گوادر ئٹ بلوچ یکجہتی کمیٹی نا سروکی ٹی تولوک برانز یانزدہمیکو دے ہم برجاء، ارٹمیکو پارہ غا بی وائی سی نا سروکی ٹی کوئٹہ، نوشکے، پنجگور و تربت ئٹ ہم تولوک برانز و ریلی تا لڑ برجاء ءِ۔

بلوچستان نا دریابی شار گوادر ئٹ بلوچ یکجہتی کمیٹی نا بلوچ راجی مُچی تولوک برانز تدوک یانزدہ دے آن برجاء ءِ۔ انٹرنیٹ و موبائل سروس آتیتون اوار شار ئٹ دیر ئنا سپلائی ہم بند ءِ۔ شار ئنا تہہ و پیشن نا کسر تا بند مننگ آن خوراک و ایلو گِڑا تا نیستی ودی مسنے۔

بی وائی سی تولوک برانز نا درو نا حوال ءِ چاگڑدی حوالکاری تلہ غا شینک کریسہ پارے کہ بلوچ راجی مُچی آ ظلم ئنا برخلاف بنجاہی تولوک برانز دا وخت گوادر ئٹ برجاء ءِ۔ گوادر تولوک برانز ئٹ درو السی دیوان اڈ تننگا ہراٹی بلوچ یکجہتی کمیٹی نا قیادت و مخلوق نا نیام ئٹ ساڑی آ حالیت آتیتون اوار جتا سرحال آتیا ہیت و گپ مس۔ بلوچ راجی مُچی ٹی اوار مروک آک غٹ ریاستی ظلم و تادی تیان پد ہم حوصلہ مند ءُ۔

بی وائی سی نا ردئٹ تدوکا دئے دے آن گوادر تون اوار تیوہ مکران ئٹ قیامت ءِ، دائسکان گوادر تون اوار مکران نا بھاز آ علاقہ تیٹ انٹرنیٹ و نیٹ ورک آک بند ءُ، مکران نا بھاز آ علاقہ تا کسرک ہم دائسکان بند ءُ ہرافتا سوب آن خوراک و دوا تا نیستی ودی مسنے۔ داڑان بیدس گوادر ئٹ دیر نا سپلائی ہم بند کننگانے۔ اوفتا پاننگ ئس کہ گوادر ئٹ بلوچ راجی مُچی آ ظلم و تادی نا برخلاف دا وخت گوادر آن بیدس کوئٹہ، نوشکے، پنجگور و تربت ئٹ ہم تولوک برانز آک برجاء ءُ۔

ایلو پارہ غان بلوچ یکجہتی کمیٹی پنجگور نا تولوک برانزحق دو تحریک نا کماش ملا فرہاد و ایلوفتا سروکی ٹی ڈپٹی کمشنر پنجگور آفس نا مونا بنجاہی کسر آ برجاء ءِ۔ تولوک برانز ئٹ اوار مروک آتا ردئٹ برانز بنجاہی کال اسکان برجاء مرو۔

ایڑے تربت ئٹ ہم تولوک برانز برجاء ءِ۔ درو تربت تولوک برانز ئٹ ”بلوچ راجی مُچی آ تادی و ساڑی آ حالیت“ نا سرحال آ سیمینار اس اڈ تننگا۔ ہراڑے سیاسی، چاگڑدی و ادبی تپہ تون تعلقداری تخوک جتا بندغ آک تران کریر۔ تران کروک آک بندغی حق آتا برجاء لتاڑنگ و بلوچ راج ئتون مروک ناروا سلوک آ روشنائی شاغار۔

ایلو پارہ غان کوئٹہ ئٹ ہم بلوچ یکجہتی کمیٹی نا سروکی ٹی تولوک برانز برجاء ءِ، تولوک برانز ئٹ اوار مروک آک میڈیا تون ہیت کریسہ پاریر کہ پرامن برانز کن حوصلہ مند اُن، اوفک گپ و تران نا وخت آ دزگیر کننگوک بندغ تا دمدستی یلہ کننگ نا خواست کریر و ریاست آ زور شاغار کہ او اوفتا خواست آتے پورو کے و بلوچ آتا برخلاف ظلم ءِ ایسر کے۔ اوفتا پاننگ ئس کہ انصاف فراوانی و بلوچ الس نا حق آتا منّنگ اسکان تولوک برانز برجاء مرو۔

