خضدار مونتس ئٹ کسفنگوک بندغ تا تعلق کالعدم مذہبی تنظیم آن ءِ۔

خضدار آن رسینگوک حوال تا ردئٹ کاؤنٹر ٹیررزم ڈیپارٹمنٹ (سی ٹی ڈی) کارروائی اسیٹی 4 شکبر بندغ ءِ کسفنگ نا دعویٰ کرینے۔

سی ٹی ڈی کوالخواہ تا ردئٹ اینو اینو خضدار ئٹ سی ٹی ڈی تون سم کاری ٹی 4 شکبر بندغ کسفنگار ہرافتا جون تے دوئی مریسہ خضدار سول اسپتال آ دننگا۔

سی ٹی ڈی تدینی ٹی کسفنگوک بندغ تا تعلقداری ءِ کالعدم تنظیم آن پارینے۔

یاتی مرے بلوچستان ئٹ پاکستانی لشکر خاص وڑئٹ ایف سی و سی ٹی ڈی نا پارہ غان دنو کیہی تدینی مسنے ہراڑے دروغ نا مونتس تیٹ مالو آن دزگیر کننگوک بندغ آتے کسفنگانے۔

واہم اینو خضدار ئٹ پاکستانی لشکر نا گمانی مونتس ئٹ کسفنگوک بندغ تا چاہنداری دائسکان پاش کننگتنے۔

بلوچستان نا ضلع کیچ نا بنجاہی شار تربت آن پاکستانی لشکر اسہ ورنا ئسے دزگیر کریسہ زوراکی ئٹ بیگواہ کرینے۔

بیگواہ کننگوک ورنا نا چاہنداری ملا برکت نا مار انیس نا پن ئٹ مسنے۔

علاقائی حوالکار تا پاننگ ءِ کہ انیس ءِ استو ہشت و نیم نا وخت آ سری کہن تربت آن اونا دکان نا مونان کورولا گاڑی اسیٹی سوار سلہہ بند بندغ آک زوراکی ئٹ بیگواہ کریر۔

انیس نا بابت پاننگک کہ اودے اِرا سال مالو 14 اکتوبر 2022 آ پاکستانی لشکر زوراکی ئٹ بیگواہی نا گواچی کریسس ہرا پدان 21 اکتوبر 2022 آ آجو کننگاسس۔

استو ایران نا پارہ غان اسرائیل آ سد آ میزائل آتیٹ جلہو کننگ آن پد ہڑتوم آ بدی دار تا نیام ئٹ تڑی تا لڑ برجاء ءِ۔

ایران اسرائیل آ سد آتا کچ میزائل خلک ہراڑان بھاز آ میزائل آتا ڈغار آ تمنگ آن ماڑی تے نسخان رسینگانے۔ میزائل جلہو تیان پد اسرائیلی کمکار آک زیمی مروک جاگہ تا جاچ ءِ ہلکر۔ ایرانی میزائل آتیان نیامی اسرائیل ئٹ اسہ اسکول ئسے نا ماڑی ءِ ہم نسخان رسینگانے۔ اسرائیل نا دعویٰ ءِ کہ ایران نا بھاز آ میزائل آتے آسمان ئٹ ہی بھس کننگانے ولے گڑاس ڈغار آ ہم تمانو۔

اسرائیلی لشکر نا ترجمان رئیر ایڈمرل ہیگاری پارینے کہ ایران نا پارہ غان اسرائیل آ استو نا مروک میزائل جلہو تا بھیم بش کروک نتیجہ مرور۔ واہم ترجمان دا بابت شابیتی ہیت کتو کہ ایران ءِ ہرا ڈول ئنا نتیجہ تیتون مون تروئی تمو و اسرائیل ہراتم دا جلہو تا ورندی ءِ ایتو۔

ترجمان پارے کہ اوڑتون دمدستی دنو حوال اف کہ ایرانی جلہو تیٹ اخس نسخان مسنے۔ اونا پاننگ ئس کہ گڑاس میزائل ملک ئنا نیامی و جاندمی علاقہ تیٹ تمانو۔

