بلوچستان نا جتا علاقہ تیٹ مروک تدینی تیٹ ہفتدہ بندغ ٹپی و چنا اسیتون اوار اِرا بندغ کسکنو۔

بلوچستان نا ضلع لسبیلہ نا علاقہ وندر نا ہند آ بس و ٹرک اسٹ ایلو ٹی ڈک لگار۔ کمکار حوالکار تا ردئٹ بس پنجگور آن کراچی آ بننگ ئس ہرا ترند رفتار آ ٹرک ئتون ڈک لگا۔

تدینی ٹی بندغ آتا کہنگ نا حوال رسینگتنے۔ اول 11 ٹپی ءُ بندغ سول اسپتال کراچی آ دننگا، پدان اندا تدینی نا پین 6 ٹپی ہتنگا، ہراڑان پد تدینی ٹی ٹپی آتا کچ 17 مس۔

ایلو پارہ غا نوشکے قاضی آباد ئٹ اسکول وین ئنا ڈک لگنگ آن اسہ چنا اس کسکنے۔

اندن حوال اس رسینگانے کہ کوہ گرد ریاض بلوچ چلتن نا ٹیڑ ءِ سر مننگ آن پد اسہ درنگ ئسے آن تمیسہ کسکنے۔

ضلع لسبیلہ نا شار وندر آن پاکستانی لشکر اسہ دکاندار ئسے زوراکی ئٹ بیگواہ کرینے۔

شابیتی حوال تا ردئٹ بیگواہ کننگوک بندغ زاہد بلوچ ہند گریشہ ضلع خضدار ءِ ملخدو لسبیلہ نا شار وندر ئٹ اُرا غان پاکستانی لشکر زوراکی ئٹ بیگواہ کرے۔

خاہوت پارے کہ زاہد بلوچ اسہ دکاندار ئسے و او پوریا کن تدوکا کیہی سال تیان ہموڑے رہینگک۔

اوفک خواست کرینو کہ زاہد بلوچ نا یلہ کننگ کن ننا توار جوڑ مبو۔

لبنان تراک آتیٹ حزب اللہ تینا 13 سنگت نا مرگ ئنا گواچی مننگ نا پک کریسہ دوبہ اسرائیل آ خلکنے۔

لبنان ئٹ ایران نا مخ تف ٹولی حزب اللہ نا برخلاف اول پیجر و پدا واکی ٹاکی جلہو آتیٹ دائسکان 32 بندغ مرگ ئنا گواچی مسنو، لبنان نا جانجوڑی وزیر نا ردئٹ درو نا دے واکی ٹاکی تا ترخنگ نا پوسکنا جلہو آتیٹ 20 بندغ مرگ ئنا گواچی اندن 450 آن زیات بندغ ٹپی مسنو۔

جہانی حوال تروک ادارہ بی بی سی نا اسہ رپورٹ ئسے نا ردئٹ داڑان مالو ملخدو مروک پیجر تراک آتیٹ حزب اللہ نا کاریم ئٹ ہتوک کیہی پیجرز آتا ترخنگ آن اِرا چنا تون اوار 12 بندغ مرگ ئنا گواچی و 2800 بندغ ٹپی مسر، ہرافتیٹ ایران نا سفیر ہم اوار ءِ۔

حزب اللہ دا جلہو تا دوبہ ءِ ایران آ خلیک واہم اسرائیل نا پارہ غان دا بابت دائسکان ہچو بیان اس مونا بتنے۔

اکتوبر 2023 آن برجاء غزہ جنگ ئٹ اسرائیل و حزب اللہ نا نیام ئٹ کیہی جھڑپ آک مسنو ہراڑان ڈیہہ ئٹ گیشتر حالیت آتا خراب مننگ نا خُلیس خننگک ایلو پارہ غان اقوام متحدہ دا پیش رفت ءِ گڑتی اس گوندانے۔

مخلدو بیگہ نا سئے و نیم نا وخت آ لبنان نا جتا علاقہ تیٹ پیجرز آتا ترخنگ آن تراک آک بناء مسر۔ دا پاش اف کہ دائسکان اخس پیجرز ترخانو۔

