بلوچستان نا ضلع چمن ئٹ است و پڈ ئنا دین تالان مسنے 350 بندغ نا جتاء اسپتال آتیٹ دارو درمان مننگ ءِ اندن اسپتال آتیٹ ایمرجنسی ٹہفنگانے۔

ایم ایس ڈاکٹر رشید ناصر پارے کہ چمن ئٹ است و پڈ ئنا دین نا تالان مننگ آن سرکاری اسپتال و بنداوی جانجوڑی مرکز آتیٹ دارو درمان تا بھاز نیستی ءِ سول اسپتال نا وارڈ آتیٹ جاگہ تا کمبوتی نا سوب آن ناجوڑ آتے اسپتال آن پیشن ڈرپ خلنگ برجاء ءِ۔

شاری تا پاننگ ءِ کہ متکنا ڈی ایچ کیو اسپتال ئٹ ہم آسراتی تا نیستی ءِ ناجوڑ آتے ڈرپ ہم رسینگپک۔

محکمہ جانجوڑی نا ردئٹ صوبائی حکومت آن علاقہ ئٹ گیشتر دارو درمان تا فراوانی نا خواست کننگانے ولے دائسکان کوئٹہ آن دوائی رادہ کننگتنے۔

ضلع چمن نا ڈی ایچ او ڈاکٹر عصمت اچکزئی پارینے کہ تیوہ ضلع نا غٹ پرائیوٹ و سرکاری اسپتال آتیٹ ایمرجنسی ٹہفنگانے۔ دا وخت 350 آن زیات است و پڈ آن زیمی بندغ آتا جتا اسپتال آتیٹ دارو درمان مننگ ءِ۔ او مخلوق آن خوراک آتیٹ خیالداری کننگ نا خواست کرینے واہم دائسکان کہنگ نا ہچو حوال اس مونا بتنے و ناجوڑ آتا دارو درمان برجاء ءِ۔

ہفتہ نا دے بلوچستان نا بنجائی شار کوئٹہ نا علاقہ سریاب روڈ آ بلوچستان یونیورسٹی نا خڑک تراک ئس مسنے ہراٹی مُسہ بندغ ٹپی مسنو۔

ٹپی مررکا تے بنداوی شعبہ تدینی بی ایم سی ہسپتال کوئٹہ ٹی جانجوڑی کمک کن رادہ کننگانے ہرافتا چاہنداری محمد علی مار احسان اللہ، عبدلرشید نا مار عبداللہ، عالم گل نا مار رحیم اللہ حوالدار نا پن ئٹ مسنے۔

فورسز آک ودیک پت و پول کننگ ءُ۔ تدینی آن گڈ فورسز آک علاقہ ءِ گھیرہ کرسا سخت چیکنگ بناء کرینو۔

ہفتہ نا دے خاران آن پاکستانی لشکر اسہ بندغ ئس دزگیر کننگ آن گڈ بیگواہ کرے۔

خاہوت نا رد ئٹ محبوب ملازی نا مار شہزاد ملازی ءِ اینو سہب ئنا فورسز آک گدان ہوٹل خاران آن دزگیر کرسا بیگواہ کرینو۔ او ورنا نا رکھوک آجوئی نا خواست کرینو۔

خیال ئٹ مرے کہ بلوچستان ئٹی زوراکی نا بیگواہی تا تدینی تیٹ بھلو کچ ئسیٹی ودکی مسنے۔

بلوچ سیاسی و چاگڑدی تپہ آتا کنڈ آن زوراکی نا بیگواہی تا تدینی تے اشتماعی سزا پاننگانے۔ اوفتا رد ئٹ بیگواہ مروکا بندغ تون اونا تیوہ خاندان ءِ ازیت تننگک۔

بلوچ یکجہتی کمیٹی نا آرگنائزر ڈاکٹر ماہ رنگ بلوچ پارینے کہ زوراکی نا بیگواہی ظلم ئنا گندہ غا دروشم ءِ و دا بلوچ زنک ایسری ءِ گیشتر لمبہ ایتک۔