اندن اسرائیل نا سر وزیر بینجمن نیتن یاہو ایرانی جلہو تا ردعمل ئٹی تینا بیان ئٹ پارینے کہ ایران  اسہ بھلو ردی اس کرینے و اودے دانا بدلہ ءِ تروئی تمو۔

اسرائیلی سر وزیر گیشتر پارے کہ ”ایرانی حکومت ننا رکھ ئنا ارادہ ءِ پہہ مننگ ئٹ بے سہب مسنے و او تینا دژمن آن بیر ہلنگ نا ننا ارادہ ءِ ہم پہہ مفک۔“

حوال تروک ادارہ ’رائٹرز‘ نا ردئٹ اقوام متحدہ کن اسرائیلی سفیر اسہ یکہ ءُ بیان اسیٹ پارینے کہ ایران تینا گام تا ورندی ءِ زوت سگو و او ورندی اوڑکن بھاز تکلیف تروک مرو۔

ایلو پارہ غان ایرانی صدر مسعود پزشکیان چاگڑدی حوالکاری تلہ ایکس آ شینک کروک بیان اسیٹ پارینے کہ ایران نا پارہ غان میزائل جلہوک، اسرائیل نا ظلم ئنا برخلاف ردعمل ئسر۔

او پارے کہ ”ایران و خطہ کن ایمنی و سلامتی“ نا مسخت تون اوار ایران نا ”جائز حق“ آتا بنداو آ، اسرائیل ءِ ”ایرانی مفاد و شاری تا رکھ اکن“ فیصلہ کن ورندی تننگا۔

نیتن یاہو ءِ پامدار کریسہ پزشکیان پارے کہ اسرائیلی سر وزیر سرپند مرے کہ ”ایران جنگ ئنا خواست گار اف ولے ہر بھیم ئنا برخلاف سوگوی ئٹ سلوک مرو۔“

اندن ایرانی لشکر نا سروک پارینے کہ اسرائیل ایران نا برخلاف کارروائی کرے گڑا ورندی ردعمل سئے شمبے نا جلہو تیان ہم ترند مرو۔

عرب حوال تروک ادارہ ’الجزیرہ‘ نا ردئٹ اینو اسہ بیان اسیٹی ایرانی لشکر نا سروک محمد باقری دعویٰ کرے کہ درو ایران نا میزائل جلہو تیٹ موساد نا ہیڈکوارٹر آتیتون اوار اسرائیل نا اِرا ایئر بیسز آتے سر سہبی ئٹ ٹک کننگا۔

اونا پاننگ ئس کہ ایران نا میزائل جلہو تیٹ اسرائیل نا صنعتی، زرگزرانی بنجاہ یا السی ہند آتے ٹک کننگتو حالانکہ دن کننگ ہم مننگ کریکہ۔

ایلو پارہ غا اسرائیل اقوام متحدہ نا سیکریٹری جنرل انتونیو گوتریس ءِ ”دوست بفروک“ گوندیسہ اونا اسرائیل ئٹی پیہنگ آ رکھ خلکنے۔

اسرائیل نا وزیر خارجہ اسرائیل کاٹز اینو اسہ بیان اسیٹی پارے کہ انتونیو گوتریس استو نا ایران نا اسرائیل آ مروک جلہو تا پاش مذمت کتو۔

اسرائیلی وزیر خارجہ نا پاننگ ئس کہ جہان نا کم و ود غٹ ڈیہک ایران نا سفاک آ جلہو تا مذمت کریر واہم انتونیو گوتریس دن کننگ ئٹ بے سہب مس، اندا خاطر او اسرائیلی ڈغار آ گام تخنگ نا لائخ اف۔

یاتی مرے کہ اقوام متحدہ نا سیکریٹری جنرل استو اسہ بیان اسیٹی پاریسس کہ ”نیامی قطب ئٹ پوسکنا جلہو تیان حالیت آتا خرابی مننگ نا مذمت کیوہ۔“

بلوچ اسٹوڈنٹس آرگنائزیشن آزاد نا مسکوہی انفارمیشن سیکریٹری شبیر بلوچ نا زوراکی ئٹ بیگواہی ءِ ￵ چار اکتوبر آ ہشت سال پورو مرو ۔