کوئٹہ غان دزگیر مننگ آن پد زوراکی ئٹ بیگواہی نا گواچی مروک بلوچ خوانندہ تنظیم نا کماش دائسکان آجو کننگتنے۔

26 جولائی آ اسپنی روڈ کوئٹہ غان زوراکی ئٹ بیگواہی نا گواچی کننگوک بلوچ اسٹوڈنٹس آرگنائزیشن نا اِرا بنجاہی راہشون تیان اسٹ اینو آجو مسنے واہم تنظیم نا کماش دائسکان آجو متنے۔

پاکستانی لشکر تدوکا توہ گوادر ئٹ اڈ تروک بلوچ راجی مُچی نا تیاری تیٹ اختہ بی ایس او نا کماش جیئند بلوچ و کمک کماش شیرباز تون اوار اوفتا کیہی سنگت آتے دزگیر کریسس ہراڑے پدان ایلوفتے یلہ کننگا واہم جیئند و اوفتا پین مُسہ سنگت ءِ نادرست ہند آ دننگاسس۔

درو جیئند بلوچ و شیرباز نا خاہوت آک کوئٹہ ئٹ پریس کانفرنس کریسہ خواست کریر کہ اگہ اوفتا بندغ آتے بروکا چار دے ئٹ آجو کریسہ مونا ہتنگتو گڑا اوفک برانز نا پڑو کرور۔

اندا وخت ئٹ بی ایس او نا سینئر وائس چیئرمین شیرباز بلوچ اینو آجو مریسہ تینا اُرا ءِ سر مسنے واہم جیئند نا بابت دائسکان ہچو شابیتی حوال اس مونا بتنے۔

کوئٹہ آن زوراکی ئٹ بیگواہ کننگوک جیئند بلوچ و شیر باز بلوچ نا خاہوت آک بلوچ یکجہتی کمیٹی و وی بی ایم پی نا سروک آتتون اوار پریس کانفرنس کرسا پاریر کہ 26 جولائی نا نن اسپنی روڈ کوئٹہ آن بلوچ اسٹوڈنٹس آرگنائزیشن نا بنجائی چیئرمین جیئند بلوچ و سینئر وائس چیئرمین شیر باز بلوچ ءِ منَہ پین سنگت تون اوار پولیس و سادہ پُچ بینوک بندغ آک زوراکی ئٹ بیگواہ کریر و قائد آباد تھانہ غا دیر۔ ہراکان پد ایلو دے اوفتا ایلو سنگت آتے یلہ کننگا و منَٹ ئسے جیل آ راہی کننگا ولے جیئند بلوچ و شیر باز بلوچ ءِ نادرست ءُ جاگہ ئسے آ دننگانے و اوفتا بارو ئٹ ننے ہچو حوال رسینگتنے۔

او پاریر کہ بلوچ چاگڑد ئٹی بی ایس او بلوچ خوانندہ و ورنا تیکن سیاسی و چاگڑدی علم ئنا درسگاہ نا حیثیت تخک ہرا تاریخی وڑ ئٹ خوانندہ و الس ئنا اوڑدئی ویل و محکومیت نا برخلاف جمہوری و ترقی پسند اصول آتیا ساڑی نمائندہ تنظیم ئس رہینگانے۔ ولے بدبختی ئٹ تدوکا کیہی دہک آن بلوچ چاگڑد آ چَٹی مروک زوراکی و استحصال آ ساڑی پالیسی تا ذریعت ئٹ ہر وڑ ئنا سیاسی و جمہوری جہد آ قدغن خلنگانے۔ حق ئنا ہیت ءِ کننگ آ یا برانز تیا الس آ سم کاری کننگک و ورنا تے زوراکی ئٹ بیگواہ و دروغ ئنا کیس آتا گواچی کرسا ظلم ئنا برخلاف ہر توار ءِ توننگ نا کوشست کننگک۔ نن سرپند مرینہ کہ جیئند بلوچ و شیر باز بلوچ تون اوار ہزار آ بیگواہ غا ورناک راج ئنا توار مننگ نا سوب آن زوراکی نا بیگوائی تا گواچی کننگانو۔