او اسہ زالبول ئسے نا دوٹی 9 بندغ نا عکس ارفوک عکس ءِ چاگڑدی حوالکاری تلہ تیا تریسہ پارے کہ قلات ئٹ 2016 ئٹ اسہ لشکر کشی اسیٹی اسہ خاہوت نا 9 بندغ برمتہ کننگاسر و اوفک دائسکان ہم بلوچ جہد آ سوج ارفرہ؟

یاتی مرے قلات آن اسہ خاہوت نا زوراکی ئٹ بیگواہ بندغ آتیٹ علی جان نا مار پکار خان، پکار خان نا مار امام داد، پکار خان نا مار عبدالنبی، پکار خان نا مار میر محمد، پکار خان نا مار داد محمد، علی جان نا مار مصطفیٰ، مصطفیٰ نا مار میر جان، زمان خان نا مار سبز علی، زمان خان نا مار تاج محمد اوار ءُ ہرا دائسکان بیگواہ ءُ۔

بلوچستان لبریشن فرنٹ نا ترجمان میجر گہرام بلوچ میڈیا غا شنگ کروک تینا بیان ئٹی پارینے کہ ننا سرمچار آک پانزدہ و شانزدہ اگست نا ننکان دوانزدہ بجہ غا شاپک ئٹی بارگ مش آ ساڑی کوزہ گیر پاکستانی لشکر نا کیمپ ئنا مُسہ مورچہ ءِ اسہ وختا ٹک کریر۔ پانزدہ منٹ برجاء سلوکا جلہو ئٹی پوسکن و بھلا سلہہ تے کارمرز کننگا ہراڑان دشمن نا اِرا کارندہ مرگ ئنا گواچی و مُسٹ ٹپی مسر۔

ترجمان پارے کہ بلوچ راج ئنا سرمچار آک تینا لمّہ وطن کن ساہ ئنا ٹیکی ترسا دشمن ءِ ہر محاذ آ بےسوب کننگ ءُ۔

او پارے کہ بلوچ سرمچار آتا تاغت بلوچ الس ءِ ہرافتا کمک ئٹ تنظیم اسہ تیوہ ءُ تاغت ئس جوڑ مسنے ہرا ہر پِڑ آ دشمن ءِ دک خلنگ بھس کننگ ءِ۔ او وخت مُر اف کہ جہان نا نشخہ آ بلوچستان اسہ آجو ءُ ڈیہہ ئسے نا دروشم ئٹ مونا برو۔

ترجمان پارے کہ بلوچستان لبریشن فرنٹ دا جلہو نا ذمہ واری ءِ ارفک۔ ریاستی لشکر نا تیوہ پیشتمنگ اسکان دشمن لشکر آ جلہوک برجاء مرور۔

ڈپٹی کمشنر قلات چانڑدہ اگست نا مجلس آتیٹ اوار مفروکا ضلعی افسر آتے وضاحت کن خواہا۔

ڈپٹی کمشنر قلات 14 اگست آ پاکستان نا آجوئی نا دے ئنا رد ئٹ مروکا مجلس آتیٹ اوار مفروکا کیہی ضلعی افسر آتے نوٹس ترسا ہمو کارندہ آتے انجینئرز و تعلیمی سروک آتون اوار مُسہ دے ئٹی تینا بے حاضری نا سوب آتے پاننگ نا پنت تسنے۔

نوٹس ئٹ پاننگانے کہ دا افسر آک چانڑدہ اگست نا مجلس تیٹ بتنو ہرادے اوفتا راجی فرض ئنا لتاڑ نا ہُننگ مرو۔ ڈپٹی کمشنر پارینے کہ اگہ تسلی بخش وضاحت رسینگتو تو تادیبی کارروائی کننگو۔

کمشنر قلات نا کنڈ آن نوٹس نا کاپیک کوئٹہ نا بڑزکو کوالخواہ تیا رادہ کننگانو۔

کوئٹہ ئٹ کانگو وائرس نا گواچی اسہ ناجوڑ اس کسک اندن برجاء سال ئٹ دائسکان بلوچستان ئٹ 5 بندغ کانگو وائرس نا سوب کسکنو۔