بیگواہ شبیر نا ہیڑ سیما بلوچ نا پارہ غان شینک کروک بیان ئٹ پاننگانے کہ چار اکتوبر 2024 آ کنا ایلم شبیر ءِ پاکستانی زندان ئٹ 8 سال پورو مرو ۔ 8 سال پاننگ چاوہ ارزان مرو، ولے دافتے گدریفنگ بھاز سخت ءِ۔

اونا پاننگ ئس کہ بلوچ راج ئٹ بیرہ شبیر بلوچ اف ہرا بیگواہ نا ڈول دزگیر کننگ نا گواچی مسونو ، بلکن ہزار آ شبیر آک ءُ ہرافتے ہڑدے ئنا بنیات آ ارفیسہ ءُ۔ پاکستانی فورسز نا ادارہ غاک دا بندغ تے ارفیسہ بیگواہ کیرہ، خدا ءِ ￵سما اوفتے ارانگ دیرہ ، ولے بھاز وار دافتا جشوک جون تے خسیرہ یا نیمہ ءِ ￵ مڑدہ حالیت ئٹ یلہ کیرہ ۔

اونا پاننگ ئس کہ کنا پیرنگا لمہ ، شبیر نا نیمہ جنوزان آ زاہیفہ و نن غٹ شبیر نا رکھوک پدا بننگ کن ہر وڑئنا مننگ کروک کوشست کننگن ۔ پاکستانی ادارہ آتیان ننا خواست ءِ ￵کہ اگہ شبیر تون اوار اسہ ہم بندغ ئس اسہ ڈوہ ئس کرینے گڑا اوفتے عدالت ئٹ ہتبو، ولے دا وڑ دافتا خاہوت آتے سزا تفبو۔

اونا پاننگ ئس کہ شبیر نا رکھوک پدا بننگ کن 4 اکتوبر آ اسہ ٹویٹر کیمپین ئس چلیفنگو۔ غٹ بندغ تیان خواست ءِ ￵کہ دا ٹوئٹر کیمپین نا بشخ جوڑ مبو و شبیر تون اوار ہرا ہم پاکستانی ادارہ آتا بیگواہ کروک دزگیری نا گواچی ءُ، اوفتا آجوئی کن توار بڑز کبو۔ دا کیمپین نیمروچ 2 بجہ آن شام 10 بجہ اسکان برجاء مرو ۔

یات مرے کہ شبیر بلوچ ءِ ￵ 4 اکتوبر 2016 ٹی تربت نا علاقہ گورکوپ آن پاکستانی فوسز نا گیشتر 20 بندغ تون اوار دزگیر کریسہ بیگواہ کریر ، ارا ہفتہ غان گڈ غٹ بندغ تے یلہ کننگا ولے شبیر بلوچ نا دائسکان ہچو حوال ئس اف ۔

بلوچ خوانندہ راہشون شبیر بلوچ نا زوراکی ئٹ بیگواہی کن خاہوت تدوکا ہشت سال آن برانز کننگے ۔

نا درست بندغ آک تربت ئٹ اسہ بندغ ئسے سم کاری کریسہ کسفیر ۔

بلوچستان نا ضلع کیچ نا بنجائی شار تربت ئٹ سبزی منڈی نا ہند نا درست سلہہ بند بندغ آک سم کاری کریسہ اسہ بندغ ئسے مرگ ئنا گواچی کننگ آن گڈ نرار ۔

سم کاری ئٹ کسفنگوک بندغ نا چاہنداری ممتاز علی ولد علی احمد ساکن سنگانی سر تربت آن مسونے ۔

علاقائی ذرائع نا ردئٹ پن کروک بندغ نا تعلق سرکاری سرپرستی ٹی چلنگوک ڈیتھ اسکواڈ آن ئس ، واہم تدینی ئٹ اوار مروک بندغ نا بابت ئٹ ہچو شابیتی حوال دسکان رسینگتنے ۔

بلوچستان نا علاقہ ڈیرہ مراد جمالی و خضدار ئٹ پولیس تون اوار سم کاری نا تدینی تیٹ پولیس کارندہ تون اوار چار بندغ کسکر و پنچ بندغ ٹپی مسر ۔