او پاریر کہ تدوکا کیہی سال آن ننا خاہوت چرجوئی ئٹ زوراکی نا بیگواہی و دروغ ئنا کیس آتون مون تننگ ءِ۔ 29 نومبر 2018 آ نن نیمہ غا ننا اُراغان پاکستانی لشکر جیئند بلوچ، اونا باوہ و چُنکا ایلم حسنین بلوچ ءِ زوراکی ئٹ بیگواہ کرے۔ جیئند بلوچ ءِ 8 تُو اسکان ٹارچر سیل ئٹ بیدس ڈوہ آن بندی کننگا و اونا چُنک سن ایلم حسنین بلوچ آ دروغ ئنا کیس خلِسہ کراچی جیل آ رادہ کننگا ہرا داسکان جیل ئٹی بندی ءِ۔ دا تدینی تیان ننا خاہوت ءِ چرجوئی ئٹ ذہنی بے دادی و سختی تا گواچی کننگانے ہرا داسکان برجاء ءِ۔ ننا خاہوت آ چَٹی مروک دا ظلم آن ننا گُٹ خلاصی و انصاف نا خواست کینہ۔

او پاریر کہ یاتی مرے کہ 28 جولائی آ گوادر ئٹ مروک راجی مچی نا برخلاف حکومتی کریک ڈاؤن نا سوب آن کوئٹہ و تیوہ بلوچستان ئٹی کیہی ورنا تے دزگیر کننگانے ہرافتیٹی جیئند بلوچ و شیر باز بلوچ ہم اوار ءُ و اوفتے ہچو عدالت ئسے ٹی نہ ہتنگانے نہ جیل آ رادہ کننگانے۔ پولیس تھانہ غا تیان ورنا تا بیگواہی خاہوت کن خلیس نا سوب و الس ئنا رکھ ئنا پنا جوڑ مروک ریاستی ادارہ غا تیا سوالیہ نشان ءِ۔

او پاریر کہ نن دا پریس کانفرنس نا ذریعت ئٹ ریاستی ادارہ غاتے ہم دا کلہو تننگ خواہنہ کہ جیئند بلوچ و شیر بلوچ زمہ وار و پرایمن سیاسی باسک ءُ ہرا اگہ ڈوہ ئس کرینو اوفتے شرف ئٹ یلہ کرسا ریاستی عدالت آتیٹ ہتیر۔ نہ تو ننا خاہوت نا بے ڈوہ ورنا تے بیدس عدالت عقوبت خانہ غا تیٹ بندی تخنگ ننے ہچ وڑ آ قبول اف۔ اگہ جیئند بلوچ و شیرباز بلوچ ءِ 11 اگست اسکان آجو کننگ متو گُڑا ننا خاہوت نا کنڈ آن 12 اگست آ ہدہ منو جان روڈ آب اسہ پر ایمن ریلی ئس کشنگ مرو نن غٹ ترقی پسند سیاسی و چاگڑدی تپہ غا تیان خواست کینہ کہ جیئند بلوچ و شیرباز بلوچ نا رکھوک آجوئی کن تعاون کیر و ریلی تون اوار چاگڑدی حوالکاری میڈیا غا ٹرینڈ آتیٹ بشخ ہلیر۔

اِرا دے ئٹ بلوچستان آن خوانندہ تا خودکشی نا اِرا تدینی رپورٹ مسنو۔

پسنی نا علاقہ سردشت ئٹ کلانچ آن میٹرک نا خوانندہ صمد نا مار جنید لخ ئٹ چِٹ اس شاغسہ خودکشی کرے، واہم خودکشی نا سوب آک مونا بتور۔