ایم ایس فاطمہ جناح چیسٹ اسپتال کوئٹہ نا ڈاکٹر علی احمد پارینے کہ استو 42 سالی محمد اقبال پنی ءُ بندغ ئسے فاطمہ جناح اسپتال آ دننگا ہرانا ٹیسٹ آک ننکان کننگاسر۔

او پارینے کہ ناجوڑ ءِ کانگو آن رکھنگ کن اونا درمان بناء کننگاسس و اینو سہب ئنا رسینگوک رپورٹ آتیٹ نتیجہ غاک جوان بسوسر واہم حالیت نازرک مننگ نا سوب مریض اینو نماز جمعہ نا وخت آ ساہ تس۔

ناجوڑ نا جون ءِ المی کارروائی آن پد خاہوت ءِ تننگانے۔ اسپتال حوالکار آک پارینو کہ تدوکا 48 گھنٹہ نا وخت ئٹ کانگو وائرس نا 2 کیس رپورٹ مسنو اندن بلوچستان ئٹ برجاء سال 21 ناجوڑ آتیٹ کانگو وائرس نا پک مسنے اندن بلوچستان ئٹ برجاء سال کانگو وائرس آن 5 بندغ کسکنو۔

کوئٹہ نا کیب ئنا علاقہ ئٹ پاکستانی لشکر نا ہیلی کاپٹر آتا بال ارٹمیکو دے ہم برجاء ءِ۔

حوال تا ردئٹ زرغون و اوڑتون تفوک علاقہ شعبان، سریشہ، ولی تنگی، تور شار ئٹ درو آن پاکستانی لشکر نا ہیلی کاپٹر آتا بال چرجوئی تون برجاء ءِ۔

کوالخواک دائسکان دا بابت ہچو شابیتی حوال فراوان کتنو۔

علاقائی حوالکار تا ردئٹ اینو علاقہ ئٹ شیلنگ کننگا۔ واہم نسخان تا بابت معلومداری مونا بننگ کتنے۔

بلوچستان نا علاقہ دالبندین آن بجلی نا کھمبہ تیٹ تفوک پنچ بندغ نا جونک خننگانو۔

دالبندین نا ایڈیشنل ایس ایچ او عبدالحکیم جون تا خننگ ءِ پک کریسہ پارینے کہ غٹ بندغ آتے سم خلیسہ کسفنگانے۔

اونا پاننگ ءِ کہ ہر پنچ بندغ ءِ کسفنگ آن پد اوفتا جون تے شار آن کم و ود مُسہ کلو میٹر نا مُری آ ڈگری کالج آن خڑک بجلی نا کھمبہ تیٹ تفنگاسس۔

ایڈیشنل ایس ایچ او نا ردئٹ اندن گمان مریک کہ دا بندغ آتے دئے آن پانزدہ دے مالو پین جاگہ ئسے آ کسفسہ اوفتا جون تے ڈگری کالج نا خڑک ہتنگانے۔

جون تے ڈسٹرکٹ ہیڈکوارٹر اسپتال آ دننگانے۔

عبدالحکیم نا پاننگ ئس کہ ہر پنچ بندغ ءِ سینہ ٹی پنچ آن ہفت سُم خلنگانے۔

پولیس نا ردئٹ جون تا دائسکان چاہنداری مننگ کتنے۔ کہوک آ بندغ آتا سن آک گمانی 22 سال آن 27 سال نا نیام ئٹی ءُ۔

ایڈیشنل ایس ایچ او نا پاننگ ئس کہ تدینی نا جتا پالو تیان پٹ و پول مننگ ءِ۔

واہم خیال درشان مننگے کہ دا کروائی ایران ئٹ کاروائی کروک شدت پسند تنظٰم جیش العدل نا مننگ کیک ہرا منہ وخت مُت تینا کسفنگوک راہشون مراد نوتیزئی نا خون ئنا دوبہ ئٹ پنچ بندغ ءِ دزگیر کریسہ اوفتا منوک آ ویڈیو تے ہم شینک ریسس۔