حوال تروک ادارہ روئٹرز نا ردئٹ دا تراک آک کم و ود اسہ گھنٹہ ئسے اسکان مریسہ کریر اوکان پد زو تیوہ لبنان نا اسپتال آتیٹ ٹپی آتا بننگ بناء مس، لبنان نا جانجوڑی وزیر نا پاننگ ءِ کہ پیجر آتا ترخنگ نا تدینی تیٹ بھازی بندغ آتا مون، دو یا پِڈ آک ٹپی مسنو۔

واہم حزب اللہ نا میڈیا آفس نا ردئٹ درو نا مروک واکی ٹاکی جلہو تیٹ 16 سال نا اسہ مار اسیتون اوار 13 جنگجو کسکنو۔

ایلو پارہ غان ملخدو پیجر تراک آتیان مرگ ئنا گواچی مروک اِرا بندغ حزب اللہ نا اِرا پارلیمنٹ باسک آتا مارک ئسر، او پاریر کہ حزب اللہ نا اسہ باسک ئسے نا مسڑ ہم مرگ ئنا گواچی مسنے اندن ٹپی آتیٹ لبنان ئٹ ایران نا سفیر مجتبیٰ امانی ہم اوار ءِ۔

لبنان نا ہندی میڈیا نا ردئٹ منہ علاقہ ئٹ اینو ہم تراک آتا حوال آک رسینگانو ہراڑان پد فوج شاری تے دن انگا اوزار آتیان مُر مننگ تون اوار اسہ شکبر گڑا ئسے نا خننگ تون ہمو وخت آ فوج ءِ حوال تننگ نا پارینے۔

بلوچ اسٹوڈنٹس ایکشن کمیٹی نا پارہ غان پنی آ بلوچ شاعر مبارک قاضی نا اولیکو سال دے ئنا وخت آ اودے دروت ندر کریسہ کوئٹہ ئٹ مجلس اس اڈ تننگا ہراٹی نوشتہ کار، شاعر، استاد و خوانندہ غاک بھلو کچ اسیٹ اوار مسر۔ مجلس ئٹ مبارک قاضی نا زند و اونا شاعری آ شابیت ہیت مس۔

مجلس جتا بشخ آتیا تالان ئس ہرافتیٹ تنظیم نا پارہ غان شینک کروک پیپر، مبارک قاضی نا زند آ جوڑ کروک ڈاکومنٹری و ڈرامہ، قاضی نا زند و شاعری آ تران، مشاعرہ تون اوار ساز و زیمل اوار ئس۔ مجلس ئٹ تران کروک آتیٹ پروفیسر اے آر داد، پروفیسر منظور بلوچ و نوشتہ کار گلاب گلزار اوار ئسر ہرافک قاضی نا زند و ادب آ ہیت کریر۔

تران کروک آک پاریر کہ مبارک قاضی ہمو بلوچ شخصیت ئس ہرا تینا زند ئٹی بلوچ راج ئنا نیام ئٹ ہمو ہند ءِ دوئی کرے و بلوچ راج اودے ہمو شرف ءِ تس او ہند بلکن اسہ شاعر ئسے رسینگانے۔ قاضی نا شاعری تینا راج و ڈغار تون گنڈوک ئس ہراٹی او ساندہ تینا چاگڑد نا ظلم و زیاتی تے تینا شاعری نا زبان ئٹ درشان کریکہ۔ اودے کیہی وار تڑی تننگا، اودے قید و بند کریر و اوڑا جلہو مس ولے او مَش آنبار سلوک مس و تینا راج و ڈغار کن نئے بیرہ شاعری کرے بلکن ساندہ عملی پڑ آ ہم راج ئتون اوار ئس۔

مجلس نا ایلو بشخ ئٹ مبارک قاضی نا زند آ اسہ ڈرامہ اس نشان تننگا ہراڑان پد ایلو بشخ مشاعرہ ئٹ جتا شاعر ہرافتیٹ ظہور زیبی، نظام نزیری، ساحر عزیز، حماد ہمراز تون اوار ایلو شاعر آک تینا شئر تے پاریر۔

مجلس نا گڈیکو بشخ ساز و زیمل ئس ہراٹی شئر پاروک بسیر عالم و قیوم بلوچ تینا توار تیٹ قاضی نا نوشتہ کروکا شئر تے پاریر۔

