار خان مری نا مار خدا رحم مری و خدائے دوست مری ہند لیس ڈغاری نا پِن تیٹ مسنے۔
ٹی بی پی ءِ حوالکار آک پاریر کہ پن کروک بندغ آتیان خدائے دوست ءِ اپریل ئٹ و خدا رحم ءِ مئی ٹی زوراکی ئٹ بیگواہ کننگا ہڑتوم آ بندغ آک کولا کانڑ ئٹ مزوری کریرہ۔
خیال ئٹ مرے بلوچستان ئٹ زوراکی نا بیگواہی تا کیہی تدینیک مُر ئنا علاقہ تیٹ حوالکاری آسراتی مفننگ و خاہوت آتا خُلیس نا سوب وخت آ رپورٹ مفسہ۔
بلوچ یکجہتی کمیٹی نا پارہ غان تیوہ بلوچستان ئٹ تدوکا اِرا ہفتہ نا وخت ئٹ جلسہ و برانز کننگا ہرافتا خواست آتیٹ زوراکی ئٹ بیگواہ بندغ تا آجوئی و دروغ نا مونتس آتیٹ بیگواہ بندغ تا کسفنگ ءِ بند کننگ اوار ءِ۔
بلوچستان نا ضلع آواران ئٹی پاکستانی لشکر آبادی تیا سم کاری کرسا اسکول نا اسہ استاد ئسے کھسفینے۔
سم کاری نا تدینی آواران نا علاقہ مالار نا ہند آ مسنے، و بیران مروکا استاد نا چاہنداری عبدالخالق دوست محمد نا پنا مسنے۔
بی این ایم نا بندغی حق آتا ڈیپارٹمنٹ پانک تدینی ءِ پک کرسا پارینے کہ دننگا کارروائیک بندغی حق آتا سخت لتاڑ ءُ و دافتا دمدستی حساب ہلوئی مرے۔
او پارے کہ نن پاکستانی کوالخواہ تیا زور شاغِنہ کہ او شاری تا رکھ ءِ یخینی کیر و جہانی قانود آتا پابندی ءِ کیر۔
خیال ئٹ مرے کہ اِرا دے ئٹی دا وڑ ئنا دا ارٹمیکو تدینی ءِ داکان مُست تدوکا دے تیٹ پاکستانی لشکر کولواہ نا علاقہ ڈنڈار ئٹی سم کاری کرسا پنچ سالی ءُ چُنا سے بیران کریسس ہرا نا چاہنداری ستارہ بشیر نا پن ئٹ مسس۔
