تمپ نا جتا علاقہ تیٹ لشکر کشی ارٹمیکو دے ہم برجاء، کلبر، ناصر آباد و ایب کیب نا علاقہ غاک لشکر کشی نا پلویڑ ئٹی ءُ۔

بلوچستان نا ضلع کیچ نا علاقہ تمپ، کلبر ئٹ اینو ارٹمیکو دے ہم پاکستانی لشکر نا لشکر کشی برجاء ءِ۔

ہندی حوالکار آک ٹی بی پی ءِ پاریر کہ درو فوجی ہیلی کاپٹر آتا ذریعت ئٹ جتا ہند آتیا کمانڈوز آک دڑفنگانو۔

اوفتا ودیک پاننگ ءِ کہ ناصر آباد نا علاقہ تیٹ کارندہ غاک پند آ ہن و بر کننگ ءُ اندن تمپ جنگل و ڈور ئٹ ہم فوجی کارندہ غاک جتا ہند آتیا خننگانو۔

علاقائی حوالکار تا پاننگ ءِ کہ درو ناصر آباد آن فوجی کارندہ غاک اسہ شوان ئسے دزگیر کریر ہرانا بابت دائسکان ہچو حوال اس رسینگتنے۔

پاکستانی کوالخواک دا بابت دائسکان ہچو حوال اس فراوان کتنو۔

خیال ئٹ مرے بلوچستان نا جتا علاقہ تیٹ اسہ وڑ لشکر کشیک برجاء ءُ واہم کوالخواک دا بابت شابیتی حوال فراوان کپسہ۔

ہنوک وخت ئٹ لشکر کشی تیٹ لس آباتی تے ٹک کننگ نا تدینیک ہم رپورٹ مسنو۔

دے ٹکی ایران ئٹ کوالخواہ تا ردئٹ استو کولا کانڑ اسیٹ میتھین نا پیشتمنگ آن مروک تراک ئٹ کم آن کم 30 بندغ مرگ ئنا گواچی مسنو۔

فرانسیسی حوال تروک ادارہ اے ایف پی نا ردئٹ طبس کانڑ مرگ آتا کچ ودیسہ 30 مسنے اندن مالو سرکاری ٹیلی ویژن دا کچ ءِ 19 پاریسس۔

ایران نا سرکاری ٹیلی ویژن اینو شینک مروک رپورٹ اسیٹ گیشتر پارینے کہ دا تدینی ٹی 17 بندغ ٹپی ہم مسنو اندن گمان کننگک کہ گڑاس کانکن دائسکان کانڑ نا تہٹی پاسینگانو۔

رپورٹ نا ردئٹ دا تدینی بنجاہی شار تہران آن کم و ود 540 کلو میٹر جاندم دے ٹک ئٹ طبس شار آن خڑک کولا کانڑ ئٹ استو مس و تراک نا وخت ہموڑے 70 نا کچ بندغ کاریم کننگ ئسر۔ تراک آن پد علاقہ ئٹ ہلہلئی و کمکار ٹولی رادہ کننگانے واہم دائسکان دا پاش اف کہ کانڑ ئٹ اخس بندغ گٹ مسنو۔

حوال تروک ادارہ ایسوسی ایٹڈ پریس نا ردئٹ اقوام متحدہ نا جنرل اسمبلی کن نیویارک آ ہنسہ ایران نا صدر مسعود پیزشکیان پارے کہ او پرمان تسنے کہ گٹ مروک بندغ آتے رکھنگ و اوفتا خاہوت آتا کمک کننگ کن ہر کوشست کننگہ۔ او دا ہم پارے کہ تدینی نا پٹ و پول بناء کننگانے۔

ایران سال ئنا کم و ود 3.5 ملین ٹن کولا کاریم ئٹ ہتیک ولے ہر سال تینا کانڑ آتیان بیرہ 1.8 ملین ٹن ہی کشنگ کیک و ایلو کولا تے ایلو ڈیہہ تیان ہلیک ہرا بھازی ملک ئنا اسٹیل مل آتیٹی کاریم ئٹ ہتنگرہ۔

ایران نا کان کنی نا صنعت ئٹ دا اولیکو بھیم بش کروکا تدینی اف۔ 2013 ئٹ کان کنی نا اِرا جتا تدینی تیٹ 11 کان کن مرگ ئنا گواچی مسوسر۔ 2009 ئٹ کیہی تدینی تیٹ 20 مزور مرگ ئنا گواچی مسوسر اندن 2017 ئٹ کولا کانڑ ئٹ تراک آن کم آن کم 42 بندغ مرگ ئنا گواچی مسوسر۔