ضلع کیچ نا تحصیل بلیدہ نا علاقہ گِلی زُندان ئٹ آباتی نا نیام ئٹی پاکستانی لشکر نا چیک پوسٹ جوڑ کننگ نا برخلاف گلی بلیدہ نا بندغ آک برانز کریسہ کسر ءِ بند کریر۔

دا برانز ئٹ ہندی بندغ آک جوانو کچ اسیٹ اوار مسر اندن زالبول آک ہم اوار ئسر۔

برانز کروک آتا پاننگ ءِ کہ باہوٹ بازار ئٹ مالو آن اسہ چیک پوسٹ اس ارے ہراڑان بندغ آک تنک ءُ داسہ زندان ئٹ آباتی نا نیام ئٹ چیک پوسٹ جوڑ کننگ کن نن اِلیپرون انتئے کہ دا چیک پوسٹ آتیا لس آباتی تنک کننگک۔

یاتی مرے پن کروک علاقہ و دامون ایمون نا آباتی تیٹ داکان مالو پاکستانی لشکر بھلو کچ اسیٹی ساڑی ءِ اندن ننکان آباتی ٹی سرچ لائٹ خلنگ نا سوب آن زالبول آک بھاز فریشانی تون مون تننگ ءُ۔

مخلوق نا پاننگ ءِ کہ پاکستانی لشکر نا بے بندغی رویہ ئسے دا وڑ نا کاریم تیان بندغ آتا فریشانی تیٹ گیشتر ودکی مننگ ءِ فورسز آتے اُرا تا مونان مُر کننگہ۔

پنجگور و چاغی ٹی جتاء سم کاری نا تدینی تیٹ اسہ بندغ ئس مرگ ئنا گواچی، مسٹ ٹپی و اسٹ ئس دزگیر۔

حوال آتا رد ئٹ سم کاری نا تدینی درو ننکان پنجگور نا علاقہ خدابادان سراوان نا ہند آ برام نا دیوان نا وخت آ مس۔

مرگ ئنا گواچی مروکا بندغ نا چاہندای جلیل ولد عبد الغنی نا پن ئٹ مسنے۔ وختس کہ عاصم ولد مسلم، ساکم ولد نعمت و نصیب اللہ ولد عنایت اللہ ٹپی مسنو۔

ایلو پارہ غان بلوچستان نا ضلع چاغی ٹی مون تہو ئٹ سم کاری کننگ آ لیویز کارندہ غاک بادشا ءِ دزگیر کریر۔

لیویز بست و بند نا رد ئٹ میجر طاہر خان زرکون نا پاننگ آن چاغی کیو آر ایف انچارج گل جان ساسولی، چاغی لیویز تھانہ لائن انچارج عاطف علی سنجرانی کاروائی کرسہ چاغی ٹی مون بڑز سم کاری کننگ آ بادشاہ ءِ دزگیر کرے۔

یاتی مرے کہ چاغی بست و بند نا پارہ غان مون بڑز سم کاری کننگ آ تیوہ وڑ ئٹ پابندی خلنگاسس۔

ڈیرہ مراد جمالی ٹی نا درست آ بندغ آتا بمب جلہو ئٹ پنچ بندغ ٹپی، بی آر جی ذمہ واری ءِ ارفے۔

چغلی بمب جلہو ڈیرہ مراد جمالی ٹی گریڈ اسٹیشن نا ہند آ مس، ہراڑے موٹر سائیکلی آک تعمیراتی کمپنی نا کارندہ غاتیا چغلی بمب ئس چغل تسر۔

ٹپی آتے ہسپتال آ دریر ہرافتیان اسٹ نا حالیت ءِ گندہ پاننگ ءُ۔

بلوچ ریپبلیکن گارڈز نا ترجمان دوستین بلوچ تینا شینک کروک بیان ئٹ پارینے کہ ننا سرمچار آک اینو ڈیرہ مراد جمالی ٹی کسر جوڑوکو اسہ کمپنی ئسے نا کارندہ غاتے چغلی بمب جلہو اسیٹی ٹِک کریر۔

ترجمان پارے کہ بی آر جی نا سرمچار آک ڈیرہ مراد جمالی گریڈ اسٹیشن نا خڑک آ کسر جوڑ کروکا کمپنی نا کارندہ غاتے چغلی بمب ئٹ ٹِک کریر، تراک نا سوب 5 کارندہ بھاز ٹپی مسر۔