حوال تا ردئٹ خودکشی نا تدینی درو شام نماز آن پد مس۔ المی کارروائی آن پد جون خاہوت نا دوٹی تننگا۔

اِرا دے ئٹی بلوچستان ئٹ خوانندہ تا خودکشی نا اِرا تدینی مونا بسنو، درو بلوچستان نا بنجاہی شار کوئٹہ ئٹ تربت نا ہندی خوانندہ چراغ بلوچ جامعہ بلوچستان نا ہاسٹل نا کوٹی ٹی لخ ئٹ چِٹ اس شاغسہ خودکشی کریسس۔

بلوچستان ئٹ خودکشی نا تدینیک اسہ بھیم بش کروک حالیت اس دوئی کرینو ہڑدے خودکشی نا تدینیک رپورٹ مریسہ کیرہ داکان مالو بیست و ہفت جولائی آ ہم ضلع کیچ نا علاقہ ئٹ اسہ کیس اس رپورٹ مسوسس ہراڑے حاجی محمد عمر نا مار ناصر ہند دشت شولیگ خودکشی کریسس اندن اونا ہم خودکشی نا سوب آک ہم سماء تمتور۔

بلوچ یکجہتی کمیٹی نا ترجمان تینا اسہ بیان اسیٹی پارے کہ ریاستی ڈھکوک ادارہ و پِن ئنا صوبائی اسمبلی نا باسک آک بلوچ راجی مُچی نا شہید آتا خاہوت آتے ایف آئی آر کننگ نا معاملہ ٹی بھیم نا گواچی کننگ ءُ۔

او پارے کہ نن ریاستی ڈھکوک ادارہ و بیرہ پِن ئنا صوبائی اسمبلی نا باسک آتیا پاش کینہ کہ تینا گندہ غا حرکت آتے یلہ کبو۔ نن تکنہ کہ دا وخت آ ریاست ہرا وڑ بلوچستان ئٹ ظلم و تادی تا گندہ غا مثیل آتے سر تننگ ءِ، بھاز زو دا ظلم و تادی تا برخلاف مخلوق نا سگ جواب ایتو و دا ظلم و تادی تا برخلاف لکھ آ بندغ آک کسر تیا پیشتمور و دا ظلم و زوراکی نا زی آ ٹہفوک نظام ءِ روتہ غان کشور خسور۔

او تینا بیان ئٹ پارے کہ پِن ئنا صوبائی اسمبلی نا باسک آتیا ہم پاش کینہ کہ ہرا وڑ اسہ سیٹ و منہ مراعات کن نم شاہ آن زیات شاہ ئنا وفادار جوڑ مننگ نا کوشست کننگ اُرے و تینا مخلوق آ ظلم و تادی نا مخ تفی کننگ اُرے، دا چاگڑدی ڈوہ ئنا سوب آن نمے ہم چاگڑدی ردعمل تون مون تروئی تمو۔

نظم: ہندُنن

شاعر: عمیر مہرُل

دُنکہ یخ پنّہِ است ئٹ وا لرزہ مرے
مرگ ءِ کسس خنے وا لپرزہ مرے
چہرہ پوشکُن مرے دُنکہ زردہ مرے
کس خودی ٹی مرے دیچہ گوردہ مرے
ہندُنُن دا منہ دے ءِ چٹ ہندُنن

دُنکہ رُژنسّ تفس دا ستاراک اسُل
دُنکہ خّرُّن مفس دا بہاراک اسُل
دُنکہ خنٹی بفس دا نداراک اسُل
دُنکہ استے اُشِر ساہ ؤ یاراک اُسل
ہندُنُن دا منہ دے ءِ چٹ ہندُنن

دُنکہ دردی آ نن تیٹی گّوربام بف
دُنکہ تولے کرارؔ او سرِے شام بف
دُنکہ رِنّداک اُشنگر ولے جام بف
دُنکہ چیہانت الے خنتے آرام بف
ہندُنُن دا منہ دے ءِ چٹ ہندُنن