ایران ئٹ کانڑ آتیٹ رکھ ئنا کم معیار و ہلہلئی آسراتی تا کمبوتی ءِ مرگ ئنا ذمہ وار پاننگک۔

اسرائیل لبنان آ آسمانی جلہو بناء کرینے و حیفہ شار ئتون اوار قطب ئٹ ایلو علاقہ تیٹ اجتماع تیا رکھ خلیسہ ءِ۔ دا وخت اسرائیل حزب اللہ ءِ ٹک کننگ ءِ۔

اسرائیل ڈیفنس فورس نا ترجمان ریئر ایڈمرل ڈینیئل ہیگاری نا پاننگ ءِ کہ ’دا حوال آن پد کہ حزب اللہ اسرائیل آ گولہ خلنگ نا تیاری کننگ ءِ جاندمی لبنان ئٹ دا وخت اسرائیل نا درزن آ جنگی طیارہ غاک جلہو کننگ ءُ۔‘

اسرائیل بیروت آ جلہو آن پد داسہ لبنان آ گیشتر جلہو بناء کرینے۔ داڑان مالو اسرائیل دا پاریسس کہ بیروت آ کروک آسمانی جلہو ئٹ حزب اللہ نا اسہ درزن سینئر کماندار تے مرگ ئنا گواچی کرینن اندن لبنان دا پارے کہ اسرائیلی جلہو ئٹ مُسہ چنا تون اوار 37 بندغ مرگ ئنا گواچی مسنو۔

امریکہ نا حکومت تینا شاری تے اوکان کشنگ آ زور تننگ ءِ۔ جمعہ غا اسرائیل و حزب اللہ نا نیام ئٹ سیم آن ایپار سم کاری بناء مس۔

اسرائیلی لشکر نا پاننگ ءِ کہ لبنان آ کروک جلہو تیٹ دا وخت اسکان 180 نا کچ اُرا و ہزار تا کچ ئٹ راکٹ لانچر بیرل بھس کننگانو۔

اسرائیلی لشکر نا ردئٹ لبنان آن 90 آن زیات راکٹ اسرائیل آ خلنگانو۔ حزب اللہ نا پاننگ ءِ کہ او تیوہ غا دے ئٹ اسرائیل ئٹ 11 فوجی ہند آتے ٹک کرینے۔

درو حزب اللہ نا پاننگ ئس کہ او اسرائیلی جلہو تا ورندی ٹی اسرائیل نا رمت ڈیوڈ ایئربیس آ درزن آ راکٹ آتے خلکنے۔

لبنان ئٹ ہزار آ پیجر و واکی ٹاکی تا ترخنگ نا اِرا جتا جلہو تیٹ ہزار آ بندغ آتا ٹپی مننگ و کم آن کم 37 بندغ نا مرگ ئنا گواچی مننگ آن پد دائسکان دا حوال آک مچ مریسہ ءُ کہ دا وڑ نا کارروائی امر کننگا۔

دا جلہو تیٹ حزب اللہ نا باسک آتے و حوالکاری نظام ءِ ٹک کننگانے۔ حزب اللہ نا پارہ غان دا جلہو تا دوبہ اسرائیل آ خلنگانے واہم اسرائیل دائسکان دا بابت ہچو تبصرہ یا ردعمل اس تتنے۔

بلوچستان نا علاقہ وندر و لورالائی آن پاکستانی لشکر نا دو آن بیگواہ کننگوک اِرا بندغ آجو مریسہ تینا اُرا تے سر مسر۔

شابیتی حوال تا ردئٹ زاہد بلوچ ہند گریشہ ضلع خضدار ہرادے تدوکا دے تیٹ لسبیلہ نا شار وندر آن پاکستانی لشکر بیگواہ کریسس اینو آجو مسنے۔

اندا وخت ئٹ لورالائی آن پانزدہ ستمبر آ پاکستانی لشکر نا دو آن زوراکی ئٹ بیگواہ ولی جان رحملانی بزدار ہم آجو مسنے۔

ولی جان بزدار نا اسہ خڑک ئنا سیال اس حوال تریسہ پارے کہ او لورالائی آن آجو مسنے۔

یاتی مرے کہ لورالائی راڑہ شم آن بزدار قبیلہ نا چار بندغ جتا تاریخ آتیا زوراکی ئٹ بیگواہ کننگاسر ہرافتیان ولی جان رحملانی بزدار آجو مسنے۔