ترجمان پارے کہ بلوچ ریپبلیکن گارڈز دا جلہو نا ذمہ واری ءِ ارفک و بلوچستان نا آجوئی اسکان قوضہ گیر پاکستانی لشکر و اونا کمک کار آتیا ننا دا وڑ ئنا جلہوک برجاء مرور۔

زاکر دشتی نا سیال آک سی پیک کسر ءِ بند کننگ نا وخت تسر تسر۔

زاکر دشتی نا ایلم و ایلو سیال آک پاریر کہ اینو سہب ئنا یانزدہ بجہ نا وخت آ سلہہ بند بندغ آک زاکر دشتی ءِ ایلم و تاتا نا چناء تون اوار سی پیک کسر آ حاجی یاسین مارکیٹ نا خڑک آ برمتہ کرسہ تینتون اوار دریر۔

سلہہ بند بندغ آک اِرا ویگو گاڑی ٹی بسوسر، اوفک خواست کرینو کہ پولیس زاکر دشتی استے زوت یلہ کرفے۔

مشکے نا جتا علاقہ تیٹ پاکستانی لشکر نا لشکر کشی برجاء ءِ۔

بلوچستان نا علاقہ مشکے ٹی پاکستانی لشکر جتا علاقہ تیٹ لشکر کشی کننگ ءِ۔ فوجی کارندہ غاک کیہی گاڑی و موٹر سائیکل تیتون اوار پند آ ہن و بر کننگ ءُ۔

علاقائی حوالکار تا ردئٹ لشکر کشی ٹی فوجی کارندہ تیتون ڈیتھ اسکواڈ کارندہ غاک ہم تد ءُ۔ بزی، خلکلونک، مرماسی، کلیڑ، پھچڑ، و ایب کیب نا علاقہ غاک لشکر کشی نا پلویڑ ئٹی ءُ۔

پاکستانی کوالخواک دا بابت ہچو حوال اس تتنو۔

خیال ئٹ مرے بلوچستان نا جتا علاقہ تیٹ لشکر کشی بناء کننگانے، تدوکا دے تیٹ بولان و اوڑتون تفوک علاقہ تیٹ بھلو کچ ئسے آ لشکر کشی کننگا۔

اندا وڑ قلات و مستونگ ہم لشکر کشی نا پلویڑ ئٹ مسنو۔

داکان مالو پاکستانی لشکر قلات نا علاقہ ئٹ لشکر کشی نا وخت آ اِرا بندغ ءِ کسفنگ نا دعویٰ کریسس ہرا پدان دروغ نا مونتس اس پاش مس۔

اقوام متحدہ نا بندغی حق آتا کونسل نا پنجاہ و ہفتمیکو باقاعدہ مجلس ئٹ وائس فار بلوچ مسنگ پرسنز نا جنرل سیکرٹری سمی دین بلوچ ویڈیو لنک نا ذریعت ئٹ تران کریسہ پارے کہ بلوچستان نا پاکستانی لشکر و ڈھکوک ادارہ تا کارروائی تیان بندغی نیستی ودی مننگ ءِ۔

او پارے کہ کیہی سال تیان بلوچ آک ریاستی تادی نا گواچی ءُ۔ جہانی راج آک بلوچ زوراکی ئٹ بیگواہ بندغ تا ہتنگ کن کڑد سر ایتر۔

سمی دین چاگڑدی حوالکاری تلہ غا تینا تران آن پد پوسٹ کریسہ پارے کہ ای کونسل ءِ بلوچستان ئٹ بندغی حق آتا لتاڑنگ و زوراکی نا بیگواہی تا بابت آگاہ کریٹ۔

او پارے کہ کنے آ خلوک بیدس پڑو سفری رکھ آتیان پد ہم، ہرانا مسخت کنے دا مجلس ئٹ اوار مننگ آن توننگ و کنا توار ءِ چپ کرفنگ ئس، ای فرنٹ لائن ڈیفینڈرز (FLD) نا منتوار اُٹ کہ او کنا توار ءِ بِنگ و کنے کنا وکالت نا مسخت ءِ پورا کننگ نا لائخ جوڑ کرے۔