دُنکہ تینا وطن ٹی کَرائی مرین
دُنکہ بولی تیٹی نن بہائی مرین
دُنکہ تہٹی تینا نن اُرائی مرین
دُنکہ کسّس ننا مف خدائی مرین
ہندُنُن دا منہ دے ءِ چٹ ہندُنن

دُنکہ ٹاکو نہ رنگّ ئٹ تنکی مرے
نا گمانان کہ غّم تا شنّکی مرے
دُنکہ بیرک ننا مف گوّنکی مرے
دُنکہ بّھلون مفن بس چُنکی مرے
ہندُنُن دا منہ دے ءِ چٹ ہندُنن

دُنکہ شارٹ سپائیک چاری مریر
دُنکہ دردا تا ورناک قاری مریر
دُنکہ ماہ رنگ، سمّی و شاری مریر
دُنکہ حقّ ئے سلِر کُل تواری مریر

ہندُنُن دا منہ دے ءِ چٹ ہندُنن
دُنکہ جیرت و جوزہ تے حیران کیر
دُنکہ سیاہ کوہ ءِ کوہِ سلیمان کیر
دُنکہ باتیل و نوشکل تے بولان کیر
دُنکہ جنگ ئٹ سمندر تے میدان کیر
ہندُنُن دا منہ دے ءِ چٹ ہندُنن

دُنکہ پِّر کے دتر نا وا شبنم مرے
دُنکہ خیصار دوسے ٹی ماگم مرے
دُنکہ زگری و مسلم تا ماتم مرے
دُنکہ غازی شہیداتا موسم مرے
ہندُنُن دا منہ دے ءِ چٹ ہندُنن

دُنکہ خوّشی تے تینا او گیرام کیر
دُنکہ سنگر ٹی نن تے او گوربام کیر
دُنکہ گوریچ ءِ اڑسِر او حنام کیر
دُنکہ مہرُل نیکن ہردے پیغام کیر
ہندُنُن دا منہ دے ءِ چٹ ہندُنن

ھلہ خُلیس ٹی تموک اینو لرزنگ اُس
ھلہ دانگ اینگ تراپڑینگسہ
جُغل ھلنگ اُس
ھلہ خوف آن ننا داسا موسُن تمنگ اُس
سَلہ ہڑزآن ننا تینے انتئے ڈھکنگ اُس
ھلہ بیم آن ننا نت تے آ تُف کننگ اُس

ھلہ شیر زال تا کسرتے آ کُچک تورنگ اُس
ھلہ شیراتا کسرتے آ تولہ تورنگ اُس

اینگ آن نی پاسہ ریاست اُٹ
بھلا طاقت اُٹ
داکہ دو خورک اِنگا ورناتے اینو خلنگ اُس
دے پہ دے آن
ھلہ شوڑد شوڑد تولنگ اُس

ھلہ مچی سے آن راجی و داخہ بِرنگ اُس
ھلہ نیاڑی تا ھکل آ تے آن نَرنگ اُس

بسونے انقلاب دا ڈیہہ آ نے پاریسُن بریک
یکجہی نا ننا سیلاب اے باطل نمے دیک
سہب آجوئی نا ٹیک تیک
نا جارات وا دیک
ھلہ انت مس نے انقلاب اسے آن نرنگ اُس
ھلہ خٹ آن تینا بھلو بڑینگ ارفنگ اُس

شائری : میرین بلوچ

نظم: زیبل سلمان نا پن آ

نوشت: بھاول بلوچ

خزملی خنی

خزملی خنی
مولہ دروشمی
بر اینو مَخ نی
یا گڑا مخف نی
تولوکے محفلی
زو بر داسا نی
آلم ءِ نا چاری
سنج ءِ کچاری
دڈد ئسے نا مری
زندان نا نی گواچی
پوغ آتا نیام ئٹی
جون نا گواڑخی
پژاک نا اسپُتی
جوژ او ہلسٹی
سگپرہ ہچ ای
خداغا زو بہ نی
دے و نن اٹ چاری
ترخفے خن تے وداری