بلوچ اسٹوڈنٹس ایکشن کمیٹی شال ہنکین نا پارہ غان اسہ چاہنداری مجلس اس ڈگری کالج سریاب ئٹ اڈ تننگا۔ مجلس جتا بشخ آتیا تالان ئس ہرافتیٹ تران، پینل ڈسکشن، ڈرامہ، ٹیبلو، کتاب مُچی، شئر و شاعری تون اوار ساز و زیملی بشخ آک اوار ئسر۔

مجلس ئٹ پروفیسر، نوشتہ کار، استاد و شاعر آتیتون اوار خوانندہ غاک بھلو کچ اسیٹی اوار مسر۔

دیوان نا بناء بلوچ راجی سوت آن مس، اوکان پد کالج نا استاد، گل ئنا بنجائی سنگت و بینٹ ئنا سنگت آک جتاء سرحال آتا زی آ تران کریر و اوکان گڈ سیاست و ادب نا زی آ پینل ڈسکشن اس مس ہراٹی پروفیسر منیر و پروفیسر آغا زاہد پینلسٹ ئسر و پینل ڈسکشن نا موڈریٹر فہد بلوچ ئس۔ پینلسٹ آک سیاست و ادب نا زی آ جتاء غا گمان و لیکہ غاتا بابت ہیت کریسہ پاریر کہ بیدس سیاست آن ادب و چاگڑد نا تصور ایسر اف۔ دا سیاست ءِ کہ چاگڑد ءِ سینگار کیک و مٹی و بدلی بریسہ چاگڑد دیمروی کیک۔

مجلس نا ایلو بشخ ئٹ ساڑی آ وخت ئٹ بلوچ خوانندہ غاتیکن سیاست نا اہمیت و سیاست نا برخلاف مروکا رد آ گمان تا زی آ ورناک اسہ ڈرامہ ئس پیش کریر۔ مجلس نا ایلو بشخ مشاعرہ و ساز و زیمل ہم مس۔

مجلس ئٹ بلوچستان کتاب کاروان نا پن ئٹ کتاب مُچی اس ہم اڈ تننگا ہراٹی بلوچی و براہوئی ادب تون اوار ایلو سرحال آتا زی آ کتاب آک ئسر اندن کتاب مچی آن استاد و خوانندہ غاک تینا دوست بروک آ کتاب آتیان ہلکر۔

مجلس کوالخواہ تا پاننگ ئس کہ پروگرام نا اڈ تننگ نا مسخت ڈگری کالج ئٹی سلوکا سیاسی ماحول ءِ ایسر کریسہ اسہ سیاسی چاگڑد اسیکن ڈسکشن ملنگ ئس، بلوچ سیاست ئٹی ادارہ غاتا بھلو کڑد اس ارے و خوانندہ غاک ننا راج ئنا پگہ چائنگرہ ہرا بروک وخت ئٹ چاگڑد ءِ جوان کننگ کن تینا کڑد ءِ سر تننگ کیرہ۔ ننا کوشست اندادے کہ نن ورنا تے چاہنداری و سیاسی چاگڑد اس ایتن و ورنا تے چاہندار و باسماء کین۔

بلوچستان آن پامزدہ تُو ئنا چُنا ئسے پولیو مننگ نا کیس ئس مونا بسنے۔

‏محکمہ جانجوڑی نا کنڈ آن پاننگانے کہ قلعہ عبداللہ آن تعلقداری تخوک 15 تُو ئنا چُنا ئسے ٹی پولیو وائرس پک مسنے۔

‏کوالخواہ تا رد ئٹ بلوچستان ئٹی برجاء سال پولیو نا 14 کیس رپورٹ مسنے و پاکستان ئٹی پولیو نا رپورٹ مروک کیس آتا کچ 21 مسنے۔

خاران نا تحصیل مسکان قلات ئٹ اِرا بندغ نا جونک خننگانو۔

حوال تا ردئٹ خاران نا تحصیل مسکان قلات نا ہند آن اِرا جشوک جون خننگار ہرافتے سم کاری کریسہ کسفنگانے۔ ہڑتوم آ جونک مُتکن مسنو ہرافتے سول اسپتال خاران آ دننگانے۔

خاران بست و بند نا ردئٹ بنائی وڑئٹ ہڑتوم آک سندھ ئنا ہندی پاننگرہ واہم بست و بند گیشتر پٹ و پول کننگ ءِ۔