ڈسٹرکٹ جیل ڈیرہ مراد جمالی نا گیٹ آ نا درست سلہہ بند آک قیدی وین آ سم کاری کریر ہرانا سوب آن ارا بندغ کسکر، کہوک بندغ آتیٹ اسہ قیدی و اسہ گمانی جلہوکار اس اوار ءِ، اندن  ٹپی مسہ پولیس کارندہ نا حالیت خلیس ئٹ پاننگ ءُ۔

پولیس نا بھلو نفری اس ڈسٹرکٹ جیل رسنگیسہ ٹپی مروک تے ہسپتال ڈیرہ مراد جمالی آ دریر۔

اندا وخت خضدار جھالاوان کمپلیکس نا ہند آ پولیس و گمانی ڈاکو تا نیام ئٹ سم کاری ئٹ اسہ پولیس کارندہ تون اوار اسہ ڈاکو اس ہند آ مرگ ئنا گواچی مس ۔

کوالخواہ تا ردئٹ اسہ ڈاکو اس دزگیر کننگانے اندن سم کاری نا دک ئٹ بروک اسہ کسری اس ہم ٹپی مس ۔

بلوچستان نا ضلع پنجگور، خاران و گوادر نا علاقہ پسنی ٹی زوراکی نا بیگواہی تا برخلاف تولوک برانز برجاء ءِ۔

درو بلوچستان نا ضلع پنجگور آن بیگواہ کننگوک ہڑتوم آ ایلم تا آجوئی کن تولوک برانز اینو ارٹمیکو دے ہم برجاء ءِ۔

دا وخت تولوک برانز ئٹ زالبول و چنا تیتون اوار بندغ آتا بھلو کچ اس اوار ءِ اندن کسر نا بند کننگ نا سوب آن ہڑتوم آ پارہ غاتیان گاڑی تا مرغن قطار آک لگانو۔

خاہوت نا پاننگ ءِ کہ ہراتم اسکان اوفتا بندغ آک آجو کننگتنو برانز اندا وڑ برجاء مرو۔

خیال ئٹ مرے درو سہب ئنا شش بجہ غا پاکستانی لشکر پنجگور نا علاقہ تار آفس ٹی چھاپہ خلیسہ اِرا ایلم صابر نور و عابد ءِ زوراکی ئٹ بیگواہ کننگ آن پد نادرست ہند آ درے ہراکان پد ہڑتوم آ ایلمک بیگواہ ءُ۔ خاہوت نا پارہ غان پریس کانفرنس نا ذریعت ئٹ بست و بند ءِ درو دو بجہ اسکان وخت تننگاسس ولے ہڑتوم آ ایلمک آجو کننگتور گڑا خاہوت برانز کریسہ سی پیک کسر ءِ ہر وڑ ئنا ہن و بر اکن بند کرے۔

ایڑے خاران ئٹ بیگواہ بندغ تا آجوئی کن تولوک برانز اینو پنچمیکو دے ہم برجاء مس اندن اینو خاران ریڈ زون آن ریلی اس ہم کشنگا۔

اینو ریلی ٹی زالبول و چنا تیتون اوار بندغ آک بھلو کچ اسیٹی اوار مریسہ زوراکی نا بیگواہی تا برخلاف و بیگواہ بندغ تا آجوئی کن نعرہ خلکر۔

خیال ئٹ مرے کہ خاران بازار آن پاکستانی لشکر نا دو آن زوراکی ئٹ بیگواہ کننگوک خاران نا ہندی پوریا گر امان اللہ محمد حسنی و کلی جنگل رحمت اللہ غان امین اللہ، ارشاد احمد و داؤد نا زوراکی ئٹ بیگواہی نا برخلاف خاہوت آک خاران ریڈ زون مسنگ پرسن چوک آ اینو پنچمیکو دے ہم تولوک برانز کننگ ءُ۔

ایلو پارہ غان بلوچستان نا دریابی شار گوادر نا تحصیل پسنی نا ہندی در محمد شفقت و عبدالسلام باقی نا زوراکی ئٹ بیگواہی و آجو مفننگ نا برخلاف خاہوت آک و ہندی بندغ آک پسنی زیرو پوائنٹ آن خڑک تولوک برانز کریسہ کسر ءِ ہر ڈول نا ہن و بر اکن بند کرینو۔