بلوچ یکجہتی کمیٹی نا ترجمان پارینے کہ پگہ آن تیوہ ہفتہ تیوہ بلوچستان ئٹی بلوچ راجی مچی نا شہد آتا یات ئٹی چراغ لگفنگ مرو و راجی سوگندی دیوان اڈ کننگو۔

او پارے کہ غٹ زونک شہید آتا یات ئٹی دیوان اڈ تننگ نا تیاری کیر و شہید آتے دروت ندر کیر۔

بیان ئٹی پاننگا کہ بلوچ راجی مچی آ ریاستی بربریت و ظلم ئنا برخلاف اینو نُہمیکو دے ہم گوادر ئٹ برانز برجاء ءِ۔

ترجمان پارے کہ بلوچ الس کُل ہڑاند و ریاستی ظلم آن بیدس ہمت و حوصلہ ئٹ تولوک برانز ءِ برجاء تخانے۔ بلوچ راجی مچی نا سرسہبی بلوچستان ئٹی السی مزاحمتی جہد ءِ اسہ گھام ئس مونا درینے، ولے نن پُہہ مرینہ کہ دا اسہ مرغنو و سخت ءُ جہد اسے ہراٹی سوگو حوصلہ و بڑز آ شعور دا جہد ئنا سرسہبی ٹی ننے کمک کننگ کیک۔ نن بلوچ الس و یکجہتی کمیٹی نا باسک آتے پام تننگ خواہنہ کہ دا مرغن و سگ خواہوکا جہد کن ذہنی و فکری حوالہ ئٹ تیار مننگ ہی ننا بنداوی خواست ءِ و اندا ننا سرسہبی نا ضامن ہم مرو۔

او پارے کہ راجی مچی ءِ بے سہب کننگ کن ریاست وحشت و درندگی نا مثیل جوڑ کرینے ولے ریاستی تاغت نا مونا بلوچ الس حوصلہ و ہمت نا ہمو مثیل ءِ جوڑ کرینے ہراڑان ریاست و اونا کل ادارہ غاتے دا ہیت ئنا مارشت مسنے کہ السی طاغت ہی گواچنی تاغت ءِ۔ السی طاغت نا مونا ریاستی طاغت بیرہ مِش ئنا ڈھیر اسے۔

جولائی ٹی حکومت نا ملازمت آتیکن متنازعہ کوٹہ سسٹم نا برخلاف بناء مروک خوانندہ تا برانز آتا ایسری اینو وزیر اعظم شیخ حسینہ واجد استعفیٰ تریسہ ڈیہہ آن نرنگ و فوج ئنا پارہ غان عبوری حکومت جوڑ کننگ نا پڑو تون مس۔

فرانسیسی نیوز ایجنسی اے ایف پی نا ردئٹ 76 سالی وزیراعظم شیخ حسینہ نا آمرانہ حکومت ءِ ایسر کروک برانز آتیٹ اسہ توہ ئسے آن زیات وخت ئٹ کم آن کم 300 بندغ خلنگار۔

داڑے پنچ اہم تاریخ اریر ہرا پارہ کہ ہرا وڑ برانز آک کم و ود 17 کروڑ نا آباتی تخوک جاندمی ایشیائی ڈیہہ ئٹ حکومت ءِ دڑفیر۔

یکم جولائی: ناکہ بندی تا بناء

یونیورسٹی نا خوانندہ غاک کسر و ریلوے لائن آتے بند کننگ کن ہڑاند بش کریر تانکہ پبلک سیکٹر نا ملازمت آتیکن کوٹہ سسٹم ئٹ اصلاح تا خواست کننگ مرے۔

اوفتا پاننگ ئس کہ دا اسکیم ءِ حسینہ واجد نا حکمران عوامی لیگ نا وفادار آتے تننگ کن کاریم ئٹ ہتنگا۔