لبنان نا سکیورٹی حوالکار آک پارینو کہ اسرائیلی لشکر درو بیروت نا جاندمی علاقہ تیٹ اسہ آسمانی جلہو اسیٹ حزب اللہ نا اسہ بھلو فوجی کماندار ابراہیم عاقل ءِ ٹک کرے ہرا حزب اللہ نا ایلیٹ رضوان یونٹ نا سروک ئس و کم و ود اسہ دہک ئسے آن امریکی رکھ آتیٹ اوار ئس۔

دا مرگ آن اسرائیل و ایران نا مخ تف گروپ حزب اللہ نا نیام ئٹ اسہ سال ئسے آن برجاء چِک و تاڑ ٹی ترندی ئٹ ودکی مرو۔

امریکہ عاقل ءِ گروپ ئٹ اسہ ”اہم سروک“ ئسے نا دروشم ئٹ بیان کریسہ اونا بابت حوال تننگ آ تینا ”ریوارڈ فار جسٹس“ پروگرام نا ردئٹ ہفتاد لکھ ڈالر نا داد تخاسس۔

او غزہ جنگ ئٹ سلہہ بند گروپ و اسرائیل نا نیام ئٹ کم و ود اسہ سال ئسے نا جھڑپ آتیٹ مرگ ئنا گواچی مروک حزب اللہ نا ارٹمیکو بھلا کماندار ءِ۔

حزب اللہ نا بھاز آ سلہہ بند سروک آتا وڑ، عاقل نا بابت بھاز کم معلومداری ارے۔ اودے گروپ نا ایلو باسک آک بیرہ ڈی گورے حج عبدالقادر نا پِن ئٹ چائسرہ۔

حزب اللہ نا خڑک ئنا حوالکار آک اودے فواد شکر آن پد گروپ نا سلہہ بند سروک آتیٹ ارٹمیکو نمبر نا کماندار نا دروشم ئٹ بیان کرینو۔ فواد شکر 30 جولائی آ حزب اللہ نا جاندمی بیروت نا گڑھ ئٹ اسرائیلی جلہو ئٹ مرگ ئنا گواچی مسوسس۔

لبنانی کوالخواک میڈیا ءِ پارینو کہ اسرائیل جہانی ثالث آتا ذریعت ئٹ بھاز وار خواست کرینے کہ رضوان فورس نا جنگجو تے، ہرا گروپ نا زمینی کارروائی تا سروکی ءِ کیرہ، سیم آن پیشن دھکہ تننگہ۔

گروپ نا خڑک ئنا حوالکار آک اے ایف پی ءِ پاریر کہ رضوان یونٹ حزب اللہ نا کل آتیان سوگو آ سلہہ بند طاغت ءِ و اونا جنگجوک سیم آن ایپار پیہن نا ہیل کاری نا لائخی تخوک ءُ۔

دا چاندار یونٹ ئٹ آزموندہ کروک جنگجوک اوار ءُ، ہرافتیان گڑاس شام ئتون اوار لبنان آن پیشن ہم جنگ کرینو، ہراڑے حزب اللہ 2013 آن صدر بشار الاسد نا فورسز آتا پاش مخ تفی ءِ کرینے۔

امریکی وزارت خزانہ پارے کہ عاقل شام ئٹ دا گروپ آتا کارروائی تیٹ اہم کڑد سر تسنے۔

حزب اللہ مالو آن ہی اکتوبر نا توہ آن دائسکان جاندم ئٹ تینا مُسہ علاقائی یونٹ آتیان اِرا کماندار نا نسخان ارفینے: محمد نعمہ ناصر، 3 جولائی آ جاندمی لبنان ئٹ تینا کار ئٹی اسرائیلی آسمانی جلہو ئٹ، و طالب عبداللہ، اوکان اسہ توہ اس مالو اسہ اُرا ئسے آ مروک جلہو ئٹ کسفنگاسس۔

رضوان فورس تینا اسہ پین بھلو کماندار وسام تاویل نا ہم نسخان ارفینے، ہرا جنوری ٹی مرگ ئنا گواچی مسوسس۔

اوڑا داد انتئے تخنگاسس؟

واشنگٹن نا ردئٹ عاقل حزب اللہ نا جہاد کونسل نا باسک اس ئس، ہرا پارٹی نا بھلا سلہہ بند گل ءِ۔