پسنی ٹی برانز نا سوب آن گاڑی تا مرغن قطار آک لگار اندن درزن آ گاڑیک گٹ مسر۔

پسنی برانزی تا پاننگ ئس کہ ہڑتوم آ بندغ آتے برجاء سال 13 اپریل آ پاکستانی لشکر دزگیر کننگ آن پد نادرست ہند آ دریسس ہراڑان پد او بیگواہ ءُ۔

پسنی ٹی برانز کروک آک خواست کرینو کہ در محمد شفقت و عبدالسلام باقی ءِ دمدستی مونا ہتیسہ آجو کننگہ نئے گڑا ننا برانز برجاء مرو و گیشتر ترند مرو ہرانا غٹ ذمہ واریک کوالخواہ و صوبائی حکومت آ مرور، اندن اوفک بندغی حق آتا گل آتیان خواست کرینو کہ او دا معاملہ ئٹ توار ارفر۔

بلوچستان نا علاقہ قلات ئٹ اَرغ نادرست سوب آتیا تینا زائیفہ ءِ گُٹو کریسہ کسفے اندن بلوچستان نا دریابی شار گوادر آن مسڑ ئسے نا جشوک جون خننگا۔

بلوچستان نا دریابی شار گوادر نیا آباد ریک آن مسڑ ئسے نا جشوک جون خننگا۔ جون ءِ گوادر اسپتال آ دننگا۔ پولیس نا ردئٹ مسڑ ءِ چٹ اسیٹ گُٹو کریسہ کسفنگانے۔

کہوکا مسڑ نا بنداوی ہند جھاؤ آواران ئس ہرا نیا آباد ئٹ رہینگاکہ۔

پولیس نا دعویٰ ءِ کہ مسڑ نشہ نا عادتی اس ہم ئس۔ گوادر پولیس نا ردئٹ اونا خونی تے پٹنگ بناء کننگانے۔

ایلو پارہ غان قلات پولیس نا ردئٹ درو قلات نا علاقہ دشت مغلزئی ٹی عبدالحمید نا مار عبدالرحمن قوم نیچاری نادرست سوب آتیان تینا زائیفہ ءِ گُٹو کریسہ کسفے و نرّا۔ پولیس دوبہ دار نا برخلاف مقدمہ نوشتہ کریسہ اودے پٹنگ بناء کرینے۔

یاتی مرے تدوکا دے تیٹ کوہلو نا سب تحصیل سفید نا علاقہ مخماڑ ئٹ اَرغ تفر ئٹ تینا زائیفہ و اِرا توہ ئنا چنا تا لمہ ءِ کسفسہ ہند آن نرّاسس۔

بندغی حق آتا باسک آک بست و بند آن خواست کرینو کہ او دا تدینی تا نوٹس ہلیسہ خونی تا برخلاف مقدمہ نوشتہ کریسہ اوفتے دمدستی دزگیر کے۔

بلوچستان نا ضلع پنجگور ئٹ اینو سہب ئنا پاکستانی لشکر نا دو آن بیگواہ کننگوک حقی ایلم صابر نور و عابد نا خاہوت برانز کریسہ سی پیک کسر ءِ بند کرینے۔

سی پیک کسر ءِ پنجگور نا علاقہ سرادک زم زم ہوٹل نا ہند آ خاہوت تولوک برانز کریسہ بند کرینے۔

خاہوت نا پارہ غان داڑان مالو اینو پریس کانفرنس ہم کننگا ہراڑے اوفک بست و بند ءِ دو بجہ نا وخت تسر کہ ہڑتوم آ ایلم تے آجو کننگہ نئے گڑا برانز ئٹ سی پیک کسر بند کننگو۔

خیال ئٹ مرے پن کروک ہڑتوم آ ایلم تے اینو سہب ئنا پاکستانی لشکر پنجگور نا علاقہ تار آفس ئٹ چھاپہ خلیسہ دزگیر کریسس۔