حسینہ واجد جنوری ٹی گواچن مخالفت آن بیدس ووٹنگ آن پد وزیراعظم نا دروشم ئٹ پنچمیکو وار سرسہبی دوئی کرے۔ اونا پاننگ ئس کہ ’خوانندہ غاک تینا وخت ءِ زوال کننگ ءُ۔‘

16 جولائی: بیدادی ٹی ترندی

برانز آتیٹ اولیکو مرک آک ریکارڈ کننگار و جھڑپ آتیٹ شش بندغ خلنگار۔ اسہ دے ئسے آن پد ڈھاکہ ٹی برانزی و حکومت نا مخ تف آک اسٹ ایلو آ لٹ و کٹ و خِشت آتیٹ جلہو کریر۔

حسینہ واجد نا حکومت تیوہ ڈیہہ ئٹ اسکول و یونیورسٹی تا بند مننگ نا فرمان تس۔

18 جولائی: وزیراعظم خبڑدار کرے

خوانندہ غاک حسینہ نا پارہ غان صلہ ءِ نمن کریر، دانا اسہ دے ئسے آن پد ہراتم او جارات ئٹ مننگ نا خواست کرے و دا ارادہ نا درشانی کرے کہ برانز ئٹ مروک ہر ’خون‘ ئنا سزا تننگو۔

برانزیک ’ڈکٹیٹر ءِ کشبو‘ نا نعرہ خلنگ ئسر و سرکاری حوال تروک ادارہ بنگلہ دیش ٹیلی ویژن نا ہیڈ کوارٹر و درزن آ ایلو سرکاری ماڑی تے ہُشنگ ئسر۔ حکومت انٹرنیٹ ءِ بند کرے

جھڑپ آتیٹ کم آن کم 32 بندغ مرگ ئنا گواچی و سد آک ٹپی مسر، ہرا بیست و چار گھنٹہ کرفیو و فوجی تا ساڑی مننگ آن پد ہم برجاء مسر۔

21 جولائی: سپریم کورٹ نا فیصلہ

بنگلہ دیش نا سپریم کورٹ، ہرادے نغد کروک آک حسینہ شیخ نا حکومت نا ربڑ اسٹیمپ نا دروشم ئٹ ہُریرہ، ملازمت آتا کوٹہ ءِ دوارہ درستی راستی کننگ نا فیصلہ ءِ بے قانودی گوندا۔

ولے دا فیصلہ غان برانزیک خوش الور و اوفتا خواست ئس کہ بنگلہ دیش نا پاکستان نا برخلاف 1971 نا آجوئی نا جنگ ئٹ آجوئی نا جنگجو تا چنا تیکن خاص ملازمت آتے تیوہ ایسر کننگہ۔

5 ااگست: حسینہ نرّا

حسینہ واجد ہیلی کاپٹر نا کمک ئٹ ڈھاکہ غان نرّا ہراتم برانزیک اونا ماڑی آ جلہو کریر۔ اوڑان پد لکھ آ بندغ آک کسر آ خوشی نا درشانی کننگ ئسر، گڑاس بکتر بند گاڑی و ٹینکر آتا زی تیا ناچ کننگ ئسر۔

اونا ناگمان آن رخصتی برانز آتا بھیم بش کروک دے نا اسہ دے آن پد مسنے ہراٹی تیوہ تیوہ ڈیہہ ئٹ کم آن کم 94 بندغ خلنگاسر، ہرافتیان بھاز آک حسینہ واجد نا مخ تف آتیتون جنگ ئٹ خلنگاسر۔

کیہی معاملہ تیٹ فوجی و پولیس آک برانز ءِ توننگ کن مداخلت کتور امر کہ تدوکا توہ ئنا ریلی تیٹ مسوسس۔

بنگلہ دیش نا آرمی چیف جنرل وقار الزمان سرکاری ٹیلی ویژن آ راج ئنا پِن آ اسہ کلہو اسیٹ پارینے کہ حسینہ واجد استعفیٰ تسنے و فوج عبوری حکومت جوڑ کرو۔