امریکی وزارت خزانہ پارے کہ او اسلامی جہاد تنظیم نا اسہ ”بنماسی باسک“ اس ئس، ہرا حزب اللہ تون گنڈوک گروپ ئسے ہرا 1983 ٹی بیروت ئٹ امریکی سفارت خانہ غا مروک ہمو بمب تراک نا پد ئٹ ئس ہراٹی 63 بندغ مرگ ئنا گواچی مسوسر۔

و ہمو سال بیروت ئٹ امریکی میرینز آ مروک جلہو نا پد ئٹ ہم اونا دو ئس ہراٹی 241 امریکی فوجی مرگ ئنا گواچی مسر۔

وزارت خزانہ پارے کہ عاقل 1980 نا دہک نا ایسر ئٹ اِرا جرمن ءِ بندی کننگ و 1986 ٹی پیرس ئٹ مروک بمب تراک آتیٹ اوار ئس۔

امریکی وزارت خزانہ 2015 ئٹ، عاقل و شکر ءِ دہشت گرد گوندا و 2019 ئٹ، امریکی محکمہ خارجہ اوفتے ”خاص وڑئٹ جہانی دہشت گرد“ گوندا۔

سال تیان بیگواہ رفیق اومان نا آجو مفننگ نا برخلاف بندغی حق آتا گل آک توار ارفر – مسن تا خواست

تربت پریس کلب ئٹ پریس کانفرنس کریسہ بیگواہ اسکول استاد رفیق اومان نا مسنک خواست کریسہ پاریر کہ 10 سال آن بیگواہ رفیق اومان نا آجو مفننگ نا برخلاف بندغی حق آتا گل آک توار ارفر۔

رفیق اومان نا چنا تا پاننگ ئس کہ اینو رفیق اومان ءِ بیگواہ مروک 10 سال پورو مسنے ولے دائسکان اونا ہچو خیر خبر اس تننگ افس، اوفتا ودیک پاننگ ئس کہ خدارا رفیق اومان ءِ آجو کریسہ ننے دا مرغنا تادی آن خلاسی تننگہ یا اودے عدالت ئٹ ہتنگہ۔

زوراکی ئٹ بیگواہ اسکول استاد رفیق اومان نا چنا تا پاننگ ئس کہ داخہ ہم سماء اف کہ او زندہ یا نہ۔

اوفتا گیشتر پاننگ ئس کہ حکومت اودے دمدستی آجو کے و بندغی حق آتا گل آک اونا یلہ کننگ کن توار ارفر، پریس کانفرنس نا وخت آ بیگواہ رفیق اومان نا بیوس آ چنکا مسڑ توسینگا۔

یاتی مرے اسکول استاد رفیق اومان ءِ 21 ستمبر 2014 آ تربت ئٹ تینا سرکاری کاریم آن بننگ وخت آ پاکستانی فورسز و ڈھکوک ادارہ تا کارندہ غاک دزگیر کریسہ نادرست ہند آ دریسر ہراکان پد او مونا ہتنگتنے۔

رفیق اومان نا زوراکی ئٹ بیگواہی آن ہلیس دائسکان اونا خاہوت و چنا تا پارہ غان کیہی وار برانز کننگانے واہم دئے سال تدینگ آن پد ہم رفیق اومان مونا ہتنگتنے۔

ذاکر دشتی نا آجو مفننگ نا برخلاف خاہوت تولوک برانز کریسہ سی پیک کسر ءِ بند کرے۔

شابیتی حوال تا ردئٹ بلوچستان نا ضلع پنجگور آن بیگواہ کننگوک ذاکر دشتی نا خاہوت اونا آجو مفننگ نا برخلاف سی پیک کسر آ تولوک برانز کریسہ کسر ءِ ہن و بر اکن بند کرے۔

بیگواہ ذاکر دشتی نا خاہوت سرادک نا ہند آ سی پیک کسر ءِ ہر وڑ نا ہن و بر اکن بند کرے، خاہوت ذاکر دشتی نا یلہ کننگ نا خواست کرے۔

دا وخت آ تولوک برانز ئٹ زالبول و چناک ہم اوار ءُ، خاہوت نا ردئٹ ذاکر دشتی ءِ اِرا دے مالو سلہہ بند بندغ آک برمتہ کریسر بست و بند ہمو دے آن چپ ءِ و ہچو ورندی اس تننگ اف۔

خاہوت پارینے کہ اگہ ذاکر دشتی آجو کننگتو گڑا تینا برانز ئٹ ترندی ہترون۔